1 Akɛnɛ nyɛ ba wami mi ekohu ngɛ Kristo nɛ a tle si ke je gbeje he je ɔ, nyɛɛ ngɔ nyɛ he kɛ fɔ hiɔwe ni kpakpa amɛ kɛ bua jɔmi ɔ nɔ, he nɛ Kristo hii si kɛ agbo jemi kɛ he wami ngɛ Mawu hiɔ nine nɔ ngɛ ɔ. 2 Nyɛ susu níhi nɛ ngɛ Hiɔwe ɔmɛ a he, pi níhi nɛ ngɛ zugba a nɔ. 3 Je nɛ ɔ mi níhi nɛ ko pee nyɛ akɔnɔ hu, kaa bɔ nɛ nɔ gbogboe susuu we nɔ ko he hu ɔ; ejakaa nyɛ si himi nitsɛ ɔ ngɛ hiɔwe ngɛ Kristo kɛ Mawu ngɔ. 4 Nɛ benɛ Kristo, nɔ nɛ ji wa wami nitsɛ ɔ maa ba ekohu ɔ, nyɛɛ kɛ lɛ tsuo ma pue ngɛ e anunyami ɔ mi.

5 Enɛ ɔ he je ɔ, nyɛɛ ngmɛɛ zugba nɛ ɔ nɔ níhi nɛ ji yayami ɔ he; yayami nihi nɛ ji gbenɔ nɛ ngɛ nyɛ mi ɔ, ajuama bɔmi, mu ni tsumi, mi mi la, akɔnɔ yaya kɛ zo ni tsumihi; nyɛ ko sɔmɔ je nɛ ɔ mi ni kpakpa amɛ, ejakaa a ji wɔ jami. 6 Mawu mi mi fumi baa nihi nɛ tsuɔ ni nɛ ɔmɛ a nɔ. 7 Nyɛ peeɔ nɔ́ nɛ ɔmɛ benɛ nyɛ ngɛ nihi nɛ peeɔ jamɛ a ni nɛ ɔmɛ a kpɛti ɔ. 8 Se piɔ ji be nɛ sa kaa nyɛ sake ni yaya nɛ ɔmɛ kulaa kɛ pue he; níhi nɛ ji muklii mi fumi, ninyɛ, nɔ gbiɛmi kɛ munyu nɛ he tsɔ we tumi.

9 Nyɛ ko ye lakpa kɛ si nyɛ bi, ejakaa nyɛ je nyɛ su momo ɔ kɛ e ni peemi yaya amɛ ngɔ pue he nɛ e gbo. 10 Nyɛ plɛ nimli hehi nɛ ngɛ mɔde bɔe be fɛɛ be, nɛ nyɛɛ kase nɔ́ nɛ da, nɛ nyɛɛ hi kaa Kristo nɔ nɛ bɔ kikɛmɛ a nɔmlɔ he nɛ ɔ ngɛ nyɛ mi ɔ. 11 Ngɛ nɔmlɔ he nɛ ɔ mi ɔ, ma je no loo he kpa no nɛ nɔ ko ji, womi lelɔ loo blɔ nya nɛ nɔ ko hɛɛ he hia we. Nɔ́ nɛ he hia ji kaa nɔ ko le Kristo, nɛ Kristo ɔ ngɛ kɛ ha wɔ tsuo.

12 Akɛnɛ Mawu hla nyɛ, nɛ e pee nyɛ nimli hehi ngɛ suɔmi agbo nɛ e ngɛ kɛ ha nyɛ he je ɔ, nyɛ na mi mi jɔmi, mɔbɔ nami, he si bami, kpoo peemi kɛ tsui si tomi kɛ ha ni kpahi hu. E he hia we kaa nyɛ je nyɛ he si nɛ a na nyɛ, se nyɛɛ na nɔ́ ngɛ a he ngɛ kpoo peemi kɛ tsui si tomi mi. 13 Ke sane ko ba nyɛ kpɛti ɔ, nyɛ na tsui ha nyɛ si bi nɛ nyɛ kɛ pa nyɛ he. Kaa bɔ nɛ Nutsɔ ɔ kɛ pa nyɛ ɔ, ja a nɔuu nyɛ hu nyɛɛ ngɔ kɛ pa nyɛ si bi.

14 Se titli ɔ, nyɛ ha nɛ suɔmi nɛ fiɔ asafo mluku ɔ kulaa kɛ peeɔ kake ɔ nɛ kpaka nyɛ. 15 Nyɛ ha Kristo he jɔmi ɔ nɛ hi nyɛ tsui mi, ejakaa enɛ ɔ he nɛ a tsɛ nyɛ kɛ ba ngɛ kaa e Nɔmlɔ tso ɔ he níhi, nɛ nyɛɛ le si nami daa kɛ daa.

16 Nyɛ kai nihi nɛ Kristo tsɔɔ ɔ, nɛ nyɛ ha e munyu ɔmɛ a tsake nyɛ si himi mi nɛ nyɛɛ le ni, nɛ nyɛɛ tsɔɔ nyɛ he ni, nɛ nyɛ la yi jemi kɛ mumi mi lahi nɛ nyɛ kɛ je Mawu yi ngɛ nyɛ tsui mi. 17 Nɛ nɔ́ fɛɛ nɔ nɛ nyɛ ma de aloo nyɛ maa pee ɔ, nyɛɛ pee kulaa ngɛ Nutsɔ Yesu Kristo biɛ mi, nɛ nyɛɛ gu e nɔ kɛ na Mawu nɛ ji Tsɛ ɔ si.

18 Nyɛ yigbayi ɔmɛ, nyɛɛ ba nyɛ he si kɛ ha nyɛ huno ɔmɛ, ejakaa ja a ji bɔ nɛ Nutsɔ ɔ to kɛ ha nyɛ. 19 Nɛ nyɛ huno ɔmɛ, nyɛɛ suɔ nyɛ yi ɔmɛ nɛ nyɛ mi mi nɛ jɔ ha mɛ, nyɛ mi mi nɛ ko wo la kɛ wo mɛ, nɛ nyɛ ko wa mɛ yi mi.

20 Bimɛ, nyɛɛ bu nyɛ tsɛmɛ kɛ nyɛ nyɛmɛ be fɛɛ be, ejakaa ja a ji nɔ́ nɛ sa Nutsɔ ɔ hɛ mi. 21 Tsɛmɛ, nyɛ ko wo nyɛ bi ɔmɛ a muklii mi la tsɔ konɛ a he mi nɛ ko ko jɔ̃.

22 Sɔmɔli, nyɛɛ bu nyɛ zugba nɛ ɔ nɔ nutsɔ ɔmɛ tue be fɛɛ be, pi ngɛ hɛ mi suɔmi nya be mi nɛ a ngɛ nyɛ hyɛe, se be fɛɛ be. Nyɛɛ bu mɛ be fɛɛ be kɛ he si bami ngɛ suɔmi nɛ nyɛ ngɛ kɛ ha Nutsɔ ɔ he. 23 Nyɛɛ je nyɛ tsui mi kɛ tsu ni wawɛɛ be fɛɛ be kɛ bua jɔmi, kaa nɔ́ nɛ Nutsɔ ɔ nɛ nyɛ ngɛ tsue ha, se pi nyɛ zugba a nɔ nutsɔ ɔmɛ. 24 Nɛ nyɛ kai kaa Kristo, Nutsɔ ɔ, ji nɔ nɛ maa wo nyɛ hiɔ, nɛ e ma ha nyɛ nyɛ blɔ fa mi nɔ́ ɔ kulaa. Ejakaa lɛ ji nɔ nɛ nyɛ ngɛ ni ɔ tsue ha niinɛ. 25 Nɛ nɔ nɛ peeɔ níhi nɛ sɛ ɔ, e ma na níhi nɛ sɛ ɔ he hiɔwo, ejakaa Mawu hlɛ nimli a mi.