1 Yuda nɛ ji Yesu Kristo sɔmɔlɔ, Yakobo nyɛminyumu ɔ, nɛ ngma womi nɛ ɔ kɛ ya ha Kristo sɔmɔli nɛ ngɛ he tsuaa he, nɛ a ji Tsɛ Mawu suɔmi bimɛ nɛ e hla a ke, 2 Mɔbɔ nami, he jɔmi kɛ suɔmi babauu ha nyɛ.

3 Anyɛmimɛ nɛ a suɔ, jinɛ i to nɛ ma ngma nyɛ ngɛ Mawu kpɔmi nɛ e kpɔ wɔ ɔ he. Se piɔ ɔ, e hia kaa ma ngma nyɛ ngɛ nɔ kpa ko he mohu nɛ ma bi nyɛ nɛ nyɛ fã hemi kɛ yemi nɛ Mawu kɛ ha e nimli klɔuklɔu ɔmɛ kulaa a he. 4 I ngɛ enɛ ɔ dee, ejakaa tsɔɔli komɛ nɛ a pi Mawu jali ɔ, a na blɔ kɛ sɛ nyɛ kpɛti nɛ a ngɛ dee ke, ke wa plɛ Kristo sɔmɔli se ɔ, wa ma nyɛ pee nɔ tsuaa nɔ nɛ wa be Mawu tue gblami ko nae. A ngma bɔ nɛ a maa pee kikɛmɛ a nimli nɛ ɔmɛ kɛ fɔ si momoomo, ejakaa a te si kɛ si wa Mawu kake too ɔ kɛ wa Mawetsɛ Yesu Kristo ɔ.

5 Nɔ́ nɛ i ngɛ mɛ dee ji, e ngɛ mi kaa a le momo, se a kai kaa Nutsɔ ɔ he ma mluku ɔ tsuo yi wami kɛ je Mizraim zugba a nɔ, nɛ lɔ ɔ se ɔ, e gbe a ti nihi nɛ bui lɛ, nɛ a he we e nɔ nɛ a ye ɔ. 6 Nɛ i ngɛ nyɛ kaie ngɛ bɔfo ɔmɛ nɛ jinɛ sa a, a ngɛ klɔuklɔu, se a bɔni yayami pee ɔ a he. Mawu ha nɛ a wo mɛ kɔsɔkɔsɔ nɛ a ngɔ mɛ kɛ wo muɔ nɛ mi wo diblii ɔ mi kɛ ma ya si kojomi ligbi ɔ nɔ. 7 Nyɛɛ nyɛ hɛ nɛ ko je Sodom kɛ Gomora kɛ mahi nɛ bɔle mɛ ɔ a ajuama bɔmi kɛ yahomi ɔ nɔ. A kpata jamɛ a ma amɛ a hɛ mi kɛ la nɛ a kɛ to okadi kɛ ha wɔ tsuo kaa hɛ mi kpatami he ko ngɛ kɛ ha yayami peeli tsuo.

8 Kikɛmɛ a lakpa tsɔɔli nɛ ɔmɛ ngɛ nɔ yae kɛ a yakayaka je mi bami, nɛ a ngɛ a nɔmlɔ tso he mu woe. A bui nihi nɛ ngɛ a nɔ yee ɔmɛ, nɛ a yeɔ anunyami bɔfo ɔmɛ tete a he fɛu. 9 Benɛ bɔfo nɔkɔtɔma, Mikael tete kɛ Abosiami ngɛ nya sae ngɛ Mose gbogboe ɔ he ɔ, e tui jɛmi munyu ko kɛ si we lɛ, se e de kɛkɛ ke, "Nutsɔ ɔ nɛ kã o hɛ mi." 10 Se kikɛmɛ a nimli nɛ ɔmɛ tuɔ munyu kɛ siɔ nɔ́ tsuaa nɔ nɛ a nui sisi ɔ. Nɛ a peeɔ nɔ fɛɛ nɔ nɛ a suɔ kaa lohwehi, nɛ a kɛ kpataa a susuma hɛ mi.

11 Kpoo ha mɛ! Ejakaa a ngɛ nɔ́ nɛ Kain, nɔ nɛ gbe e nyɛmi ɔ pee ɔ pee. A peeɔ nɔ́ tsuaa nɔ nɛ a kɛ na sika kaa bɔ nɛ Balaam pee ɔ. A ngɛ kaa Kora; a tsɔ Mawu hɛ mi atuã, nɛ a ma gbo kaa bɔ nɛ e gbo ɔ.

12 A ji nihi nɛ woɔ nyɛ asafo ɔ suɔmi niye ni ɔ he mu. Ejakaa a kɛ nyɛ ba yeɔ ni ɔ nɛ a kɛ lɛɛ a he, nɛ zo pee we mɛ. A ngɛ kaa bɔ kuu nɛ nyu be mi, nɛ kɔɔhiɔ ngɛ lɛ fiae kɛ bee ngɛ he nɛ zugba gbli ngɛ. A ngɛ kaa tsohi nɛ woɔ yiblii nɛ a yeɔ, se a nɛ yiblii ngɛ a nɔ nɛ a tsɔɔ ngɛ a womi be mi. A gbo pe nine nɛ a hia mɛ kɛ a sipoku kulaa.

13 Zo kɛ hɛ mi si puemi ji níhi nɛ a si ngɛ a se, kaa hwɔli se mu nɛ wo mi oslɔke nɛ he wa si ngɛ wo dɔ mi. A ngɛ kaa dodoehi nɛ laa blɔ. He nɛ Mawu dla kɛ to ha mɛ nɛ a maa ya ji diblii kanikani nɛ ngɛ kɛ yaa neneene ɔ.

14 Nimli nɛ ɔmɛ a he munyu nɛ Henok, nɔ nɛ ba ngɛ yi nɔ kpaagone ngɛ Adam se ɔ tu ke, "Hyɛ, Nutsɔ ɔ ma kɛ e nimli klɔuklɔu akpeakpe abɔ ɔmɛ. 15 E maa kojo nimli tsuo ngɛ zugba a nɔ nɛ e maa gbla a tue bɔ nɛ sa mɛ nɛ e kɛ tsɔɔ gbeye níhi nɛ a tsu ngɛ atuã nɛ a tsɔ ngɛ Mawu hɛ mi ɔ mi, kɛ musu bɔmi munyuhi nɛ a tu kɛ si lɛ ɔ." 16 A ji nihi nɛ nɔ́ ko sɛ a hɛ mi. A peeɔ yayami fɛɛ yayami nɛ a suɔ. A hine a he fiãli, nɛ a peeɔ nihi kuasia nɛ a naa a he se.

17 Se mamimɛ, nyɛ kai nɔ́ nɛ wa Nutsɔ Yesu Kristo kaseli ɔmɛ de nyɛ, 18 kaa ngɛ nyagbe ligbi ɔmɛ a mi ɔ, kikɛmɛ a nɔ he fɛu yeli nɛ ɔmɛ a oti ngɛ je mi ji kaa a pee nɔ tsuaa nɔ nɛ ji yayami nɛ a ma na bua jɔmi kɛ je mi ɔ. 19 A suɔ nya sami. Je nɛ ɔ mi ni yayami ɔmɛ a he nɛ a nyaa; nɛ Mumi Klɔuklɔu ɔ be a mi. 20 Se nyɛɛ lɛɛ ɔ, mamimɛ, nyɛɛ ngɔ nyɛ hemi kɛ yemi klɔuklɔu ɔ kɛ pee nyɛ sisi tomi nɛ nyɛɛ wa ngɛ mi; nɛ nyɛɛ sɔle ngɛ Mumi Klɔuklɔu ɔ mi.

21 Nyɛɛ hi Mawu suɔmi ɔ mi, nɛ nyɛɛ mlɛ wa Nutsɔ Yesu Kristo nɛ e ha nyɛ neneene wami ngɛ e mɔbɔ nami ɔ he. 22 Ke nihi ngɛ nɛ a yi mi ngɛ mɛ pee enyɔɔnyɔ ɔ, nyɛɛ wo mɛ he wami nɛ nyɛɛ na mɛ mɔbɔ. 23 Ke ni komɛ ngɛ nɛ a ma he a yi wami ɔ, nyɛɛ gbla mɛ kɛ je la a mi. Se ni komɛ ngɛ nɛ nyɛ maa ye kɛ bua mɛ kɛ gu mɔbɔ nami nɔ nɛ a na Nutsɔ ɔ. Se nyɛɛ hyɛ nɛ e hi nɛ a ko sa nyɛ nitsɛmɛ kɛ wo a yayami ɔmɛ a mi. Nyɛɛ nyɛ a yayami ɔmɛ eko fɛɛ eko be mi nɛ nyɛ ngɛ mɛ mɔbɔ nae kaa yayami peeli ɔ.

24 Anunyami ji e nɔ́, lɛ nɔ nɛ e maa bu nyɛ he nɛ nyɛ be si nɔe ɔ. Nɛ e ma kpaka nyɛ fiafiaafia kɛ ya da e anunyami ɔ hɛ mi nɛ piami ko be nyɛ he hie, nɛ nyɛ ma na bua jɔmi. 25 Mawu kake too ɔ, nɔ nɛ kpɔ wɔ kɛ gu Yesu Kristo wa Nutsɔ ɔ nɔ ɔ, lɛ a ngɔ anunyami kɛ agbo jemi kɛ nɔ yemi kɛ he wami nɛ e ngɛ kɛ je sisije ɔ kɛ ha kɛ je be nɛ ɔ mi kɛ ya neneene. Amen.