1 Oo, Galata bi nɛ be juɛmi! Mɛnɔ nyua nyɛ? Anɛ tsa pi nyɛ nɛ nyɛ nu Kristo gbenɔ ɔ sisi paa kaa nɔ́ nɛ i kɛ Kristo nɛ a sɛu lɛ ngɛ tso nɔ ɔ e he foni to nyɛ hɛ mi ɔ lo? 2 Ma suɔ nɛ ma bi nyɛ munyu nɛ ɔ ke: Anɛ Yuda bi ɔmɛ a mlaa amɛ a nɔ yemi nɔ nɛ nyɛ gu kɛ na Mumi Klɔuklɔu ɔ lo? Dabi, ejakaa Mumi Klɔuklɔu ɔ ba nyɛ nɔ benɛ nyɛ nu Kristo sane ɔ nɛ nyɛ he ye kaa e ma he nyɛ yi wami ɔ. 3 Anɛ pe nyɛ yi mi puɛ kulaa jehanɛ ɔ lo? Ejakaa ke kekle ɔ, mlaa amɛ a nɔ yemi ha we nyɛ mumi mi wami ɔ, kɛ peeɔ kɛɛ nɛ jehanɛ ɔ lɛɛ nyɛ susuu kaa mlaa amɛ a nɔ yemi maa pee nyɛ Kristo se nyɛɛli kpakpahi? 4 Lɛɛ nɔ́ babauu nɛ nyɛ na ngɛ Manye Munyu ɔ he nɛ ɔ, nyɛ ma ha nɛ e pee yaka gu lo? I he we yi!

5 I ngɛ nyɛ bie ekohu ke, anɛ Mawu ngɔ Mumi Klɔuklɔu he wami ɔ kɛ ha nyɛ nɛ e tsu nyakpɛ níhi ngɛ nyɛ mi, ejakaa nyɛ ngɛ Yuda bi ɔmɛ a mlaa amɛ a nɔ́ yee lo? Dabi! E baa mi ja ke o he Kristo nɔ ye nɛ o kɛ o hɛ fɔ e nɔ kulaa.

6 Ja a nɔuu nɛ e ba mi ha Abraham. Akɛnɛ e he Mawu si womi ɔmɛ ye he je ɔ, Mawu bu lɛ dalɔ nɛ e ha lɛ hiɔwe he blɔ, 7 Nyɛ maa na kɛ je enɛ ɔ mi kaa nihi nɛ je Abraham mi tutuutu ji nihi nɛ ngɛ hemi kɛ yemi nɛ a heɔ Mawu nɔ yeɔ.

8,9 Nɛ Ngmami ɔ hyɛ be nɛ ɔ blɔ, be nɛ Mawu ma he ma je li ɔmɛ a yi wami kɛ gu a hemi kɛ yemi nɔ ɔ. Mawu de Abraham enɛ ɔ momoomo ngɔ to benɛ e de lɛ ke, "Ma jɔɔ ma tsuaa ma nɔ bimɛ nɛ heɔ ye nɔ yeɔ kaa mo ɔ." Nɛ ja a ji bɔ nɛ e ngɛ. Nɔ tsuaa nɔ nɛ heɔ Kristo nɔ yeɔ ɔ, e naa jɔɔmi nɛ Abraham na a eko.

10 Anɔkuale ji kaa Mawu gbiɛmi ngɛ ni nɛmɛ nɛ a juɛmi ji kaa a ma na yi wami hemi kɛ gu Yuda bi ɔmɛ a mlaa amɛ a nɔ yemi nɔ, ejakaa Ngmami ɔ deɔ paa ke, "Gbiɛmi ngɛ nɔ tsuaa nɔ nɛ ma tɔ mlaahi nɛ a ngma ngɛ Mawu Mlaa Womi ɔ mi ɔ kake nɔ ɔ." 11 Enɛ ɔ tsɔɔ paa kaa nɔ ko be nyɛe maa sa Mawu hɛ mi kɛ gu Yuda bi ɔmɛ a mlaa amɛ a nɔ yemi nɔ, ejakaa Mawu deɔ wɔ ke hemi kɛ yemi nɔ pɛ wa maa gu kɛ sa e hɛ mi. Gbalɔ Habakuk ye enɛ ɔ he odase ke, "Nɔ nɛ ngɛ yi wami hemi hlae ɔ, e ma na ngɛ Mawu nɔ hemi kɛ yemi mi." 12 Mlaa a, tsa pi hemi kɛ yemi mi nɛ e je, se mohu, nɔ nɛ yeɔ mlaa a nɔ ɔ, e yi ma na wami ngɛ mi. 13 Se Kristo kpɔ wɔ kɛ je jamɛ a hɛ mi kpatami si himi ɔ mi nɛ e wo wa he yayami ɔmɛ a he gbiɛmi ɔ kɛ fɔ lɛ nitsɛ e nɔ. Ejakaa a de ngɛ Ngmami ɔ mi ke, "Nɔ tsuaa nɔ nɛ a sɛu lɛ ngɛ tso nɔ ɔ, a gbiɛ lɛ."

14 Nɛ jehanɛ ɔ, Mawu maa jɔɔ ma je li ɔmɛ hu kaa bɔ nɛ e wo Abraham si ɔ; nɛ wɔ Kristo se nyɛɛli tsuo wa nine maa su Mumi Klɔuklɔu ɔ nɛ a wo wɔ he si ɔ nɔ kɛ gu hemi kɛ yemi nɔ. 15 Mamimɛ, suɔli, ngɛ wa si himi mi tete ɔ, ke nɔ ko wo nɔ́ ko si nɛ e ngma womi kɛ fɔ nɔ ɔ, e be nyɛe ma tsake. Nɛ e be nyɛe maa pee nɔ́ kpa ngɛ lɔ ɔ se hulɔ.

16 Mawu ha Abraham kɛ e Bi ɔ si womi komɛ. E tsɔɔ we kaa e bi ɔmɛ tsuo nɛ a wo si ɔ, se mohu e Bi kake ɔ, nɔ nɛ ji Kristo ɔ. 17 Nɔ́ nɛ i ngɛ tsɔɔe ɔ ji, yi wami hemi kɛ gu hemi kɛ yemi nɔ he si nɛ Mawu wo ɔ, e tsakee we nɛ a pui mi ngɛ jeha lafa eywiɛ kɛ nyingmi etɛ se be nɛ Mawu wo Kita Nyɔngma amɛ ɔ. 18 Ke ji jamɛ a mlaa amɛ a nɔ yemi ma he wa yi wami ɔ, lɛɛ e tsɔɔ kaa e ji blɔ nya tomi kpa ko nɛ wa maa gu nɔ kɛ sa Mawu hɛ mi, se pi Abraham nɔ ɔ, ejakaa Abraham lɛɛ Mawu si womi ɔ kɛkɛ nɛ e ngɔ.

19 Jehanɛ ɔ, mɛni he je nɛ a wo mlaa amɛ mɔ? Nimli a tɔmihi a he je nɛ a kɛ mlaa amɛ piɛ si womi ɔ he ngɛ, konɛ a kɛ na bɔ nɛ a ngɛ Mawu mlaa amɛ a nɔ tɔe ha. Se mlaa nɔ yemi nɛ ɔ maa hi si kɛ ya si Kristo bami be pɛ, lɛ ji Bi ɔ nɛ Mawu ha si womi ɔ nɛ. Nɛ slɔɔto kake hu nɛ ngɛ mi ji, Mawu wo e mlaa amɛ kɛ gu bɔfohi a nɔ kɛ ba ha Mose, nɛ lɛ hu e wo kɛ ha nimli ɔmɛ. 20 Se benɛ e ma ha e si womi ɔ lɛɛ Abraham nitsɛ nɛ e kɛ ha, e kɛ gui bɔfohi loo nɔ ko kaa Mose nɔ.

21,22 Anɛ Mawu mlaa amɛ kɛ e si womi ɔmɛ kɔ we lo? Dabi! Ejakaa a ke e mlaa amɛ ma nyɛ wa yi wami ma he jinɛ Mawu be blɔ kpa jee kɛ ha wɔ nɛ wa kɛ je wa he kɛ je yayami mi. Ejakaa Ngmami ɔmɛ de ke wɔ tsuo wa peeɔ yayami nyɔguɛhi. Nɛ lɔ ɔ he je ɔ, blɔ nɔ nɛ a maa gu kɛ kpɔ wɔ ji kɛ gu Yesu Kristo nɔ hemi kɛ yemi nɔ; nɛ kikɛmɛ a blɔ nɛ ɔ ngɛ kɛ ha nɔ tsuaa nɔ nɛ ma he e nɔ maa ye ɔ.

23 Loko Kristo ba a, mlaa a ji nɔ́ nɛ ngɛ wa he bue; a nu wɔ kɛ wo mlaa a sisi nɛ a nga wa yi kaa nihi nɛ a wo mɛ tsu mi kɛ ya si wa he Yiwamihelɔ nɛ ma a nɔ ye.

24 Lɔ ɔ ji kaa Yuda bi ɔmɛ a mlaa amɛ plɛ wa tsɔɔli nɛ kpaka wɔ kɛ ya si Kristo ba nɛ e ba tsa waa kɛ Mawu kpɛti kɛ gu hemi kɛ yemi nɔ. 25 Se nɛ Kristo ba nɛ ɔ, mlaa amɛ a he hia we wɔ hu kaa a tsɔɔ wɔ blɔ kɛ ya Mawu ngɔ. 26 Ejakaa, amlɔ nɛ ɔ, Mawu bimɛ ji wɔ tsuo kɛ gu Yesu Kristo nɔ hemi kɛ yemi nɔ; 27 nɛ wɔ nihi tsuo nɛ a baptisi wɔ ngɔ wo Kristo nɛ waa kɛ lɛ pee kake ɔ mi ɔ, e ha wa nɔ. 28 Enɛ ɔ he je ɔ, Yuda no ko be, Hela no ko hu be, nyɔguɛ ko be, nɛ odehe ko be hu, nyumu be nɛ yo hu be, ejakaa nɔ kake ji wɔ tsuo ngɛ Kristo Yesu mi. 29 Ke Kristo nihi ji wɔ ɔ, lɛɛ Abraham nina tutuutu ji wɔ, nɛ si womihi nɛ Mawu ha lɛ ɔ, a peeɔ wa nɔ.