1 Paulo nɛ a wo lɛ tsu mi ngɛ Yesu Kristo Manye Munyu ɔ fiɛmi he ɔ; kɛ nyɛminyumu Timoteo nɛ ngma womi nɛ ɔ ya ha Filemon.

Wa suɔlɔ kɛ wa huɛ ni tsulɔ, 2 kɛ asafo nɛ kpee ngɛ o we ɔ mi, kɛ wa nyɛmiyo Apia, kɛ Arkipo nɛ ji sɛumi tso ɔ he ta hwulɔ kaa ami nitsɛ ɔ.

3 Dloomi kɛ he jɔmi nɛ je wa Tsɛ Mawu kɛ Nutsɔ Yesu Kristo dɛ mi ɔ ha nyɛ.

4 I naa Mawu si daa ngɛ ye sɔlemi mi ha mo, suɔlɔ Filemon, 5 ejakaa i nuɔ o suɔmi kɛ hemi kɛ yemi nɛ o ngɛ ngɛ Nutsɔ Yesu kɛ e ni ɔmɛ a mi ɔ he; 6 nɛ i kpaa pɛɛ kaa o huɛ ɔmɛ a na o hemi kɛ yemi ɔ eko, akɛnɛ a naa nɔ́ kpakpahi nɛ o na kɛ je Kristo dɛ mi ɔ; konɛ a je mi bami nɛ tsake. 7 Ye nyɛminyumu, ami nitsɛ i na bua jɔmi babauu kɛ je o suɔmi ɔ mi, ejakaa o mi jɔmi ɔ haa Mawu bi ɔmɛ a tsui nɔɔ a mi.

8,9 Jehanɛ ɔ, i suɔ nɛ o pee nɔ́ ko ha mi. I ngɛ he blɔ ngɛ Kristo biɛ mi nɛ i biɔ mo, ejakaa e ji nɔ nɛ sa nɛ o peeɔ, se ngɛ suɔmi nɛ i suɔ mo he je ɔ i ma bi mo. Ami Paulo nɛ amlɔ nɛ ɔ i bwɔ, se a wo mi tsu mi ngɛ Yesu Kristo he. 10 I kpa mo pɛɛ nɛ o na ye bi Onesimo mɔbɔ, nɔ nɛ i kpɔ kɛ ha Nutsɔ ɔ be mi nɛ a wo mi tsu mi nɛ i ngɛ kɔsɔkɔsɔ mi ɔ. 11 Onesimo, nɔ nɛ e biɛ ɔ sisi ji "Senami" ɔ, e ji nɔ ko nɛ sa a, e he be se nami ko ha mo, se jehanɛ ɔ e he maa ba se nami babauu ha i kɛ mo tsuo. 12 I ngɛ lɛ tsɔe kɛ ma o ngɔ, nɛ o he lɛ kaa bɔ nɛ o ma he ami nitsɛ ɔ.

13 I ko suɔ kaa e kɛ mi nɛ hi si ngɛ hiɛ ɔ be mi nɛ i ngɛ kɔsɔkɔsɔ mi ngɛ Manye Munyu ɔ nɛ i fiɛ ɔ he, konɛ o ye kɛ bua mi kɛ gu e nɔ. 14 Se i be suɔe nɛ ma pee ja ke o kplɛɛ we nɔ. Nɛ akɛnɛ o mi mi jɔ nɛ o peeɔ nɔ́ kpakpa momo he je ɔ, i be suɔe nɛ ma nyɛ o nɔ. Se ma suɔ kaa e je mo nitsɛ o tsui mi. 15 Moo ngɔ kaa e tu fo kɛ je o he be bɔɔ kɛkɛ, se jehanɛ ɔ lɛɛ e kpale kɛ ba o ngɔ kulaa, 16 pi kaa sɔmɔlɔ kɛkɛ, se mohu nɔ nɛ pe sɔmɔlɔ po, suɔlɔ nyɛminyumu nɛ i fiɛ we e he, nɛ e he maa ba se nami kɛ ha mo babauu, ejakaa e ji sɔmɔlɔ kɛ o nyɛmi ngɛ Kristo mi.

17 Ke o buu mi kaa o huɛ niinɛ ɔ, lɛɛ o he lɛ atuu nɛ o hɛɛ lɛ kaa bɔ nɛ o maa hɛɛ mi ke ami nitsɛ nɛ i ba o ngɔ ɔ. 18 Nɛ ke e pee mo yayami ko aloo e ju o nɔ́ ko ɔ, moo ngɔ jamɛ a tɔmi ɔ kɛ ha mi. 19 I ma to mo nane mi. Ami Paulo nitsɛ nɛ i ngɛ enɛ ɔ ngmae kɛ ngɛ mo si woe, se i be hiɔ nɛ o hɛɛ mi ɔ nɔ ta tsie. Anɔkuale ɔ ji kaa ami nɛ i ha o plɛ bɔ nɛ o ji nɛ ɔ ngɛ Kristo mi. 20 Suɔlɔ nyɛminyumu, moo pee enɛ ɔ ha mi nɛ ye tsui maa nɔ ye mi nɛ i ma je Kristo yi kɛ bua jɔmi.

21 I ngɛ mo womi nɛ ɔ ngmae, nɛ i ngɛ nɔ mi mami kaa o maa pee pe nɔ nɛ i bi mo nɛ ɔ po.

22 I kpa mo pɛɛ nɛ o dla he ko kɛ to mi, ejakaa i ngɛ he nɔ kami kaa Mawu maa bu nyɛ pɛɛ kpami ɔ tue, nɛ e be kɛe nɛ e ma ha nɛ ma ba nyɛ ngɔ.

23 Epafra nɛ ji ye huɛ nɛ lɛ hu e ngɛ tsu mi ngɛ hiɛ ɔ ngɛ Kristo Yesu Manye Munyu ɔ nɛ e fiɛ ɔ he ɔ, ke e biɔ mo. 24 Marko kɛ Aristarko, Dema kɛ Luka nɛ a ji nihi nɛ i kɛ mɛ tsuɔ ni ɔ, ke mɛ hu a biɔ mo.

25 Wa Nutsɔ Yesu Kristo dloomi ɔ kɛ nyɛ mumi ɔ nɛ hi si.