1 Paulo kɛ Timoteo nɛ a ji Yesu Kristo sɔmɔli, nɛ ngma kɛ ya ha nyɛmimɛ Kristo se nyɛɛli kɛ asafo nɔ hyɛli ngɛ Filipi.

2 Tsɛ Mawu nɛ jɔɔ nyɛ tsuo. Ye sɔlemi ji kaa wa Tsɛ Mawu kɛ wa Nutsɔ Yesu Kristo nɛ jɔɔ nyɛ ti nɔ tsuaa nɔ babauu nɛ nyɛ na e he jɔmi ɔ ngɛ nyɛ tsui mi kɛ nyɛ si himi mi. 3 I naa Mawu si babauu ke i ngɛ sɔlee kɛ ha nyɛ ɔ. 4 Nɛ ke i sɔle kɛ ha nyɛ ɔ, i naa bua jɔmi, 5 ngɛ nyakpɛ yemi kɛ buami nɛ nyɛ ngɛ hae kɛ ha Manye Munyu ɔ nɛ kɔɔ Kristo he ɔ fiɛmi, kɛ je be mi nɛ nyɛ nitsɛmɛ nyɛ nu kɛ ba si piɔ nɛ ɔ. 6 Nɛ i heɔ yeɔ kaa Mawu, nɔ nɛ bɔni ni kpakpa nɛ ɔ tsumi ngɛ nyɛ mi ɔ, e ma tsa nɔ maa ye kɛ bua nyɛ. E ma ha nɛ nyɛɛ wa ngɛ e dloomi ɔ mi kɛ ya si benɛ e maa gbe ni tsumi ɔ nya ngɛ Yesu Kristo bami ekohu ligbi ɔ nɔ.

7 E sa kaa i susuu ja a ngɛ nyɛ he, ejakaa i suɔ nyɛ ngɛ ye tsui mi. Wɔ tsuo wa na Mawu jɔɔmi ɔ, be mi nɛ i ngɛ tsu mi kɛ benɛ i je kpo ɔ, nɛ wa ngɛ anɔkuale ɔ he fae, nɛ wa ngɛ nihi Kristo se blɔ tsɔɔe ɔ. 8 Mawu pɛ nɛ le bɔ nɛ ye hɛ jaa ngɛ nyɛ he ha. 9 Ye sɔlemi ji kaa nyɛ na ni kpahi a he suɔmi babauu, nɛ nyɛɛ ya nɔ nɛ nyɛɛ wa ngɛ mumi ɔ he ni lemi mi, 10 ejakaa i suɔ kaa nyɛɛ na slɔɔto nɛ ngɛ nɔ́ nɛ hi kɛ nɔ́ nɛ hí kpɛti, nɛ nyɛ mi mi blɔ nɛ tsɔ bɔ nɛ pee nɛ nɔ ko nɛ ko tu nyɛ he munyu yaya kɛ ya si Kristo bami ekohu ligbi ɔ nɔ. 11 Nyɛɛ pee nɔ kpakpa kɛ mi mi jɔmi ni ɔmɛ nɛ tsɔɔ kaa Mawu bimɛ ji nyɛ ɔ, ejakaa lɔ ɔ ma ha Nutsɔ ɔ yi jemi, nɛ e maa wo e hɛ mi nyami.

12 Nɛ anyɛmimɛ, i ngɛ hlae nɛ nyɛɛ le enɛ ɔ kaa, nɔ́ tsuaa nɔ nɛ ba ye nɔ ngɛ hiɛ ɔ, e maa ye kɛ bua nɛ Kristo Manye Munyu ɔ nɛ e je kpo. 13 Ejakaa nɔ tsuaa nɔ nɛ ngɛ hiɛ ɔ, kɛ soja amɛ tete, le kaa a wo mi kɔsɔkɔsɔ ngɛ Kristo se nyɛɛlɔ nɛ i ji ɔ he. 14 Nɛ nyɛmimɛ Kristo se nyɛɛli nɛ ngɛ hiɛ ɔ hu a ti nihi babauu yi tsu womi ɔ gbeye hu; nɛ ye tsui si tomi ɔ hu wo mɛ he wami, nɛ a na kã pe kekle ɔ kɛ ngɛ Manye Munyu ɔ jajee.

15 A ti ni komɛ hu ngɛ Manye Munyu ɔ fiɛe, ejakaa a ngɛ mi hunga jee ngɛ bɔ nɛ Mawu ngɔ mi kɛ tsu ni ha a he je. A ngɛ hlae nɛ a tsɛ mɛ fiɛli nɛ yi gbeye. Se a ti ni komɛ hu hɛɛ juɛmi kpakpa 16 kɛ ngɛ fiɛe, ejakaa a suɔ mi nɛ a le kaa Nutsɔ ɔ kɛ mi ba hiɛ ɔ nɛ ma ba fã anɔkuale ɔ he. 17 Ni komɛ hu nɛ ngɛ mi nyɛe ɔ ngɛ fiɛe kɛ hunga jemi kɛ pɛ. A susuu kaa a fiɛmi ɔ ma ha nɛ i ma na nɔ wawɛɛ ngɛ tsu ɔ mi. 18 Se bɔ fɛɛ bɔ nɛ a juɛmi ɔ ji ɔ, anɔkuale ɔ fɔɔ si kaa a ngɛ Kristo Manye Munyu ɔ fiɛe, nɛ lɔ ɔ haa mi bua jɔmi.

19 Ye bua jɔmi ɔ se be poe, ejakaa i le kaa benɛ nyɛ ngɛ sɔlee ha mi nɛ Mumi Klɔuklɔu ɔ ngɛ yee kɛ ngɛ mi buae ɔ, a ma je mi. 20 Ejakaa i ngɛ blɔ hyɛe kɛ he nɔ kami kaa i be nɔ́ ko pee nɛ zo maa gbe mi. Se mohu, i ma pee klaalo be fɛɛ be, nɛ i ma tu munyu kɛ ka kɛ ha Kristo be mi nɛ i ngɛ nɔ́ nami mi ngɛ hiɛ ɔ, kaa bɔ nɛ i hi mi be ko nɛ be ɔ. Nɛ i he ye kaa i ma pee Kristo hɛ mi nyami wolɔ be fɛɛ be ke i ngɛ je mi jio, i gbo jio. 21 Ejakaa ngɛ ye blɔ fa mi ɔ, ke i ngɛ wami mi ɔ, e ji he blɔ nɛ i na, nɛ i ma kɛ sɔmɔ Kristo. Nɛ ke i gbo hu e ma ha ma ya Kristo ngɔ nɛ Manye Munyu ɔ maa gbɛ kɛ fia. 22 Se ke ye je mi himi ma ha nɛ ma na tsakeli fuu kɛ ha Kristo ɔ, lɛɛ i li a ti nɔ́ nɛ hi, kaa ma hi je mi aloo ma gbo. 23 Be komɛ ɔ, i suɔ kaa ma hi je mi, nɛ be kpa komɛ hu e pee we mi ja, ejakaa i suɔ nɛ ma ya, nɛ i kɛ Kristo ya hi si. E maa pee mi bua jɔmi pe nɛ i ma hi hiɛ ɔ. 24 Se nyɛ he ɔ, ke i ngɛ je mi ɔ, e maa hi kɛ ha nyɛ.

25 Ye he hia ngɛ hiɛ ɔ kɛ sa, nɛ i ngɛ nɔ́ mi mami kaa i kɛ nyɛ maa hi si be saii nɛ ma ye kɛ bua nyɛ nɛ nyɛɛ wa ngɛ nyɛ hemi kɛ yemi ɔ mi nɛ nyɛ na bua jɔmi. 26 Ke i ngɛ nɛ i ba slaa nyɛ ekohu ɔ, e ma ha nyɛ bua maa jɔ nyɛ he nɛ nyɛ maa wo Kristo Yesu hɛ mi nyami kaa e ngɛ ye yi baae.

27 Se ngɛ nɔ́ fɛɛ nɔ́ nɛ maa ba ye nɔ mi ɔ, nɔ́ nɛ he hia ji kaa nyɛ kai be fɛɛ be, nɛ nyɛɛ ba nyɛ je mi bɔ nɛ sa Kristo se nyɛɛli; konɛ i ba nyɛ ngɔ jio, i kɛ nyɛ kpí hu jio, i ma hi nyɛ he munyu kpakpa nue kaa nyɛ ngɛ kake, nɛ nyɛ hɛɛ juɛmi kake kɛ ngɛ Manye Munyu ɔ fiɛe; 28 nɛ nyɛ yi nyɛ he nyɛli ɔmɛ gbeye ngɛ nɔ́ ko nɔ ko mi. Enɛ ɔ maa tsɔɔ mɛ kaa a gbee si, se nyɛɛ lɛɛ e ji okadi nɛ je Mawu ngɔ kɛ ba ha nyɛ, nɛ tsɔɔ kaa e kɛ nyɛ ngɛ nɛ e ha nyɛ neneene wami. 29 Ejakaa nyɛɛ lɛɛ a dloo nyɛ, pi nɛ nyɛ kɛ he e nɔ nyɛɛ ye kɛkɛ, se nɛ nyɛ kɛ na nɔ́ ngɛ e he. 30 I kɛ nyɛ tsuo nɛ ngɛ ta nɛ ɔ hwue. Nyɛ na kaa i na nɔ́ ngɛ e he ngɛ be nɛ be ɔ mi, nɛ i ngɛ ta nɛ nya wa mi kɛ sa kaa bɔ nɛ nyɛ le ɔ.