1 Ami Yohane nɛ ji asafo nɔkɔtɔma a, ngɛ womi nɛ ɔ ngmae kɛ ya ha Alua nɛ a hla lɛ ɔ, kɛ e bimɛ, nihi nɛ i suɔ mɛ saminya ngɛ anɔkuale mi. Nɛ pi ami nɔ kake kɛkɛ nɛ suɔ mɛ, se nɔ fɛɛ nɔ ngɛ sɔlemi ɔ mi nɛ le anɔkuale ɔ. 2 Akɛnɛ anɔkuale ɔ ngɛ wa tsui mi kɛ yaa neneene he je ɔ, 3 Mawu nɛ ji Tsɛ ɔ, kɛ Yesu Kristo e Bi ɔ, maa jɔɔ wɔ babauu kɛ mɔbɔ nami kɛ he jɔmi ngɛ anɔkuale kɛ suɔmi mi.

4 E pee mi bua jɔmi saminya kaa i na o bi ɔmɛ ekomɛ ngɛ hiɛ ɔ nɛ a ngɛ anɔkuale ɔ se nyɛɛe kaa bɔ nɛ Tsɛ ɔ fɔ wɔ ɔ. 5 Jehanɛ ɔ, anyɛmimɛ nɛ a suɔ, i suɔ nɛ ma kai nyɛ ngɛ mlaa momo ɔ nɛ Mawu wo wɔ kɛ je sisije ɔ he, kaa Kristo se nyɛɛli ɔmɛ a suɔ a si bi ɔ. 6 Ke wa suɔ Mawu ɔ, wa maa pee nɔ́ tsuaa nɔ nɛ e ma de wɔ ke waa pee ɔ. Nɛ e wo wɔ kita momoomo kɛ je sisije ke waa suɔ wa si bi.

7 Nyɛ hyɛ nyɛ he nɛ hi ngɛ lakpa tsɔɔli ɔmɛ a he. Mɛ ji nihi nɛ a he we yi kaa Yesu Kristo ba je ɔ mi ngɛ he lo mi kaa nɔmlɔ adesa. Kikɛmɛ a nimli nɛ ɔmɛ a sume anɔkuale ɔ, nɛ a te si kɛ si Kristo. 8 Nyɛɛ hyɛ nɛ hi nɛ nyɛ ko pee kaa mɛ, nɛ hiɔwo nɛ i kɛ nyɛ tsuo wa ngɛ ni tsue wawɛɛ nɛ wa ma na a, nɛ ko laa nyɛ; se mohu nyɛ nine nɛ su hiɔwo mluku nɔ kɛ je Nutsɔ ɔ dɛ. 9 Ke nɔ ko nyɛɛ we ngɛ Kristo tsɔɔmi ɔ nya, se e peeɔ níhi kɛ bee nɔ ɔ, e be Mawu nɔ́ pee. Nihi nɛ yeɔ Kristo tsɔɔmi ɔmɛ a nɔ ɔ, mɛ nɛ a peeɔ Tsɛ ɔ kɛ Bi ɔ a nihi.

10 Ke nɔ ko ba nɛ e ba tsɔɔ mo ni, se e he we Kristo tsɔɔmi ɔ yi ɔ, mo ko kpee lɛ kɛ ba o we ɔ mi, nɛ o ko ha lɛ hɛ mi tete ngɛ blɔ ko nɔ. 11 Ke ji o ha lɛ hɛ mi ɔ, o peeɔ e he piɛlɔ ngɛ e yi mi wami ni tsumi ɔ mi.

12 Jinɛ i ma suɔ nɛ ma de nyɛ níhi fuu, se i be suɔe nɛ ma ngma ngɛ womi ɔ mi. I heɔ yeɔ kaa e be kɛe nɛ i ma ba slaa nyɛ nɛ waa sɛɛ ni nɛ ɔmɛ a he ni hɛ mi kɛ hɛ mi, nɛ wa ma na bua jɔmi saminya. 13 O nyɛmiyo nɛ lɛ hu a hla lɛ ɔ, e bi ɔmɛ ke a biɔ mo.