1 Nyɛ nutsɔ ɔmɛ, nyɛɛ pee nɔ́ nɛ da kɛ nɔ́ nɛ sa kɛ ha nyɛ sɔmɔli ɔmɛ, nɛ nyɛ kai be fɛɛ be kaa nyɛ hu nyɛ ngɛ Nutsɔ ngɛ Hiɔwe nɛ ngɛ nyɛ hyɛe.

2 Pɔ nɛ ko tɔ nyɛ he kɛ sɔlemi; nyɛɛ sɔle daa nɛ nyɛɛ fɔ nyɔ ngɛ he. Nyɛɛ hyɛ Mawu heto nɛ maa ba a blɔ, nɛ nyɛɛ na lɛ si ngɛ he. 3 Nyɛɛ sɔle kɛ ha wɔ hu konɛ Mawu nɛ ha wɔ he blɔ nɛ wa kɛ fiɛ Kristo Manye Munyu ɔ, nɔ́ he nɛ a wo mi tsu mi ngɛ hiɛ ɔ. 4 Nyɛɛ sɔle nɛ ma na kã kɛ fiɛ munyu ɔ paa kɛ faii bɔ nɛ sa.

5 Nyɛɛ nyɛɛ ngɛ ni lemi nya, ngɛ nihi nɛ he we yi ɔmɛ a he, nɛ nyɛ tsu nyɛ deka he ni kɛ fiɛ Manye Munyu ɔ kɛ tsɔɔ ni kpahi. 6 Nyɛ ha nɛ nyɛ munyu he nɛ tsɔ, bɔ nɛ pee nɛ nyɛ munyuhi a heto hami nɛ da kɛ ha nɔ tsuaa nɔ.

7 Tihiko, wa suɔlɔ kɛ sɔmɔlɔ kpakpa ngɛ Nutsɔ ɔ mi ɔ, maa bɔ nyɛ bɔ nɛ i ngɛ nɔ yae ha. E tsuɔ ni wawɛɛ nɛ e kɛ mi sɔmɔɔ Nutsɔ ɔ. 8 I je blɔ tsɔ lɛ nyɛ ngɔ nɛ e ba hyɛ bɔ nɛ nyɛ ngɛ ha konɛ e wo nyɛ bua kɛ he wami. 9 I ngɛ Onesimo, anɔkualetsɛ kɛ wa suɔlɔ nyɛmi nɛ je nyɛ kpɛti ɔ hu tsɔe. E kɛ Tihiko maa bɔ nyɛ wa hiɛ ɔ amaniɛ tsuo.

10 Aristarko, nɔ nɛ a wo lɛ hu tsu mi ngɛ hiɛ ɔ kɛ Marko nɛ ji Barnaba weku no ɔ ke a biɔ nyɛ. Nɛ kaa bɔ nɛ i de nyɛ momo ɔ, ke Marko ba nyɛ ngɔ ɔ, nyɛ he lɛ atuu. 11 Yesu Yusto hu ke e biɔ nyɛ. Ni nɛ ɔmɛ pɛ ji Yuda bi Kristo se nyɛɛli nɛ a kɛ mi ngɛ ni tsue ngɛ hiɛ ɔ, nɛ a haa mi bua jɔmi saminya.

12 Epafra nɛ ji Kristo Yesu sɔmɔlɔ nɛ je nyɛ ma a mi ɔ ke e biɔ nyɛ. E sɔleɔ kɛ haa nyɛ daa ngɛ anɔkuale mi nɛ e biɔ Mawu nɛ e ha nyɛ he wami nɛ nyɛɛ hi kɛ pi si, nɛ e ye kɛ bua nyɛ nɛ nyɛɛ le e suɔmi nya ni ngɛ nɔ́ tsuaa nɔ mi. 13 I ngɛ e he odase yee kaa e gboɔ dengme ngɛ nyɛ kɛ Kristo se nyɛɛli nɛ ngɛ Laodikea kɛ Hierapoli ɔmɛ a he ngɛ e sɔlemihi a mi.

14 Luka, tsopatsɛ nɛ a suɔ lɛ ɔ, kɛ Dema ke a biɔ nyɛ.

15 I biɔ Kristo se nyɛɛli nɛ ngɛ Laodikea a, kɛ Nimfa kɛ asafo nɛ kpee ngɛ e we ɔ mi ɔ. 16 Ke nyɛ kane womi nɛ ɔ, nyɛ ha nɛ a kane ngɛ Laodikea asafo ɔ mi hulɔ; nɛ nyɛ hu nyɛɛ kane Laodikea bi ɔmɛ a womi ɔ nɛ i ngma mɛ ɔ. 17 Nɛ nyɛ de Arkipo ke, "Hyɛ nɛ o tsu ni tsumi fɛɛ ni tsumi nɛ Nutsɔ ɔ ngɔ wo o dɛ ɔ."

18 Ami Paulo nitsɛ ye nine nya womi nɛ i kɛ ngɛ nyɛ ngae ji nɛ ɔ nɛ. Nyɛ kai mi ngɛ tsu ɔ mi ngɛ hiɛ ɔ. Mawu dloomi ɔ kɛ nyɛ nɛ hi si.