1 Jehanɛ ɔ, ami nɛ ji asafo nɔkɔtɔma kaa nyɛ, nɛ i yeɔ Kristo amanehlu ɔmɛ a he odase, nɛ i ma na e anunyami ɔ nɛ a ma je kpo ngɛ e bami ligbi ɔ nɔ ɔ, i ngɛ nyɛ dee ke, 2 nyɛɛ le Mawu asafo nɛ nyɛ ngɛ nɔ hyɛe ɔ ngɛ suɔmi nya, pi ngɛ nɔ nɔ nyɛmi nya, loo se nami ko he, se mohu ngɛ tsui mi jɔmi nya. 3 Jehanɛ ɔ hu, nyɛ ko ye a nɔ matsɛ; se mohu nyɛɛ pee nyɛ he nɔ hyɛmi nɔ́ ko ha mɛ, 4 konɛ ke Nutsɔ ɔ ba a, nyɛ nine nɛ su e anunyami ɔ nɔ kɛ ya neneene.

5 Ja a nɔuu nyɛ jokuɛwi ɔmɛ hu, nyɛɛ ba nyɛ he si kɛ ha nikɔtɔma amɛ. Nyɛ tsuo nyɛ sɔmɔ nyɛ si bi kɛ he si bami subai, ejakaa Mawu kuɔ he woli a nya nɛ e gbaa he si bali. 6 Lɔ ɔ he je ɔ, nyɛɛ ba nyɛ he si ngɛ Mawu hɛ mi, konɛ e wo nyɛ nɔ ngɛ e be nɛ sa mi.

7 Nyɛɛ ngɔ nyɛ haomi ɔmɛ tsuo ngɔ fɔ e nɔ, ejakaa e susuɔ nyɛ he.

8 Nyɛ hɛ nɛ ka si, nɛ nyɛ hɛ nɛ hi nyɛ he nɔ, ejakaa nyɛ he nyɛlɔ nɛ ji Abosiami ɔ, e ngɛ si kpae nɛ e ngɛ ngmlaa kpae kaa jata nɛ ngɛ nɔ hlae nɛ e ye. 9 Nyɛɛ da si kpɛii ngɛ nyɛ hemi kɛ yemi ɔ mi nɛ nyɛɛ kɛ lɛ nɛ kpe. Nyɛɛ le kaa amanehlu nɛ ɔmɛ nɔuu nyɛ nyɛmi ɔmɛ hu ngɛ nae ngɛ je ɔ mi tsuo.

10 Se ke nyɛ na amanehlu be bɔɔ se ɔ, Mawu nɛ ji dloomihi kulaa Tsɛ ɔ, nɔ nɛ tsɛ nyɛ kɛ ba e neneene anunyami mi ngɛ Kristo mi ɔ, lɛ nitsɛ e maa to nyɛ si ekohu nɛ e maa wo nyɛ he wami kɛ pi si. 11 Lɛ e ngɛ matsɛ yee kɛ yaa neneene. Amen.

12 I ngma nyɛ womi kpiti nɛ ɔ kɛ gu nyɛmi Silvano nɔ, nɔ nɛ ji anɔkualetsɛ, kaa bɔ nɛ i buu lɛ ɔ, kɛ ngɛ nyɛ he wami woe, nɛ i ngɛ odase yee kaa enɛ ɔ ji Mawu anɔkuale dloomi ɔ nɛ. Nyɛɛ pɛtɛ he kpɛii.

13 Babilon asafo ɔ nɛ ji nyɛ nyɛmimɛ ɔ, kɛ ye bi Marko ngɛ Kristo mi ɔ ke a biɔ nyɛ. 14 Nyɛɛ kɛ Kristo se nyɛɛli a suɔmi nɛ nga nyɛ si bi. Nyɛ Kristo se nyɛɛli kulaa, nyɛ he manye!