1 Lɔ ɔ he je ɔ, jehanɛ ɔ nɛ Kristo ha nɛ wa ye wa he ɔ, nyɛɛ da si kpitikplii, nɛ nyɛ ko ha nɛ a wo Yuda bi ɔmɛ a mlaa kɛ kusumi ɔmɛ a nɔ yemi kɛ ye nyɛ nyɔguɛ hu. 2 Nyɛɛ bu tue, ejakaa munyu nɛ ɔ he hia saminya: ke ji nyɛ ngɛ nyumu mi womi ɔ kɛ Yuda bi ɔmɛ a mlaa amɛ a se die nɛ nyɛ kɛ sa Mawu hɛ mi ɔ, lɛɛ Kristo be nyɛ yi wami nyɛe ma he. 3 I ngɛ nyɛ dee ekohu ke, nyumu tsuaa nyumu nɛ ngɛ nyumu mi womi ɔ se die kaa e ma kɛ sa Mawu hɛ mi ɔ, e sa nɛ e ye Yuda bi ɔmɛ a mlaa amɛ kulaa nɔ daa, ke pi ja a, e hɛ mi ma kpata. 4 Kristo he be se nami kɛ ha nɔ nɛ ngɛ mlaa amɛ a nɔ yemi se die kɛ sa Mawu hɛ mi, ejakaa Mawu dloomi ɔ bɔ lɛ.

5 Se wɔɔ lɛɛ ngɛ Mumi Klɔuklɔu ɔ yemi kɛ buami nya a, wa wo wa hɛ kɛ fɔ Kristo gbenɔ ɔ nɔ kaa e ma kpata waa kɛ Mawu kpɛti. 6 Nɛ wɔ nihi nɛ Kristo ha wɔ neneene wami ɔ, e he hia we nɛ waa hao kaa a wo wɔ nyumu mi aloo a wui wɔ, aloo kaa wa ngɛ Yuda bi ɔmɛ a kusumi ɔmɛ a nɔ yee aloo wa yi nɔ. Se mohu nɔ́ nɛ kɛkɛ nɛ he hia wɔ ji hemi kɛ yemi nɛ ngɛ ni tsue kɛ gu suɔmi mi.

7 Jinɛ nyɛ ngɛ mɔde bɔe saminya. Se mɛnɔ kulaa nɛ ba puɛ nyɛ jehanɛ ɔ kaa nyɛ ko bu anɔkuale ɔ tue hu? 8 Kikɛmɛ a juɛmi tsakemi nɛ ɔ ji Mawu nɔ nɛ tsɛ nyɛ ɔ ngɔ, ejakaa lɛ ji nɔ nɛ tsɛ nyɛ ke nyɛ ba na he jɔmi ngɛ Kristo mi. 9 Se mohu juɛmi yaya nɛ ɔ gu nɔ kake pɛ nɔ ngɛ nyɛ kpɛti kɛ puɛ nyɛ tsuo.

10 I ngɔ ye hɛ kɛ fɔ Nutsɔ ɔ nɔ kaa e maa kpale nyɛ kɛ ba hemi kɛ yemi ɔ mi kaa bɔ nɛ ami hu i ngɛ ɔ. Nɛ nihi nɛ ngɛ nyɛ haoe, nɛ a ngɛ nyɛ juɛmi tsakaa a, Mawu kɛ mɛ maa ye.

11 Ni komɛ ngɛ dee ke ami nitsɛ tete i ngɛ fiɛe ke nyumu mi womi kɛ Yuda bi ɔmɛ a mlaa amɛ a he hia ngɛ yi wami hemi ɔ blɔ nya tomi ɔ mi. Se kaa i fiɛ ja a niinɛ ɔ, jinɛ a be mi yi mi wae hu, ejakaa jamɛ a munyu ɔ dɔɛ nɔ ko. Se akɛnɛ a ngɛ mi yi mi wae kɛ sa a tsɔɔ kaa yi wami hemi nɛ a naa kɛ guu Kristo Sɛumi Tso ɔ kɛkɛ nɔ ɔ ji nɔ́ nɛ i ngɛ fiɛe kpamisa.

12 I na nɛ tsɔɔli ɔmɛ nɛ ngɛ hlae kaa a wo nyɛ nyumu mi bɔ nɛ pee nɛ nyɛ je nyɛ he ɔ, mɛ mohu a je a he kɛ je nyɛ he nɛ a ngmɛɛ nyɛ he.

13 Ejakaa, mamimɛ, he yemi nɛ a ha nyɛ, se mohu tsa pi he yemi nɛ a kɛ peeɔ yayami, se he yemi nɛ nyɛ ma kɛ suɔ nyɛ he kɛ nɔ́ nɛ nyɛ ma kɛ sɔmɔ nyɛ bi. 14 Ejakaa mlaa a kulaa e kpiti pomi kɛkɛ ji, "Moo suɔ ni kpahi kaa bɔ nɛ o suɔ mo nitsɛ o he ɔ." 15 Se ke ji nyɛ sume nyɛ he, nɛ nyɛ ngɛ nyɛ he kɔɔe, nɛ nyɛ ngɛ nyɛ he plaae mohu be fɛɛ be ɔ, lɛɛ nyɛɛ hyɛ saminya. Nyɛɛ hyɛ nɛ nyɛ ko puɛ nyɛ he.

16 I ngɛ nyɛ ga woe kaa nyɛɛ bu Mumi Klɔuklɔu ɔ kɛkɛ tue. E maa tsɔɔ nyɛ he nɛ nyɛɛ ya, kɛ nɔ́ nɛ nyɛɛ pee. Nɛ nyɛ be níhi nɛ sɛ nɛ nyɛ he lo ɔ ma bi nyɛ ɔ pee. 17 Ejakaa akɔnɔ níhi nɛ he lo ɔ dii se, nɛ wa suɔ peemi be fɛɛ be ɔ, a kɛ Mumi Klɔuklɔu ɔ suɔmi nya níhi nɛ e biɔ wɔ ke waa pee ɔ kɔ we; nɛ ni kpakpahi nɛ wa suɔ kaa waa pee be mi nɛ Mumi ɔ kɛ wɔ ngɛ ɔ, a je ekpa ngɛ wa he lo akɔnɔ níhi a he. Nɛ kikɛmɛ a níhi enyɔ nɛ ɔmɛ hii kunɔ nɔe daa ngɛ wa mi nɛ a na wa nɔ he wami, nɛ lɔ ɔ he je ɔ, wa suɔmi nya ni ɔmɛ na we he jɔmi ngɛ a dɛ mi. 18 Ke Mumi Klɔuklɔu ɔ ngɛ nyɛ he bue ɔ, Yuda bi ɔmɛ a mlaa amɛ a nɔ yemi he hia we nyɛ hu.

19 Se he lo ɔ se dimi yiblii yaya amɛ ji: susumi yayahi, ajuama bɔmi, gba puɛmi, mu ni tsumi, yahomi, 20 wɔ jami, nyuami, nyɛmi, pɛmi, hunga jemi, muklii mi fumi, ngmlaa kpami, he tsumi, atuã tsɔmi, nya sami, mi gbami; 21 da demi, nɔmlɔ gbemi, fiɛmi yaya kɛ níhi nɛ ngɛ kaa ni nɛ ɔmɛ. I ngɛ nyɛ dee ekohu kaa bɔ nɛ i de nyɛ momo ɔ ke, nihi nɛ peeɔ ni nɛ ɔmɛ ɔ, a nine be Mawu Matsɛyemi ɔ nɔ sue.

22 Se ke Mumi Klɔuklɔu ɔ ngɛ wɔ kpakae ɔ, yiblii nɛ e woɔ ngɛ wa mi ji: suɔmi, bua jɔmi, he jɔmi, tsui si tomi, tsui mi jɔmi, kpakpa peemi, anɔkuale yemi, 23 he si bami kɛ he nɔ yemi; nɛ ngɛ enɛ ɔmɛ a blɔ fa mi ɔ, Yuda bi ɔmɛ a mlaa amɛ kɛ mɛ be sane ko.

24 Ni nɛmɛ nɛ ji Kristo nimli ɔmɛ ɔ, a sɛu a he lo akɔnɔ nɔ́ ɔmɛ kulaa ngɛ e sɛumi tso ɔ he.

25 Ke Mumi Klɔuklɔu ɔ he wami nya nɛ wa ngɛ wami mi ngɛ ɔ, lɛɛ waa nyɛɛ Mumi ɔ blɔ tsɔɔmi se ngɛ wa nɔ́ tsuaa nɔ peemi mi. 26 Nyɛ ko ha nɛ wa wo wa he nɔ gojoo bɔ nɛ pee nɛ hɛ kɔ kɛ hetsɛ nɛ ko ba waa kɛ wa nyɛmimɛ a kpɛti.