1 Paulo nɛ ji Yesu Kristo bɔfo nɛ Mawu tsɔ kaa e ya fiɛ kɛ tsɔɔ nyumuhi kɛ yihi tsuo ngɛ he fɛɛ he, nɛ e de mɛ neneene wami ɔ nɛ e wo mɛ he si kaa a nine maa su nɔ kɛ gu Yesu Kristo nɔ hemi kɛ yemi nɔ ɔ, 2 nɛ ngma e suɔmi bi Timoteo womi nɛ ɔ: Dloomi, mɔbɔ nami kɛ he jɔmi nɛ je Tsɛ Mawu kɛ wa Nutsɔ Kristo Yesu dɛ mi ɔ ha mo.

3 Timoteo, i naa Mawu si, nɛ i kpaa lɛ pɛɛ nyɔ kɛ pia si abɔ kaa e jɔɔ mo babauu. Lɛ ji ami kɛ ye tsɛmɛ a Mawu, nɛ e ji ye suɔmi kaa ma pee e suɔmi nya ni ngɛ ye wami si himi mi.

4 Nɛ ke i kai o hɛ mi vo ngu be mi nɛ wa mi ngɛ gbae ɔ, e peeɔ mi hɛ ja nɛ i hlaa kaa ma na mo ekohu nɛ ma na bua jɔmi.

5 I le kaa hemi kɛ yemi nɛ o nyɛ Eunike kɛ o na Loise ngɛ ngɛ Nutsɔ ɔ mi ɔ ngɛ mo hu o mi, nɛ i heɔ yeɔ kaa o hɛɛ mi lolo.

6 Enɛ ɔ he je ɔ, i ngɛ mo kaie kaa Mawu nɔ́ke nɔ ɔ nɛ sɛ o mi benɛ i wo ye nine ngɔ pue o nɔ nɛ i gbaa mo ɔ, o pɛtɛ he nɛ o ha nɛ e wa. 7 Ejakaa Mumi Klɔuklɔu ɔ nɛ ji Mawu nɔ́ke nɔ ɔ, hla we kaa o ye nimli gbeye, se mohu o na nile kɛ mumi mi he wami nɛ o kɛ suɔ mɛ ngɛ bua jɔmi si himi mi. 8 Nɛ ke o pɛtɛ mumi mi he wami nɛ ɔ he saminya a, o be gbeye yee kaa o maa ye wa Nutsɔ ɔ he odase kɛ tsɔɔ nihi aloo o ma de mɛ nɛ a le kaa a wo mi tsu ngɛ Kristo he mohu, se o huɛ ji mi. Nɛ o pee klaalo kaa o kɛ mi maa na nɔ́ kɛ ha Nutsɔ ɔ, ejakaa e maa wo mo he wami ngɛ nɔ nami ɔ mi.

9 Lɛ ji nɔ nɛ he wa yi wami nɛ e tsɛ wɔ kɛ ha e ni tsumi klɔuklɔu ɔ, pi ngɛ sami nɛ wa sa a he, se mohu ja a ji bɔ nɛ e to he blɔ nya loko ji a bɔ je ɔ, kaa e maa tsɔɔ wɔ e mɔbɔ nami kɛ e suɔmi ɔ kɛ gu Kristo nɔ. 10 Nɛ jehanɛ ɔ, e gu wa Yiwamihelɔ Yesu Kristo bami ɔ nɔ kɛ je e yi mi tomi nɛ ɔ tsuo kpo paa kɛ tsɔɔ wɔ. Lɛ ji nɔ nɛ ye gbenɔ he wami ɔ nɔ kunimi nɛ e tsɔɔ wɔ neneene wami nami blɔ kɛ gu e nɔ hemi kɛ yemi nɔ. 11 Enɛ ɔ he nɛ Mawu hla mi ngɛ kaa e munyu ɔ fiɛlɔ kɛ tsɔɔlɔ ha ma je li ɔmɛ.

12 Enɛ ɔ he je nɛ i ngɛ nɔ nami mi ngɛ tsu mi ngɛ hiɛ ɔ, nɛ e pee we mi zo, ejakaa i le nɔ nɛ nɔ nɛ i he ye. Nɛ i ngɛ he nɔ kami kaa e ma nyɛ bu nihi kulaa nɛ i to kɛ wo e dɛ mi ɔ he kɛ ya si be nɛ e maa kpale kɛ ba a.

13 Moo pɛtɛ anɔkuale ɔ nɛ i tsɔɔ mo ɔ he wawɛɛ, titli ɔ, hemi kɛ yemi kɛ suɔmi nɛ Kristo Yesu kɛ ha mo ɔ. 14 Nɛ o bu Mawu nɔ́ke nɔ kpakpa nɛ a to kɛ wo o dɛ mi ɔ he saminya. E ji nɔ́ke nɔ nɛ je Mumi Klɔuklɔu ɔ nɛ ngɛ o mi ɔ mi.

15 Kaa bɔ nɛ o le ɔ, Kristo se nyɛɛli ɔmɛ kulaa nɛ kɛ mi je Asia kɛ ba hiɛ ɔ, a si ami nɔ kake ngɛ hiɛ ɔ. Fegelo kɛ Hermogene po si mi. 16 Nutsɔ ɔ nɛ gbaa Onesiforo kɛ e we ɔ tsuo, ejakaa e pee we lɛ zo kaa a wo mi tsu mi se mohu e ba slaa mi kpitikpiti nɛ e woɔ mi kã. E slaami ɔmɛ ngɛ kaa kɔɔhiɔ nɛ mi jɔ nɛ sɛɛ ye mi, nɛ e haa mi he wami. 17 Anɔkuale ji kaa benɛ e ba Roma a, e bɔ mɔde nɛ e hla mi ngɛ he fɛɛ he kɛ ya si benɛ e na mi. 18 Nutsɔ ɔ nɛ gbaa lɛ kɛ gbaami pɔtɛɛ ko ngɛ Kristo kpalemi kɛ bami ligbi ɔ nɔ. Nɛ o le pe bɔ nɛ i ma nyɛ de mo, bɔ nɛ e ye kɛ bua mi ngɛ Efeso ha.