1 Oo ye bi Timoteo, o he nɛ wa ngɛ Kristo Yesu he wami ɔ nɛ e kɛ wo o mi ɔ nya. 2 Ejakaa o maa ye odase ngɛ níhi nɛ o kɛ ni kpa amɛ nu ngɛ ye nya a he. O tsɔɔ anɔkuale yeli ni ngua nɛ ɔmɛ konɛ mɛ hu a ya tsɔɔ ni kpahi.

3 Mo mia o hɛ mi kaa ami nɔuu ngɛ nɔ nami mi kaa Yesu Kristo ta hwulɔ kpakpa. 4 Nɛ kaa Kristo ta hwulɔ ɔ, o ko ha nɛ je nɛ ɔ mi níhi nɛ a puɛ o be. Ejakaa ke o pee ja a, o be tatsɛ ɔ hɛ mi nyɛe maa sa. 5 Moo ye Nutsɔ ɔ mlaa amɛ a nɔ ngɛ e ni tsumi ɔ mi, kaa bɔ nɛ fo malɔ yeɔ mlaahi a nɔ, aloo ke e yi nɔ ɔ, a jeɔ lɛ ngɛ mi nɛ e nine sui kunimi yemi nɔ ɔ. 6 Kaa bɔ nɛ ngmɔ hulɔ tsuɔ ni wawɛɛ nɛ e naa he se ɔ, mo hu mo tsu ni ja a nɔuu. 7 Mo susu nɔ́ nya tsɔɔmi etɛ nɛ ɔmɛ a he, nɛ Nutsɔ ɔ maa ye kɛ bua mo nɛ o nu a sisi bɔ nɛ a kɔɔ o he ha.

8 O hɛ nɛ ko je nɔ gblee kaa Yesu Kristo nɔ nɛ je Matsɛ David weku ɔ mi ɔ, nɔ nɛ gbo nɛ e te si ekohu kɛ je gbeje ɔ, Nɔmlɔ adesa kɛ Mawu ji lɛ. 9 Anɔkuale nɛ ɔmɛ a fiɛmi he je nɛ i ngɛ pimi mi ngɛ hiɛ ɔ nɛ, nɛ a wo mi tsu kaa awi yelɔ. Se a wui Mawu Munyu ɔ lɛɛ kɔsɔkɔsɔ, ami nɛ a wo. 10 Ma suɔ nɛ ma hi pimi mi hluu, ke lɔ ɔ ji nɔ́ nɛ ma ha nɛ ni nɛmɛ nɛ Mawu hla a, a nine maa su Kristo Yesu yi wami hemi kɛ neneene hɛ mi nyami ɔ nɔ.

11 Anɔkuale munyu nɛ woɔ mi bua ji kaa, ke wa na nɔ nɛ wa gbo kɛ ha Kristo ɔ, e tsɔɔ kaa waa kɛ lɛ ma ya hi si ngɛ hiɔwe. 12 Nɛ ke wa susu kaa e sɔmɔmi mwɔnɛ ɔ wa a, wa kai kaa waa kɛ lɛ ma ya hi si nɛ wa maa ye matsɛ ligbi ko. Ke wa mia we wa hɛ mi ngɛ nɔ nami mi se wa kpa ngɛ Kristo se ɔ, lɛ hu e ma kpa ngɛ wa se. 13 Ke wa gbede nɛ wa hemi kɛ yemi ta po ɔ, anɔkualetsɛ ji lɛ nɛ e maa ye kɛ bua wɔ, ejakaa e be nyɛe ma kua wɔ nihi nɛ wa ji lɛ nitsɛ e níhi ɔ.

14 Mo ha nɛ o ni ɔmɛ nɛ a le kikɛmɛ a anɔkuale nɛ ɔmɛ, nɛ o fa mɛ ngɛ Nutsɔ ɔ biɛ mi nɛ a ko sa nya ngɛ níhi nɛ a he be se nami he, ejakaa kikɛmɛ a nya sami nɛ ɔmɛ a he be se nami, a tsakaa nɔ juɛmi nɛ a yeɔ nɔ awi tete. 15 Mo tsu ni kɛ o he wami kulaa konɛ Mawu nɛ ha mo ayekoo. Moo pee o he ni tsulɔ kpakpa, nɔ nɛ zo be lɛ gbee ke Mawu ka o ni tsumi ɔ hyɛ ha. Moo le nɔ́ nɛ e munyu ɔ ngɛ dee kɛ nɔ́ nɛ e tsɔɔ. 16 Nɛ o yu o he kɛ je yakayaka ni sɛɛmi nɛ woɔ pɛ nɛ kɛ yayami nɛ ji mi mi fumi baa a he. 17 A maa tu munyu nɛ maa sã mo, nɛ e maa dɔ mo be kɛkɛɛ kaa bɔ nɛ Himeneo kɛ Fileto nɛ suɔ nya sami a ngɛ ɔ. 18 A ngmɛɛ anɔkuale blɔ ɔ he, nɛ a ngɛ lakpa fiɛmi fiɛe ke gbogboehi a si temi ɔ ba mi momo, nɛ a kɛ gbɔjɔ ni komɛ nɛ bu mɛ tue ɔ a hemi kɛ yemi.

19 Se Mawu anɔkuale ɔ maa si kpɛii kaa tɛ, nɛ nɔ ko be lɛ nyɛe ma huanya. E ji sisi tomi tɛ nɛ a ngma ngɛ nɔ ke, "Nutsɔ ɔ le lɛ nitsɛ e ni ɔmɛ," nɛ, "Nɔ nɛ tsɛɔ e he Kristo se nyɛɛlɔ, e ko pee níhi nɛ dɛ blɔ."

20 Tsa pi sika tsu níhi kɛ sika hiɔ nihi kɛkɛ nɛ ngɛ sikatsɛ we mi, se mohu tso kɛ zu níhi hu ngɛ. Níhi nɛ a he jua wa a, a kɛ hyɛɔ nibwɔhi a nɔ, nɛ níhi nɛ a he jua wɛ ɔ, a tsuɔ a he ni ngɛ la tɛ kpata mi aloo a kɛ dwɔmi woɔ a mi. 21 Ke o je o he kɛ je yayami mi ɔ, o ma plɛ sika tsu ni nɛ ɔmɛ eko nɛ a buu ngɛ we mi, nɛ Kristo nitsɛ maa ngɔ mo kɛ ha e ni tsumi kpakpa.

22 Moo ma nɔ nɛ haa nihewi juɛmi yaya a nya fo, nɛ o pɛtɛ nɔ nɛ tsɔɔ mo kpakpa peemi blɔ ɔ he. Mo na suɔmi kɛ hemi kɛ yemi, nɛ o kɛ nihi nɛ suɔ Nutsɔ ɔ, nɛ a ngɛ tsui nɛ mi tsɔ ɔ nɛ bɔ.

23 I ngɛ mo dee ekohu ke, o kɛ o he nɛ ko wo yakayaka nya sami nɛ kɛ mi mi fumi baa a mi. 24 E sɛ kaa Mawu bimɛ peeɔ a he pɛli, se mohu a pee a he kpoo nɛ a kɛ tsui si tomi nɛ tsɔɔ nihi nɛ ngɛ tɔe ɔ ni. 25 Nɛ ke o ngɛ nihi nɛ hɛɛ juɛmi kpa ni tsɔɔe ɔ, ba o he si ha mɛ, ejakaa ngɛ Mawu yemi kɛ buami nya a, ke o kɛ mɛ tu munyu ngɛ he si bami kɛ bumi mi ɔ, a ma tsake a tsui nɛ a ma he anɔkuale ɔ ye. 26 Kɛkɛ a maa nu a he lo sisi nɛ a maa je Abosiami nyɔguɛ yemi klama a mi, nɔ́ nɛ e kɛ nuu mɛ be nɛ e suɔ ɔ. Kɛkɛ ɔ, a maa pee Mawu suɔmi nya ni jehanɛ.