1 Ye bimɛ, i ngɛ nyɛ enɛ ɔ ngmae bɔ nɛ pee nɛ nyɛ ko pee yayami. Se ke nyɛ pee yayami ɔ, nɔ ko ngɛ nɛ ma kpa Tsɛ ɔ pɛɛ kɛ ha nyɛ. Lɛ ji Yesu Kristo, nɔ nɛ lɛ pɛ nɛ e hi, nɛ e sa Mawu hɛ mi kɛ pi si ɔ. 2 Lɛ nɛ e ngɔ Mawu muklii mi fumi nɛ e na ngɛ wa he yayami ɔmɛ a he ɔ kɛ fɔ e nɔ nɛ e kpata waa kɛ Mawu wa kpɛti. Lɛ nɛ a ngɔ kɛ je wa he yayami ɔmɛ, nɛ pi wɔ kɛkɛ, se mohu je ɔ tsuo he yayami.

3 Nɛ ke ji wa yeɔ e mlaa amɛ a nɔ ɔ, lɛɛ wa ma nyɛ de ke e nihi ji wɔ. 4 Nɔ nɛ deɔ ke e le Mawu, se e yi e mlaa amɛ a nɔ ɔ, lakpatsɛ ji lɛ, nɛ anɔkuale ɔ be e mi. 5 Se nɔ nɛ yeɔ Mawu Munyu ɔ nɔ anɔkuale mi ɔ, e mi nɛ Mawu suɔmi ɔ ngɛ kɛ pi si. Nɛ kɛ gu enɛ ɔ nɔ nɛ a ma nyɛ maa le kaa Kristo se nyɛɛlɔ ji lɛ aloo e pi Kristo se nyɛɛlɔ.

6 Nɔ fɛɛ nɔ nɛ ke Kristo se nyɛɛlɔ ji lɛ ɔ, e hi si kaa bɔ nɛ Kristo hi si ɔ. 7 Anyɛmimɛ suɔli, pi mlaa he nɛ i ngɛ nyɛ woe kaa nyɛɛ ye nɔ, se e ji mlaa momo nɛ a kɛ ha nyɛ kɛ je sisije. Nyɛ nu kulaa hyɛ. 8 Se kɛ ɔ, e peeɔ mlaa he be fɛɛ be, nɛ e tsuɔ ni kɛ haa nyɛ kaa bɔ nɛ e pee kɛ ha Kristo ɔ. Nɛ ke wa ye mlaa nɛ ɔ nɛ tsɔɔ kaa waa suɔ wa si bi ɔ nɔ ɔ, diblii ɔ nɛ ngɛ wa mi ɔ maa laa nɛ la he nɛ ji wami nɛ ngɛ Kristo mi ɔ ma kpɛ ngɛ wa mi.

9 Nɔ fɛɛ nɔ nɛ deɔ ke Kristo se nyɛɛlɔ ji lɛ, se e sume e nyɛmi nɔmlɔ ɔ, e ngɛ diblii ɔ mi kɛ sa. 10 Se nɔ tsuaa nɔ nɛ suɔ e nyɛmi nɔmlɔ ɔ, e ngɛ Kristo mi. E be nyɛɛe ngɛ diblii mi nɛ e ma tɛ nɔ́, nɛ e be yayami hu pee. 11 Ejakaa nɔ nɛ sume e nyɛmi ɔ, e ngɛ nyɛɛe ngɛ diblii mi, nɛ e li he nɛ e yaa, ejakaa diblii ɔ yu e hɛ ngmɛ.

12 Ye bimɛ tsɔwi, i ngɛ nyɛ tsuo enɛ ɔmɛ ngmae, ejakaa a ngɔ nyɛ yayami ɔmɛ kɛ ke nyɛ ngɛ Kristo wa Yiwamihelɔ ɔ biɛ mi. 13 I ngɛ nyɛ nɔkɔtɔma amɛ enɛ ɔmɛ dee, ejakaa nyɛɛ lɛɛ nyɛ le Kristo anɔkuale mi, nɔ nɛ ngɛ kɛ je sisije ɔ. Nɛ nyɛ nɛ ji nihewi ɔmɛ, i kɛ nyɛ ngɛ munyu tue, ejakaa nyɛ ye kunimi ngɛ nyɛɛ kɛ Abosiami nyɛ kpɛti ta a mi. Nɛ i ngɛ nyɛ jokuɛwi ɔmɛ ngmae, ejakaa nyɛ hu nyɛ kase nɛ nyɛ le Mawu nɛ ji wa Tsɛ ɔ.

14 Lɔ ɔ he je ɔ, nyɛ tsɛ ɔmɛ, nyɛ ni nɛmɛ nɛ nyɛ le neneene Mawu ɔ, kɛ nyɛ nihewi nɛ nyɛ ngɛ he wami, nɛ Mawu munyu ɔ ngɛ nyɛ tsui mi nɛ nyɛ ye Abosiami nɔ kunimi ɔ, i ngɛ nyɛ dee ke, 15 nyɛɛ jɔɔ je nɛ ɔ kɛ e mi nɔ́ yayami ɔmɛ suɔmi. Ke nyɛ suɔ kikɛmɛ a ní nɛ ɔmɛ ɔ, e tsɔɔ kaa nyɛ sume Mawu anɔkuale mi. 16 Ejakaa je mi ní nɛ ɔmɛ, nɛ ji akɔnɔ ni yayamihi, kaa yo se nyɛɛmi, hɛ kɔmi níhi, kɛ fiami ngɛ ni nami loo blɔ nya nami he ɔ, a pi níhi nɛ je Mawu ngɔ. A je je yayami nɛ ɔ nitsɛ mi. 17 Se je ɔ maa be kɛ e mi ni yayami ɔmɛ, nɛ nɔ tsuaa nɔ nɛ ngɛ Mawu suɔmi nya ni pee ɔ, e maa hi si kɛ ya neneene.

18 Bimɛ nɛ a suɔ, je nɛ ɔ nyagbe ngmlɛfia a su. Nyɛ nu kaa lakpa Kristo ma, nɔ nɛ te si kɛ wo Kristo ɔ; nɛ kikɛmɛ a nimli nɛ ɔmɛ fuu ba momo. Nɛ enɛ ɔ ji nɔ́ nɛ haa wɔ nɔ mi mami kaa je ɔ nyagbe su ta. 19 Kikɛmɛ a lakpa kristo se nyɛɛli nɛ ɔmɛ hi wa asafo ɔmɛ a mi hyɛ, se a pi wa asafo mi bimɛ anɔkuale mi; kaa wa kpɛti nihi ji mɛ jinɛ a be jee. Nɛ a jemi nɛ a je ɔ, e tsɔɔ kaa a pi wa kpɛti nimli kulaa.

20 Se nyɛɛ lɛɛ nyɛ be ja, ejakaa Mumi Klɔuklɔu ɔ ba nyɛ nɔ nɛ nyɛ le anɔkuale ɔ. 21 I ngɛ nyɛ ngmae, pi nɛ nyɛ li anɔkuale ɔ he je, se kaa nihi nɛ le anɔkuale ɔ. I ngɛ nyɛ kɔkɔ bɔe kaa nihi nɛ le slɔɔto nɛ ngɛ anɔkuale kɛ lakpa kpɛti.

22 Nɛ mɛnɔ ji lakpatsɛ pe kulaa? Nɔ nɛ deɔ ke tsa pi Yesu ji Kristo ɔ. Kikɛmɛ a nɔmlɔ ɔ, lakpa kristo se nyɛɛlɔ i, ejakaa e he we Mawu nɛ ji Tsɛ ɔ kɛ e Bi ɔ nɔ yi. 23 Ejakaa nɔ nɛ he we Kristo nɛ ji Mawu Bi ɔ nɔ yi ɔ, e be Mawu nɛ ji Tsɛ ɔ hu nɔ hee maa ye. Se nɔ nɛ heɔ Kristo nɛ ji Mawu Bi ɔ nɔ yeɔ ɔ, e heɔ Mawu nɛ ji Tsɛ ɔ hu nɔ yeɔ.

24 Lɔ ɔ he je ɔ, nyɛɛ ya nɔ nɛ nyɛ he nɔ́ nɛ a tsɔɔ nyɛ kɛ je sisije ɔ nɛ nyɛɛ ye. Ke nyɛ pee ja a, nyɛɛ kɛ Mawu nɛ ji Tsɛ ɔ kɛ e Bi ɔ maa hi huɛ bɔmi mi be fɛɛ be. 25 Nɛ neneene yi wami nami ji nɔ́ nɛ lɛ nitsɛ e wo wɔ si ngɛ he.

26 Nɔ́ nɛ i ngɛ nyɛ ngmae ngɛ lakpa kristo ɔ he ɔ, e kɔɔ nihi nɛ maa sisi nyɛ, nɛ a ma ha nyɛ maa tla blɔ ɔ a he. 27 Se nyɛ nine su Mumi Klɔuklɔu ɔ nɔ, nɛ e ngɛ nyɛ mi. E he hia we kaa nɔ ko nɛ e ba tsɔɔ nyɛ nɔ́ nɛ da. Ejakaa Mumi Klɔuklɔu ɔ tsɔɔ nyɛ nɔ́ tsuaa nɔ, nɛ lɛ ji Anɔkuale ɔ nɛ, e pi lakpatsɛ. Lɔ ɔ he je ɔ, kaa bɔ nɛ e de ɔ, nyɛɛ hi Kristo mi, nyɛ ko je e mi gblee. 28 Jehanɛ ɔ, ye bimɛ tsɔwi, nyɛɛ hi Nutsɔ ɔ mi, bɔ nɛ pee nɛ ke e ba a, zo nɛ ko pee nyɛ kaa nyɛɛ kɛ lɛ ma ya kpe. 29 Akɛnɛ wa le kaa Mawu hi be tsuaa be, nɛ nɔ́ nɛ da pɛ nɛ e peeɔ he je ɔ, wa ma nyɛ de anɔkuale mi ke, nɔ fɛɛ nɔ nɛ peeɔ nɔ́ dadɛ ɔ, Mawu bi ji lɛ.