1 Anyɛmimɛ nɛ a suɔ, enɛ ɔ ji womi enyɔne nɛ i ngɛ nyɛ ngmae. I ngma womi nɛ ɔmɛ nɛ ma kɛ kai nyɛ ngɛ níhi nɛ nyɛ le momo ɔ a he, 2 nɛ ji níhi nɛ nyɛ kase kɛ je gbali klɔuklɔu ɔmɛ a ngɔ, kɛ wɔ bɔfo ɔmɛ nɛ wa ngɔ wa Nutsɔ kɛ Yiwamihelɔ ɔ munyu ɔ kɛ ba ha nyɛ ɔ wa nya.

3 Kekleekle ɔ, i suɔ nɛ ma kai nyɛ kaa ngɛ nyagbe ligbi ɔmɛ a mi ɔ, he fɛu yeli maa ba nɛ a maa pee yayami tsuaa yayami nɛ a ma nyɛ, nɛ a maa ye anɔkuale ɔ he fɛu. 4 Nɔ́ nɛ a ma de ji, "Lɔ ɔ he je ɔ, Yesu wo si kaa e maa kpale kɛ ba, e ngɛ mi ja a lo? Ke ja a, jije e ngɛ? E be bae gblee! Mɛni he je? Ejakaa ke nyɛ ma kai ɔ, kɛ je benɛ wa tsɛmɛ gbo ɔ, nɔ́ fɛɛ nɔ ngɛ nɔ yae pɛpɛɛpɛ kaa bɔ nɛ a ngɛ kɛ je je ɔ sisije ɔ." 5 A je blɔ nɛ a si anɔkuale nɛ ɔ se kaa hiɔwe ngɛ kɛ je sisije, nɛ Mawu tu munyu nɛ zugba a ba bɔ ade kɛ je nyu mi, nɛ e ngɛ nyuhi a kpɛti. 6 Nɛ nyu nɔuu a kɛ puɛ je nɛ hi si momo ɔ. 7 Nɛ ngɛ jamɛ a munyu ɔ nɔuu nya a, a ngɔ hiɔwe kɛ zugba nɛ ngɛ piɔ ɔ kɛ to nɛ la ma kpata a hɛ mi ngɛ kojomi ligbi ɔ nɔ, be mi nɛ a ma kpata yayami peeli a hɛ mi ɔ.

8 Se anyɛmimɛ suɔli, nyɛ hɛ nɛ ko je nɔ kaa ligbi kake ngɛ kaa jeha akpe, nɛ jeha akpe ngɛ kaa ligbi kake ngɛ Nutsɔ ɔ hɛ mi. 9 Anɔkuale mi ɔ, pi se nɛ e ngɛ kpɛe ngɛ e bami ɔ mi, wɔ nɛ wa naa lɛ ja be komɛ. Se e ngɛ mlɛe, ejakaa e sume kaa nɔ ko hɛ mi nɛ kpata, lɔ ɔ he je ɔ, e ngɛ yayami peeli be hae nɛ a tsake. 10 Nutsɔ ɔ bami ligbi ɔ ma, nɛ nguane jemi be he. E maa ba tlukaa kaa julɔ, nɛ hiɔwe ma butu kɛ ngmlaa nɛ nya wa. A maa sa hiɔwe ní ɔmɛ kɛ la, nɛ zugba a kɛ nɔ́ fɛɛ nɔ nɛ ngɛ nɔ ɔ ma ngla.

11 Lɔ ɔ he je ɔ, nɛ níhi nɛ bɔle wɔ ɔ tsuo hɛ mi ma kpata a, lɛɛ e sa nɛ waa hi si himi nɛ he tsɔ nɛ waa pee wa he Mawu jali, 12 be mi nɛ wa ngɛ mlɛe nɛ wa ngɛ Mawu bami be ɔ blɔ hyɛe, ejakaa jamɛ a be ɔ mi nɛ Mawu maa ma hiɔwe ɔ he la, nɛ hiɔwe níhi kulaa a hɛ mi ma kpata ngɛ la mi. 13 Se wa ngɛ Mawu si womi ɔ blɔ hyɛe, kaa ngɛ ni nɛ ɔmɛ a se ɔ, hiɔwe he kɛ zugba he maa ba, nɛ dami sane yemi maa hi si.

14 Anyɛmimɛ suɔli, be mi nɛ wa ngɛ ní nɛ ɔmɛ kɛ a bami ɔ blɔ hyɛe ɔ, nyɛɛ bɔ mɔde nɛ nyɛɛ hi si nɛ nyɛ ko pee yayami; nɛ nyɛɛ kɛ nɔ tsuaa nɔ kpɛti nɛ hi saminya, bɔ nɛ pee nɛ ke e ba a, e na nyɛ he bua jɔmi.

15 Nyɛɛ ngɔ wa Nutsɔ ɔ tsui si tomi ɔ kaa he blɔ nɛ e ha nyɛ nɛ a kɛ he nyɛ yi wami. Wa nyɛminyumu Paulo, nɔ nɛ wa suɔ lɛ saminya a, de nyɛ enɛ ɔ be mi nɛ e ngma nyɛ womi kɛ juɛmi pɔtɛɛ ko nɛ a kɛ ke lɛ ɔ. 16 Be fɛɛ be ɔ, e ngmaa níhi kaa kikɛ ɔ ngɛ e womi ɔmɛ a mi. Munyu komɛ ngɛ e womi ɔmɛ a mi nɛ a sisi numi wa, nɛ e haa nɛ nihi nɛ a juɛmi nya wɛ ɔ, a tsakeɔ e munyu ɔmɛ a hɛ mi kaa bɔ nɛ a tsakeɔ Mawu Munyu ɔ ekomɛ ɔ, nɛ e ji hɛ mi kpatami kɛ ha mɛ nitsɛmɛ.

17 Anyɛmimɛ, i ngɛ nyɛ si woe loko be ɔ nɛ ba su, bɔ nɛ pee nɛ nyɛ hɛ nɛ hi nyɛ he nɔ, nɛ yi mi wali nɛ ɔmɛ a tɔmi ɔmɛ nɛ ko kpata nyɛ nane. 18 Se mohu nyɛɛ wa ngɛ mumi ɔ he wami ɔ mi, nɛ nyɛɛ le wa Nutsɔ kɛ Yiwamihelɔ Yesu Kristo ɔ saminya. Lɛ a ngɔ anunyami kɛ ha kɛ je be nɛ ɔ mi kɛ ya neneene! Amen.