1 Jehanɛ ɔ, ngɛ wa Nutsɔ Yesu Kristo bami ɔ kɛ wa he nya buami nɛ wa ma kɛ ya kpee lɛ ɔ he ɔ, wa kpa nyɛ pɛɛ, mamimɛ nɛ a suɔ, 2 nyɛ juɛmi nɛ ko futu nɛ nyɛ jijaa, kaa be ɔ ba momo. Ke a de nyɛ ke a na ni nami ko loo sɛ titli ko kɛ je Mawu ngɔ, loo womihi kɛ je ye ngɔ ngɛ be nɛ ɔ he ɔ, nyɛ ko he nɛ nyɛɛ ye. 3 Nyɛ ko ha nɛ a sisi nyɛ ngɛ enɛ ɔ he. Ejakaa ja níhi enyɔ ba mi lolo loko ji jamɛ a be ɔ maa su. Kekle nɔ́ ji, be maa ba nɛ a maa te si wawɛɛ kɛ si Mawu, nɛ jehanɛ ɔ, atuã tsɔlɔ nɛ ji hɛ mi kpatami bi ɔ maa ba. 4 E maa te si kɛ wo mawu fɛɛ mawu, nɛ e maa ku wɔ jami níhi. E ma ya hi Mawu we ɔ, nɛ e maa ngɔ e he kaa lɛ ji Mawu. 5 Anɛ nyɛ kai we kaa benɛ i kɛ nyɛ ngɛ ɔ, i de nyɛ enɛ ɔ lo? 6 Jehanɛ ɔ hu nyɛ le nɔ́ nɛ ngɛ e nya tsie nɛ e bɛ hiɛ ɔ lolo. Ejakaa ja e be ɔ su loko ji e maa ba.

7 Se yi mi wami ni tsumi nɛ atuã tsɔlɔ nɛ ɔ ma ba tsu ɔ ngɛ nɔ yae momo ngɛ laami mi, nɛ lɛ nitsɛ lɛɛ e be bae, ja nɔ́ nɛ ngɛ lɛ blɔ tsie ɔ je e blɔ mi. 8 Lɔ ɔ loko ji yi kpɛti walɔ nɛ ɔ maa je kpo, nɛ mumi nɛ maa je Nutsɔ Yesu nya mi ɔ ma ngla lɛ, nɛ e hɛ mi kpɛmi ɔ ma kpata e hɛ mi. 9 Yayami bi nɛ ɔ maa ba kɛ Abosiami he wami nɛ e ba sisi nɔ tsuaa nɔ kɛ lakpa okadi kɛ nyakpɛ níhi. 10 Nɛ e maa sisi nihi nɛ a hɛ mi ma kpata amɛ wawɛɛ, ejakaa a he we anɔkuale munyu ɔ nɛ a ye konɛ a he a yi wami. 11 Lɔ ɔ he je ɔ, Mawu ma ha he blɔ nɛ a he lakpa munyu ɔ nɛ a ye kɛ a tsui kulaa; 12 nɛ a maa kojo mɛ kulaa ngɛ lakpa munyu ɔ nɛ a he ye nɛ a kua nɔ́ nɛ ji Anɔkuale ɔ, nɛ a naa yayami peemi he tsui ɔ.

13 Mamimɛ nɛ Nutsɔ ɔ suɔ, wɔɔ lɛɛ e sa kaa waa na Mawu si daa kɛ ha nyɛ, ejakaa Mawu hla nyɛ kɛ je sisije ngɛ nyɛ yi wami hemi he, nɛ e tsukɔ nyɛ he kɛ gu Mumi Klɔuklɔu ɔ ni tsumi kɛ Anɔkuale ɔ nɛ nyɛ he ye ɔ mi. 14 E tsɔɔ nyɛ Manye Munyu ɔ kɛ gu wa nɔ, nɛ e tsɛ nyɛ konɛ nyɛ na Nutsɔ Yesu anunyami ɔ eko.

15 Mamimɛ nɛ a suɔ, ngɛ enɛ ɔmɛ kulaa a he je ɔ, nyɛɛ da si kpɛii, nɛ nyɛɛ pɛtɛ Anɔkuale ɔ he, nɔ́ nɛ wa tsɔɔ nyɛ kɛ gu womihi nɛ wa ngma nyɛ benɛ waa kɛ nyɛ ngɛ ɔ.

16 Wa Nutsɔ Yesu Kristo nitsɛ kɛ wa Tsɛ Mawu, nɔ nɛ suɔ wɔ nɛ e kɛ neneene bua jɔmi kɛ hɛ nɔ kami ha wɔ ngɛ e dloomi ɔ nya a, 17 e wo nyɛ bua nɛ e ye kɛ bua nyɛ ngɛ munyu kpakpa tumi kɛ ni tsumi kpakpa tsumi kulaa mi.