1 Paulo kɛ Sila kɛ Timoteo nɛ ngma womi nɛ ɔ kɛ ya ha Tesalonika asafo ɔ nɛ wa Tsɛ Mawu kɛ Nutsɔ Yesu Kristo ngɛ e yi baae ɔ.

2 Dloomi kɛ he jɔmi nɛ je Tsɛ Mawu kɛ wa Nutsɔ Yesu Kristo dɛ mi ɔ ha nyɛ.

3 Mamimɛ nɛ a suɔ, e sa kaa waa na Mawu si daa kɛ ha nyɛ, nɛ e ji wa blɔ nya ni tsumi kɛ ha Mawu, ngɛ nyakpɛ blɔ nɔ nɛ nyɛ hemi kɛ yemi gu kɛ wa a, kɛ suɔmi nɛ nyɛ na kɛ ha nyɛ si bi ɔ. 4 Wa na bua jɔmi nɛ wa deɔ asafo kpa amɛ tsui si tomi nɛ nyɛ ngɛ, kɛ hemi kɛ yemi nɛ nyɛ na ngɛ Mawu mi ɔ, tse be ɔ, nyɛ ngɛ haomi kɛ he hiami mi. 5 Blɔhi a nɔ nɛ Mawu guu kɛ tsuɔ e ni ɔmɛ a ti kake ji enɛ ɔ nɛ, ejakaa e ngɛ nyɛ haomi ɔmɛ a nɔ gue kɛ dla nyɛ kɛ ha e hiɔwe matsɛ yemi ɔ, 6 nɛ ja a nɔuu kɛ̃ e ngɛ kojomi kɛ tue gblami dlae kɛ to nihi nɛ ngɛ nyɛ yi mi wae ɔ.

7 Lɔ ɔ he je ɔ, i ngɛ nyɛ ni nɛmɛ nɛ ngɛ nɔ nae ɔ dee ke, Mawu ma ha waa kɛ nyɛ tsuo he jɔɔmi, benɛ Nutsɔ Yesu ma pue tlukaa kɛ je hiɔwe ngɛ la nɛ ngɛ tsoe ɔ mi kɛ e bɔfo ngua amɛ. 8 Nɛ e ma ba kojo nihi nɛ hla we kaa a maa le Mawu, kɛ nihi nɛ kua e blɔ nya tomi nɛ e ma kɛ he a yi wami kɛ gu wa Nutsɔ Yesu Kristo nɔ ɔ. 9 A ma kpata a hɛ mi nɛ a kɛ Nutsɔ ɔ kpɛti ma gba kɛ ya neneene, nɛ a be e anunyami he wami ɔ nae, 10 be mi nɛ e maa ba nɛ a wo e hɛ mi nyami ngɛ níhi kulaa nɛ e pee kɛ ha e ni klɔuklɔu ɔmɛ ɔ. Nɛ nyɛ hu nyɛ maa piɛ nihi nɛ ma je e yi ɔmɛ a he, ejakaa nyɛ he nɔ́ nɛ wa de nyɛ ngɛ e he ɔ ye.

11 Lɔ ɔ he je ɔ, wa sɔleɔ daa kɛ haa nyɛ konɛ wa Mawu ɔ nɛ pee nyɛ bimɛ nɛ e suɔ, nɛ e ha nyɛɛ hi kɛ pi si kaa bɔ nɛ nyɛ ngɛ hlae ɔ, nɛ e ha nyɛ e he wami ɔ ngɛ nyɛ hemi kɛ yemi ɔ nya. 12 Kɛkɛ ɔ, nɔ tsuaa nɔ ma bɔni Nutsɔ Yesu Kristo biɛ ɔ yi jemi ngɛ yiblii nɛ nyɛ wo ɔ he je, nɛ nyɛ hu nyɛ hɛ mi nɛ maa ba nyami pe kulaa ji kaa e nihi ji nyɛ. Enɛ ɔ tsuo maa ba mi ngɛ wa Mawu ɔ kɛ wa Nutsɔ Yesu Kristo mɔbɔ nami ɔ nya.