1 Ye ga womi ji kaa a sɔle kɛ ha ni kpahi; nɛ a kpa Mawu pɛɛ nɛ e na mɛ mɔbɔ; nɛ a na Mawu si ngɛ níhi kulaa nɛ e maa pee ha mɛ ɔ he.

2 A sɔle kɛ ha matsɛmɛ kɛ nihi kulaa nɛ ngɛ wa nɔ yee, aloo nihi nɛ hɛɛ blɔ nya a, konɛ wa nyɛ hi si ngɛ he jɔmi kɛ kpoo peemi kɛ je mi bami kpakpa ngɛ Mawu jami kɛ Nutsɔ ɔ he susumi mi. 3 Enɛ ɔ ji nɔ́ nɛ hi, nɛ e sa Mawu, wa Yiwamihelɔ ɔ hɛ mi, 4 ejakaa e suɔ kaa a he nimli tsuo a yi wami nɛ a nu anɔkuale nɛ ɔ sisi, 5 kaa Mawu kake nɛ ngɛ, loko ji nimli adesahi hu ngɛ, nɛ Kristo Yesu nɛ lɛ nitsɛ hu e ji nɔmlɔ ɔ, e daa si ngɛ Mawu kɛ nimli tsuo a kpɛti, 6 nɛ e ngɔ e wami ngɔ ha kaa kpɔmi nɔ́ kɛ ha nimli tsuo konɛ e kɛ pee mɛ kake. Enɛ ɔ ji munyu nɛ Mawu ngɔ ha je ɔ ngɛ be nɛ sa mi. 7 Nɛ e ji anɔkuale kaa enɛ ɔ he nɔuu nɛ a hla mi ngɛ, kaa Mawu bɔfo kɛ fiɛlɔ, nɛ ma tsɔɔ ma je li ɔmɛ Mawu blɔ nya tomi kɛ ha yi wami hemi kɛ gu hemi kɛ yemi nɔ ɔ. 8 Lɔ ɔ he je ɔ, i suɔ kaa nyumuhi ngɛ he fɛɛ he a wo a ninehi nɛ he tsɔ nɔ, nɛ a sɔle, nɛ yayami ko loo muklii mi fumi loo ninyɛ ko be a mi. 9,10 Nɛ yi ɔmɛ hu a pee ja a nɔuu ngɛ kpoo peemi kɛ juɛmi kpakpa kɛ he dlami mi. Nyɛ ha nɛ a na Kristo se nyɛɛli yi ɔmɛ kaa a mi jɔ nɛ a hi, pi ngɛ yi hɔɔmi loo june loo tadehi nɛ a he jua wa nɛ a ma kɛ dla a he ɔ mi . 11 Yi ɔmɛ a bu tue nɛ a kase ni ngɛ kpoo peemi kɛ he si bami mi.

12 I ha we yi ɔmɛ he blɔ kaa a tsɔɔ nyumu ɔmɛ ni aloo a ye a nɔ. Se mohu a pee dii ngɛ asafo ɔ kpehi a mi. 13 Mɛni he je? Ejakaa Adam ji nɔ nɛ Mawu bɔ kekle, nɛ e se loko ji e bɔ Hawa. 14 Nɛ tsa pi Adam nɛ Abosiami pee kuasia a, se Hawa i, nɛ lɔ ɔ kɛ yayami ba. 15 Enɛ ɔ he je nɛ Mawu ha yihi naa nɔ́ ngɛ bi fɔmi mi, se e ma he a yi wami ke ji a maa hi si ngɛ e nɔ hemi kɛ yemi kɛ kpoo kɛ kpakpa peemi kɛ suɔmi mi.