1 Nyagbe mi ɔ, benɛ i nyɛ we hu ɔ, i pee ye juɛmi kaa ma tlɔ Ateene kɛkɛ, ami nɔ kake, 2 nɛ ma tsɔ Timoteo, wa nyɛmi kɛ nɔ nɛ waa kɛ lɛ tsuɔ ni, nɛ e ji Mawu sɔmɔlɔ ɔ, nɛ e ba slaa nyɛ, nɛ e ha nyɛ na kã, 3 bɔ nɛ pee nɛ nyɛ ko gbɔjɔ ngɛ haomihi nɛ ngɛ nyɛ nɔ bae ɔ a mi. Se nyɛ nitsɛmɛ nyɛ le momo kaa kikɛmɛ a haomi nɛ ɔmɛ piɛ Mawu blɔ nya nɛ e to kɛ ha wɔ Kristo se nyɛɛli ɔ he. 4 Benɛ waa kɛ nyɛ ngɛ po ɔ, wa de nyɛ kɛ to kaa e be kɛe nɛ haomi maa ba nyɛ nɔ, nɛ e ba mi.

5 Kaa bɔ nɛ i de momo ɔ, benɛ i nyɛ we tsui nɛ ma to hu ɔ, i tsɔ Timoteo konɛ e ba hyɛ ha kaa nyɛ hɛɛ hemi kɛ yemi ɔ mi kpɛii kɛ sa lo, aloo Abosiami ba ye nyɛ nɔ kunimi nɛ wa dengme gbomi ɔ tsuo pee yaka? 6 Se amlɔ nɛ ɔ, Timoteo kpale kɛ ba wa ngɔ kɛ manye, nɛ e ba bɔ wɔ kaa nyɛ hemi kɛ yemi kɛ nyɛ suɔmi ɔ mi wa ja a nɔuu, nɛ nyɛ kai be nɛ wa ba slaa nyɛ ɔ kɛ bua jɔmi, nɛ nyɛ hɛ ngɛ jae ngɛ wa he kaa bɔ nɛ wɔ hu wa hɛ ngɛ jae ngɛ nyɛ he ɔ. 7 Enɛ ɔ he je ɔ, mamimɛ, akɛnɛ wa na le hemi kɛ yemi nɛ nyɛ ngɛ ngɛ Nutsɔ ɔ mi ɔ, wa bua jɔ wa he ngɛ wa nɔ́ nami kɛ wa haomi ɔmɛ tsuo mi. 8 Nɛ wa ma nyɛ da nɔ́ tsuaa nɔ́ nya, akɛnɛ wa na le kaa nyɛ daa si kpɛii ngɛ Nutsɔ ɔ mi ɔ.

9 Kɛ wa maa pee kɛ na Mawu si babauu kɛ ha nyɛ kɛɛ, ngɛ bua jɔmi kɛ suɔmi nɛ nyɛ je kpo kɛ tsɔɔ wɔ ngɛ sɔlemi nɛ wa sɔleɔ kɛ haa nyɛ ɔ he? 10 Ejakaa nyɔ kɛ pia tsuo ɔ, wa kpaa pɛɛ nɛ wa biɔ Mawu nɛ e ha waa na nyɛ hɛ mi ekohu, bɔ nɛ pee nɛ waa ye kɛ bua nyɛ nɛ nyɛ hemi kɛ yemi ɔ nɛ hyi tɔ. 11 Wa Tsɛ Mawu ɔ nitsɛ kɛ wa Nutsɔ Yesu nɛ ha nɛ waa ba nyɛ ngɔ ekohu. 12 Nutsɔ ɔ nɛ ha nɛ nyɛ hyi tɔ kɛ suɔmi kɛ be nɔ, nɛ nyɛɛ suɔ nyɛ he kɛ nɔ tsuaa nɔ kaa bɔ nɛ wɔ hu wa suɔ nyɛ ɔ. 13 Kɛ gu enɛ ɔ nɔ ɔ, wa Tsɛ Mawu ɔ ma ha nyɛ tsui mi ma tsɔ kɛ pi si, nɛ yayami ko be nyɛ he hie. Nyɛ maa da si ngɛ e hɛ mi nɛ nyɛ maa ye bemi ngɛ wa Nutsɔ Yesu Kristo kɛ e ni klɔuklɔu ɔmɛ a bami ligbi ɔ nɔ.