1 Nɔ fɛɛ nɔ nɛ heɔ yeɔ kaa Yesu ji Kristo ɔ, nɛ lɛ ji Mawu Bi kɛ e Yiwamihelɔ ɔ, Mawu bi ji lɛ. Nɛ nɔ tsuaa nɔ nɛ suɔ Tsɛ ɔ, e suɔ e bimɛ hulɔ. 2 Ke wa suɔ Mawu nɛ wa yeɔ e mlaa amɛ a nɔ ɔ, lɛɛ wa suɔ Mawu bi ɔmɛ. 3 Mawu suɔmi ji e mlaa amɛ a nɔ yemi. Nɛ e mlaa amɛ a nɔ yemi wɛ; 4 ejakaa nɔ fɛɛ nɔ nɛ ji Mawu bi ɔ buɔ lɛ tue. E maa ye yayami kɛ akɔnɔ níhi nɛ a ji yayami ɔ nɔ, kɛ gu Kristo nɔ hemi kɛ yemi nɔ, kaa e maa ye kɛ bua lɛ.

5 Se mɛnɔ nɛ e yeɔ je ɔ nɔ kunimi? Ja nɔ nɛ heɔ yeɔ kaa Yesu ji Mawu Bi. 6 Yesu Kristo ji nɔ nɛ ba; e ba kɛ e baptisimi nyu ɔ kɛ e gbenɔ muɔ ɔ. Pi nyu ɔ kɛkɛ nɛ e kɛ ba, se nyu kɛ muɔ tsuo. 7 Nɛ Mumi ɔ nitsɛ yeɔ he odase kaa enɛ ɔ ji anɔkuale, ejakaa Mumi ɔ, anɔkuale i. 8 Odase yeli etɛ nɛ ngɛ, Mumi ɔ kɛ nyu ɔ, kɛ muɔ ɔ; nɛ mɛ níhi etɛ nɛ ɔmɛ tsuo a gbi pee kake. 9 Wa ngɔɔ nimli a odase yemi, se Mawu e odase yemi kle pe nimli a nɔ́, nɛ Mawu e odase nɛ e ye ngɛ e Bi ɔ he ji enɛ ɔ nɛ. 10 Nihi kulaa nɛ heɔ enɛ ɔ yeɔ ɔ, a le ngɛ a tsui mi kaa e ji anɔkuale. Ke nɔ ko he we enɛ ɔ yi ɔ, lɛɛ e ngɛ Mawu tsɛe ke lakpatsɛ. Ejakaa e he we nɔ́ nɛ Mawu de ngɛ e Bi ɔ he ɔ yi

11 Nɛ odase ɔ ji, kaa Mawu ha wɔ neneene wami, nɛ kikɛmɛ a wami ɔ ngɛ e Bi ɔ mi. 12 Lɔ ɔ he je ɔ, nɔ tsuaa nɔ nɛ heɔ Mawu Bi ɔ nɔ yeɔ ɔ, e ngɛ wami; nɛ nɔ tsuaa nɔ nɛ he we e Bi ɔ nɔ yi ɔ, e be wami.

13 I ngɛ nyɛ nihi nɛ nyɛ heɔ Mawu Bi ɔ nɔ yeɔ ɔ enɛ ɔ ngmae konɛ nyɛ na nɛ nyɛɛ le kaa nyɛ ngɛ neneene wami. 14 Nɛ wa heɔ enɛ ɔ yeɔ, kaa be fɛɛ be ke wa bi lɛ nɔ́ ko ngɛ e suɔmi nya a, e maa bu wɔ tue. 15 Nɛ ke wa le anɔkuale mi kaa e buɔ wɔ tue be fɛɛ be nɛ wa ma bi lɛ nɔ́ ko ɔ, lɛɛ wa ngɛ nɔ mi mami kaa e ma ha wɔ heto.

16 Ke o na o nyɛmi nɛ e ngɛ yayami ko pee nɛ gbenɔ be mi jee ɔ, o bi Mawu nɛ e kɛ pa lɛ. E ma ha lɛ wami, ja e pee yayami nɛ e kɛ gbenɔ baa. Yayami ɔ eko ngɛ nɛ gbenɔ jee mi, nɛ ke kɔlɔ ɔ nɛ e pee ɔ, se nami be he kaa a sɔle kɛ ha lɛ. 17 Nɔ́ fɛɛ nɔ nɛ ji tɔmi ɔ, yayami i. Se yayami ɔ eko ngɛ nɛ e pee we gbenɔ.

18 Nɔ tsuaa nɔ nɛ peeɔ Mawu weku ɔ mi no ɔ, e pee we yayami. Ejakaa Kristo nɛ ji Mawu Bi ɔ e buu e he, nɛ Abosiami na we e he blɔ. 19 Wa le kaa Mawu bimɛ ji wɔ, se je ɔ tsuo nɛ bɔle wɔ ɔ ngɛ Abosiami he wami kɛ nɔ yemi sisi. 20 Nɛ wa le hu kaa Kristo nɛ ji Mawu Bi ɔ, e ba nɛ e ba ye kɛ bua wɔ nɛ waa le anɔkuale Mawu ɔ. Nɛ amlɔ nɛ ɔ, wa peeɔ Mawu bimɛ, ejakaa wa peeɔ e Bi Yesu Kristo ɔ se nyɛɛli. Lɛ pɛ ji anɔkuale Mawu; nɛ lɛ ji neneene wami ɔ.

21 Bimɛ nɛ a suɔ, nyɛ je nyɛ he kɛ je nɔ́ ko nɛ ma je Mawu kɛ je nyɛ tsui mi ɔ he. Amen.