1 Paulo kɛ Sila kɛ Timoteo nɛ ngma womi nɛ ɔ kɛ ya ha Tesalonika asafo nɛ ji Tsɛ Mawu kɛ Nutsɔ Yesu Kristo ni ɔmɛ ɔ. Dloomi kɛ he jɔmi nɛ ji nike ni nɛ je wa Tsɛ Mawu kɛ Nutsɔ Yesu Kristo dɛ mi ɔ ha nyɛ.

2 Wa naa Mawu si daa ngɛ nyɛ he, nɛ wa sɔleɔ kɛ haa nyɛ be fɛɛ be. 3 Wa kai nyɛ suɔmi ni peemi ni kpakpa amɛ ngɛ wa sɔlemi mi, kɛ nyɛ hemi kɛ yemi nɛ nyɛ kɛ ngɛ wa Nutsɔ Yesu blɔ hyɛe ɔ.

4 Nyɛmimɛ nɛ a suɔ ngɛ Mawu mi, wa le kaa Mawu nɛ hla nyɛ, 5 ejakaa Manye Munyu ɔ nɛ wa kɛ ba nyɛ ngɔ ɔ, e pi ni sɛɛmi gu kɛkɛ ha nyɛ, se mohu nyɛ bu tue kɛ bua jɔmi babauu. Nɛ e wo yiblii ngɛ nyɛ mi, ejakaa Mumi Klɔuklɔu ɔ ma nɔ mi kaa nɔ́ nɛ wa de nyɛ ɔ, e ji anɔkuale munyu. Nɛ nyɛ le bɔ nɛ wa je mi bami hu ye wa munyu ɔ he odase kɛ ha nyɛ ha. 6 Enɛ ɔ he je ɔ, nyɛ plɛ waa kɛ Nutsɔ ɔ kaseli, ejakaa nyɛ he munyu ɔ atuu kɛ Mumi Klɔuklɔu ɔ mi bua jɔmi nɛ nyɛ na a, tse be ɔ, nyɛ ná kahi kɛ aywilɛho yemi tete kɛ je mi.

7 Nɛ nyɛ nitsɛmɛ nyɛ plɛ nɔ hyɛmi nɔ kɛ ha Kristo se nyɛɛli tsuo nɛ ngɛ Makedonia kɛ Akaia a. 8 Amlɔ nɛ ɔ, e ha nɛ Nutsɔ ɔ munyu ɔ je nyɛ ngɔ nɛ e gbɛ fia, pi ngɛ Makedonia kɛ Akaia kɛkɛ, se mohu e jije kɛ ho lokoo ya, ejakaa he fɛɛ he nɛ wa ya a, a de wɔ hemi kɛ yemi nɛ nyɛ na ngɛ Mawu mi ɔ, nɛ e hia we wɔ fiɛmi ko hu, 9 ejakaa mɛ nitsɛmɛ a de wɔ bɔ nɛ nyɛ pee wɔ nubwɔ ha, kɛ bɔ nɛ nyɛ kpale ngɛ nyɛ wɔ ɔmɛ a se kɛ ba Mawu ngɔ, nɛ jehanɛ ɔ anɔkuale Mawu hɛ kalɔ ɔ pɛ ji nyɛ Nutsɔ. 10 Nɛ nyɛ ngɛ Mawu Bi nɛ ji Yesu nɛ e tle lɛ si kɛ je gbeje ɔ e bami ekohu ɔ blɔ hyɛe kɛ je hiɔwe. Lɛ ji nɔ nɛ ma je wɔ kɛ je Mawu mi mi nɛ fu wɔ ngɛ wa yayami ɔmɛ a he ɔ mi.