1 Womi nɛ Simon Petro nɛ ji Yesu Kristo tsɔlɔ kɛ fiɛlɔ ɔ ngma kɛ ya ha nɔ tsuaa nɔ nɛ a ha lɛ hemi kɛ yemi nɛ he jua wa kaa wa nɔ ɔ, kɛ gu wa Mawu kɛ wa Kpɔlɔ Yesu Kristo dami nɔ ji enɛ ɔ nɛ:

2 Dloomi kɛ he jɔmi babauu nɛ je Mawu kɛ wa Nutsɔ Yesu lemi mi ɔ nɛ ba nyɛ nɔ. 3 Ejakaa ke nyɛ le lɛ saminya a, e ma ha nyɛ nɔ́ tsuaa nɔ nɛ he maa hia nyɛ ngɛ e he wami nɛ kle ɔ nya, nɛ nyɛ ma na si himi kpakpa. Ejakaa e tsɛ wɔ nɛ waa kɛ lɛ nɛ hi e anunyami kɛ e himi ɔ mi. 4 Nɛ ngɛ e he wami ɔ kɛ nya a, e ha wɔ nyakpɛ jɔɔmi nike ni kpakpa kpahi kulaa nɛ e wo wɔ si ngɛ he ɔ, konɛ kɛ gu a nɔ ɔ, wa nyɛ nɛ waa yu wa he kɛ je he lo se dimi kɛ hɛ mi kpatami níhi nɛ ngɛ je ɔ mi ɔ a he, nɛ waa ngɔ e subai.

5 Se loko ji nyɛ nine maa su kikɛmɛ a nike ni nɛ ɔmɛ a nɔ ɔ, tsa pi hemi kɛ yemi kɛkɛ nɛ he hia nyɛ, e he hia kaa nyɛɛ pee nyɛ he nimli kpakpahi, nɛ lɔ ɔ hu pí. E he hia kaa nyɛɛ bɔ mɔde nɛ nyɛ hla nɛ nyɛɛ le nɔ́ nɛ e ngɛ nyɛ hlae nɛ nyɛ tsu. 6 Lɔ ɔ se ɔ, nyɛɛ bɔ mɔde nɛ nyɛɛ le nyɛ he nɔ hyɛmi. Nyɛ na tsui si tomi, nɛ nyɛɛ pee nyɛ he Mawu nimli, nɛ nyɛ ha Mawu nɛ e kudɔ nyɛ. 7 Nɛ enɛ ɔ ma ha nyɛ na adesa he suɔmi kpakpa. 8 Enɛ ɔmɛ ji níhi nɛ a he hia nyɛ. Ke nyɛ nine su a nɔ ɔ, nyɛ maa wa ngɛ mumi mi nɛ nyɛ maa wo yiblii, nɛ nyɛ he maa ba se nami kɛ ha wa Nutsɔ Yesu Kristo. 9 Nɔ tsuaa nɔ nɛ na we ni nɛ ɔmɛ kɛ piɛ we e hemi kɛ yemi he ɔ, e hɛ ngmɛ ywia saminya, aloo e nɛ ni kɛ yɛ lokoo, nɛ e hɛ je nɔ kaa Mawu je lɛ kɛ je e sa si himi yaya a mi, nɛ e sa kaa jehanɛ ɔ e hi si himi kpakpa kɛ ha Nutsɔ ɔ.

10 Lɔ ɔ he je ɔ, anyɛmimɛ, nyɛ tsu ni wawɛɛ nɛ nyɛ kɛ tsɔɔ kaa nyɛ piɛ nihi nɛ Mawu tsɛ nɛ e hla amɛ a he niinɛ, nɛ jehanɛ ɔ, nyɛ be si tɛe aloo nyɛ be si gbee. 11 Nɛ Mawu ma bli Hiɔwe agbo ɔmɛ gbajaa kɛ ha nyɛ nɛ nyɛɛ sɛ wa Nutsɔ kɛ Yiwamihelɔ Yesu Kristo neneene matsɛ yemi ɔ mi.

12 Nyɛ le kikɛmɛ a ni nɛ ɔmɛ momo, nɛ nyɛ ngɛ nɔ yae saminya bɔ nɛ sa, se i to nɛ ma hi nyɛ kaie ngɛ a he. 13 I susu kaa e sa nɛ ma hi nyɛ si hɛlie ngɛ munyu nɛ ɔmɛ a he be abɔ nɛ i ngɛ wami mi ɔ. 14 I le kaa e be kɛe nɛ i ma ngmɛɛ nɔmlɔ tso nɛ gboɔ nɛ ɔ he kaa bɔ nɛ wa Nutsɔ Yesu Kristo je kɛ tsɔɔ mi paa a. 15 I heɔ yeɔ kaa i ma gbla ni nɛ ɔmɛ a mi saminya kɛ ha nyɛ bɔ nɛ nyɛ ma kai mɛ be fɛɛ be ke i si je mi.

16 Munyuhi nɛ wa tu nyɛ ngɛ Nutsɔ Yesu Kristo he wami kɛ e bami ekohu ɔ he ɔ, a pi nyazia. Ami nitsɛ i na e agbo jemi kɛ anunyami ɔ kɛ ye hɛ ngmɛ. 17 Wa ngɛ lejɛ ɔ benɛ Tsɛ Mawu wo e hɛ mi nyami, nɛ anunyami gbi ko pɛ kɛ agbo jemi ke, "Ami nitsɛ ye suɔmi Bi ji nɛ ɔ nɛ, nɛ i naa e he bua jɔmi!" 18 Wɔ nitsɛmɛ wa nu gbi nɛ ɔ nɛ je hiɔwe benɛ waa kɛ lɛ ngɛ yoku klɔuklɔu ɔ nɔ ɔ.

19 Lɔ ɔ he je ɔ, wa na kaa munyu nɛ gbali ɔmɛ tu ɔ ba mi. Nɛ e maa hi kɛ ha nyɛ ke nyɛ maa hyɛ nɔ́ fɛɛ nɔ nɛ e ngma a mi fitsofitso ejakaa, kaa bɔ nɛ kane kpɛɔ kɛ yaa diblii mi kɔ nyahi ɔ, a munyu ɔmɛ yeɔ kɛ buaa wɔ nɛ waa nu níhi fuu nɛ jinɛ a he wa nɛ a wo wɔ diblii ɔ a sisi. Nɛ ke nyɛ susu gbali ɔmɛ a nyakpɛ anɔkuale munyu ɔmɛ a he ɔ, la a maa sɛ nyɛ mi nɛ Kristo nɛ ji Mɔtu Dodomi ɔ ma kpɛ ngɛ nyɛ tsui mi. 20 Nɛ ngɛ nɔ́ fɛɛ nɔ se ɔ, nyɛ kai kaa nɔ ko be nɛ lɛ nitsɛ e ma nyɛ tsɔɔ gbami munyu ngɛ Ngmami ɔ mi sisi ngɛ lɛ nitsɛ e suɔmi nya, 21 se Mumi Klɔuklɔu ɔ nɛ haa nɛ a tuɔ munyu nɛ je Mawu ngɔ ɔ nɛ.