1 Se jamɛ a be ɔ mi ɔ, lakpa gbali hu ngɛ ni ɔmɛ a kpɛti kaa bɔ nɛ nyangɔ tsɔɔli maa hi nyɛ kpɛti ɔ. A maa ngɔ nɔ́ puɛmi kɛ lakpa tsɔɔmihi kɛ ba ngɛ laami mi, nɛ a ma kua Nutsɔ nɛ kpɔ mɛ ɔ tete, nɛ lɔ ɔ a ma kɛ gbla hɛ mi kpatami kɛ ba mɛ nitsɛmɛ a nɔ tlukaa. 2 Nɛ nihi fuu maa nyɛɛ a basabasa nyɛɛmi ɔmɛ a se. Nɛ a ni peemi ni ɔmɛ a he je ɔ, nihi maa ye Kristo munyu ɔ he fɛu.

3 Tsɔɔli hɛ tsuli nɛ ɔmɛ ma de nyɛ nɔ́ ko kɛkɛ bɔ nɛ pee nɛ a nine nɛ su nyɛ sika nɔ. Se Mawu bu mɛ fɔ momo, nɛ a hɛ mi kpatami ngɛ blɔ nɔ kɛ ma. 4 Ejakaa bɔfo ɔmɛ tete nɛ pee yayami ɔ, Mawu kɛ pɛ mɛ, e muɔ mɛ kɛ wo hɛ mi kpatami mi, nɛ a wo mɛ kɔsɔkɔsɔ ngɛ muɔ nɛ mi wo diblii mi; nɛ a maa hi lejɛ ɔ kɛ ya si kojomi ligbi ɔ. 5 Mawu ngɔɛ blema bi ɔmɛ nɛ hi si loko ji nyu jemi ɔ ba a, a he kɛ pɛ mɛ, ja Noa nɔ nɛ fiɛ Mawu he sane kpakpa a, e kɛ e we bi kpaago ɔmɛ pɛ. Jamɛ a be ɔ mi ɔ, Mawu kpata nihi kulaa nɛ yi lɛ gbeye ɔ a hɛ mi kɛ nyu jemi ɔ ngɛ je ɔ mi tsuo. 6 Pee se ɔ, e kpata Sodom kɛ Gomora ma amɛ a hɛ mi butuu kɛ la, nɛ e ngɔ mɛ kɛ pee nɔ hyɛmi nɔ́ kɛ ha hwɔɔ se bimɛ nɛ be lɛ gbeye yee ɔ konɛ a na nɔ́ nɛ maa ba a nɔ.

7 E he Lot yi wami nɛ e je lɛ kɛ je Sodom, ejakaa e ji nɔmlɔ kpakpa, nɛ nihi nɛ li mlaa a, a yakayaka je mi bami haoɔ lɛ. 8 Jamɛ a nɔmlɔ kpakpa a hi si ngɛ a kpɛti, nɛ je fɛɛ je nɛ maa na a, e haoɔ, ejakaa e nuɔ, nɛ e naa a ni peemi ni yaya amɛ. 9 Lɔ ɔ he je ɔ, Nutsɔ ɔ le bɔ nɛ e ma kpɔ nihi nɛ yeɔ lɛ gbeye ɔ kɛ je a pimi ɔmɛ a mi, kɛ bɔ nɛ e maa hi yi mi walɔ ɔ tue gblae kɛ ya si kojomi ligbi ɔ. 10 Titli ɔ, nihi nɛ ngɔɔ a nɔmlɔ tso ɔ kɛ peeɔ yakayaka mu níhi nɛ a bui Mawu. Kikɛmɛ a tsɔɔli sisili nɛ ɔmɛ fĩaa kɛ tuɔ munyu. A be bumi ko kɛ ha anunyami bimɛ nɛ ngɛ hiɔwe, se jɛmi mohu nɛ a jɛɔ mɛ. 11 Bɔfo ɔmɛ tete ngɛ hiɔwe, nɛ a kle, nɛ a ngɛ he wami hluu pe tsɔɔli sisili nɛ ɔmɛ ɔ, a tui nɔ buimi munyu kɛ si we mɛ ngɛ Nutsɔ ɔ hɛ mi.

12 Se kikɛmɛ a nimli nɛ ɔmɛ be juɛmi, a peeɔ nɔ́ fɛɛ nɔ nɛ a susuu we he. A ngɛ kaa lohwe awi yeli nɛ a hɛ mi jɔɛ, nɛ a maa nu mɛ nɛ a gbe mɛ. Níhi nɛ a juɛmi sui he, nɛ a nui sisi ɔ peeɔ mɛ muɔ. A ma kpata a hɛ mi kaa lohwe awi yeli nɛ a hɛ mi jɔɛ.

13 Hiɔwo nɛ tsɔɔli nɛ ɔmɛ ma na ngɛ a yayami ɔmɛ a he ɔ ji enɛ ɔ nɛ. Ejakaa a naa bua jɔmi ngɛ yayami níhi a mi daa ligbi. A ji hɛ mi si puemi kɛ ha nyɛ, kɛ nimli nɛ maa wo nyɛ he mu. Be mi nɛ a ngɛ yayami pee ɔ, a sisiɔ nyɛ nɛ a kɛ nyɛ ba yeɔ ni kaa anɔkualetsɛmɛ. 14 Yakayaka yihi pɛ ji nihi nɛ a suɔ. Yayami peemi tɔɛ mɛ, nɛ a sisiɔ nihi nɛ a gbɔjɔ ɔmɛ. A kase he tsumi. A ji nihi nɛ Mawu gbiɛ mɛ! 15 A je blɔ dadɛ ɔ nɔ nɛ a laa blɔ. A gu blɔ nɛ Bosor bi Balaam gu ɔ, nɔ nɛ suɔ sika nɛ e ma na ngɛ yayami peemi mi ɔ. 16 Se a tsi Balaam nya ngɛ e kuasia blɔ nɛ e hia a he, benɛ e okpɔngɔ ɔ tu munyu kɛ nɔmlɔ gbi nɛ e kã e hɛ mi ɔ.

17 Nimli nɛ ɔmɛ a he be se nami, a ngɛ kaa pa nɛ nyu ta mi. Nɛ a ngɛ kaa bɔ kuu nɛ kɔɔhiɔ ngɛ lɛ fiae kɛ bee nɛ e be sida he. He nɛ a to kɛ ha mɛ ji muɔ voo nɛ mi wo diblii ɔ. 18 A fiaa kɛ he nɔ womi ngɛ a yayami kɛ kunimi yemi ɔ he, nɛ a guu he lo akɔnɔ níhi a nɔ kɛ mlɔɔ nihi nɛ a je si himi yaya a mi kɛ we ɔ kɛ ya woɔ yayami mi ekohu.

19 A deɔ ke, "Tsa pi kpakpa peemi he je nɛ a ma he o yi wami ngɛ, lɔ ɔ he je ɔ, o ma nyɛ pee yayami. Moo pee nɔ́ nɛ o suɔ."

Kikɛmɛ a tsɔɔli nɛ ɔmɛ de mɛ ke a maa ye a he kɛ je mlaa a dɛ mi, be mi nɛ mɛ nitsɛmɛ ɔ, yayami nyɔguɛhi ji mɛ. Ejakaa nɔ́ fɛɛ nɔ nɛ yeɔ nɔ ko nɔ ɔ, e yeɔ lɛ nyɔguɛ. 20 Nɛ ke ji nɔ ko le wa Nutsɔ kɛ Yiwamihelɔ Yesu Kristo, nɛ lɔ ɔ ha e je e he kɛ je je nɛ ɔ mi yi mi wami ni peemi ɔmɛ a mi, se e kpale ya sɛ yayami mi nɛ e pee e nyɔguɛ ekohu ɔ, e puɛɔ pe kekle ɔ po. 21 E maa hi ke ji e li Kristo kulaa, pe nɛ nɛ e le lɛ nɛ jehanɛ ɔ se ɔ, e plɛ e se kɛ wo kita klɔuklɔu ɔmɛ nɛ a kɛ ha lɛ ɔ. 22 E baa mi kɛ haa mɛ ja, kaa bɔ nɛ abɛ nɛ ɔ de ɔ ke, "Gbe kpaleɔ kɛ baa e vie he, nɛ ke a du kpotoo he ha lɛ ɔ, e kpaleɔ kɛ ya wuɔ mɔsɔ ekohu."