1 Mɛni be kulaa nɛ nɔ́ nɛ ɔmɛ maa ba mi?

Mamimɛ, e hia we nɛ ma de nyɛ nɔ́ ko ngɛ enɛ ɔ he, 2 nyɛ le kaa nɔ ko li. Ejakaa Nutsɔ ɔ ligbi ɔ maa ba tlukaa kaa julɔ baa nyɔ mi ɔ. 3 Jamɛ a be ɔ mi ɔ, nihi maa hi dee ke, "Nɔ́ tsuaa nɔ ngɛ nɔ yae pɛpɛɛpɛ, tue mi jɔmi kɛ he jɔmi ngɛ." Kɛkɛ ɔ, si kake too ɔ, hɛ mi kpatami maa ba a nɔ tlukaa kaa bɔ nɛ kɔɔmi tuaa yohɔlɔ loko e fɔɔ ɔ. Nɛ a be mi jee gbleegbleegblee, ejakaa he ko be nɛ a ma ya laa ngɛ.

4 Se mamimɛ nɛ a suɔ, a wui nyɛ diblii mi ngɛ nɔ́ nɛ ɔmɛ a mi, nɛ nyɛ nya be nyɛ he kpɛe ke Nutsɔ ɔ bami ligbi ɔ ba ti nyɛ si tlukaa kaa julɔ ɔ. 5 Ejakaa la kɛ piani bimɛ ji nyɛ tsuo, nɛ nyɛ pi diblii kɛ nyɔ bimɛ. 6 Lɔ ɔ he je ɔ, nyɛɛ pee klaalo. Nyɛ ko hwɔ mahe kaa ni kpa amɛ, nɛ nyɛɛ hi si ngɛ kpoo peemi mi kɛ hyɛ e bami ɔ blɔ. 7 Nyɔ mi ji be nɛ a hwɔɔ mahe kɛ be nɛ nihi dee da. 8 Se nyɛ ha nɛ wɔ nɛ wa ji la bimɛ ɔ, waa hi si ngɛ kpoo peemi kɛ he si bami mi nɛ waa kɛ hemi kɛ yemi kɛ suɔmi nɛ bu wa he, nɛ wa na hɛ nɔ kami kɛ ha wa yi wami hemi.

9 Ejakaa Mawu tsɛ we wɔ nɛ e na wa he abofu, se mohu nɛ e he wa yi wami kɛ gu wa Nutsɔ Yesu Kristo nɔ. 10 E gbo ha wɔ konɛ ke wa gbo jio, wa hɛ ngɛ jio, waa kɛ lɛ nɛ hi si daa. 11 Lɔ ɔ he je ɔ, nyɛɛ wo nyɛ bi he wami nɛ nyɛɛ ye kɛ bua nyɛ he nɛ nyɛɛ wa kaa bɔ nɛ nyɛ ngɛ pee ɔ.

12 Mamimɛ nɛ a suɔ, nyɛɛ bu asafo nikɔtɔma amɛ nɛ ngɛ nyɛ he dengme gboe, nɛ a bɔɔ nyɛ yayami peemi he kɔkɔ ɔ. 13 Nyɛɛ bu mɛ saminya, nɛ nyɛɛ suɔ mɛ kɛ nyɛ tsui mi kulaa, ejakaa a ngɛ nyɛ kaie kaa nyɛ ko pɛ.

14 Mamimɛ nɛ a suɔ, nyɛɛ tu munyu kɛ tsɔɔ hejɔtsɛ ɔmɛ, nɛ nyɛɛ wo nihi nɛ yee gbeye ɔmɛ he wami. Nyɛɛ ye kɛ bua nihi nɛ gbɔjɔ ɔmɛ; nɛ nyɛɛ to nyɛ tsui si kɛ ha nɔ tsuaa nɔ. 15 Nyɛɛ hyɛ nɛ nɔ ko kɛ yayami nɛ kó to yayami nane mi. Se mohu nyɛɛ bɔ mɔde nɛ nyɛɛ pee kpakpa kɛ ha nyɛ he kɛ nɔ tsua nɔ be fɛɛ be. 16 Nyɛ bua nɛ jɔ nyɛ he be fɛɛ be. 17 Nyɛɛ sɔle daa nɛ nyɛ ko jɔɔ. 18 Bɔ fɛɛ bɔ nɛ e ji ha a, nyɛɛ na Mawu si daa ngɛ nɔ́ fɛɛ nɔ he, ejakaa e ji Mawu suɔmi nya nɔ́ kaa nyɛ nɛ nyɛ ji Kristo Yesu níhi ɔ nyɛɛ pee ja.

19 Nyɛ ko wo Mumi Klɔuklɔu ɔ he mu, 20 nɛ nyɛ ko ye gbali a he fɛu. 21 Se mohu, nyɛɛ ka nɔ́ tsuaa nɔ nɛ a de ɔ nɛ nyɛɛ hyɛ ha kaa e ji anɔkuale loko ji nyɛ he nɛ nyɛɛ ye. 22 Nyɛɛ yu nyɛ he kɛ je yayami fɛɛ yayami he. 23 He jɔmi Mawu ɔ nitsɛ nɛ tsukɔ nyɛ he kɛ pi si, nɛ e to nyɛ mumi kɛ nyɛ klaa kɛ nyɛ nɔmlɔ tso kulaa nɛ piami ko nɛ kó hi he kɛ ya si wa Nutsɔ Yesu Kristo bami be ɔ. 24 Mawu, nɔ nɛ tsɛ nyɛ nɛ e pee nyɛ e bimɛ ɔ, maa pee enɛ ɔ tsuo ha nyɛ kaa bɔ nɛ e wo he si ɔ. 25 Nyɛmimɛ nɛ a suɔ, nyɛɛ sɔle kɛ ha wɔ. 26 Nyɛ nga nyɛmimɛ ɔmɛ tsuo nɛ ngɛ lejɛ ɔ ha mi. 27 I ngɛ nyɛ fãe ngɛ Nutsɔ ɔ biɛ mi kaa nyɛɛ kane womi nɛ ɔ kɛ ha Kristo se nyɛɛli ɔmɛ tsuo. 28 Wa Nutsɔ Yesu Kristo dloomi babauu ɔ kɛ nyɛ ti nɔ tsuaa nɔ nɛ hi si.