1 Mɛni ha nɛ pɛ kɛ kunɔ ngɛ nyɛ kpɛti ɔ? Tsa pi juɛmi yayamihi nɛ nyɛ hɛɛ ɔ nɛ ha we nɛ nyɛ kpɛti nɛ jɔ ɔ lo? 2 Nyɛ hɛ tsuɔ ngɛ nihi a níhi a he nɛ nyɛ gbee mɛ konɛ nyɛ nine nɛ su nɔ. Nyɛ he kɔɔ nihi a níhi a nɔ, se nyɛ nine nyɛ we nɛ e suu nɔ, nɛ lɔ ɔ he je ɔ nyɛ nɔɔ kunɔ nɛ nyɛ kpɔɔ ngɛ a dɛ. Se nɔ́ nɛ he je nɛ nyɛ na we nɔ́ nɛ nyɛ ngɛ hlae ɔ ji kaa nyɛ bi we Mawu. 3 Nɛ ke nyɛ bi tete ɔ, nyɛ nine sui nɔ, ejakaa nyɛ bi we nɔ́ nɛ sa, nyɛ biɔ akɔnɔ níhi sɔuu.

4 Nyɛ ngɛ kaa yo nɛ anɔkuale be e mi nɛ suɔ e huno he nyɛli. Nyɛ li kaa ke nɔ ko suɔ je ɔ mi akɔnɔ ni ɔmɛ nɛ Mawu sume ɔ, jamɛ a nɔ ɔ peeɔ Mawu he nyɛlɔ lo? Nɛ i ngɛ nyɛ dee ekohu ke, ke nyɛ susumi ji kaa nyɛ maa di je nɛ ɔ mi akɔnɔ ni ɔmɛ a se ɔ, lɛɛ nyɛ be Mawu suɔli pee. 5 Nɛ mɛni nyɛ susu kaa Ngmami ɔ ngɛ tsɔɔe benɛ e de ke, "Mumi Klɔuklɔu ɔ nɛ Mawu kɛ wo wa mi ɔ buu wa he nɛ e jee wa he hunga" a? 6 Se e haa wɔ he wami bɔ nɛ sa nɛ wa kɛ ye akɔnɔ ni nɛ ɔmɛ a nɔ. Kaa bɔ nɛ Ngmami ɔ de ɔ, "Mawu haa humi he wami, se fialɔ kɛ he nɔ wolɔ lɛɛ e kɛ lɛ kpee."

7 Enɛ ɔ he je ɔ, nyɛɛ ba nyɛ he si ha Mawu. Nyɛɛ te si kɛ si abosiami nɛ e maa tu nyɛ nya fo. 8 Nyɛɛ sa kɛ su Mawu he nɛ e maa sa kɛ su nyɛ he. Nyɛ tsake nyɛ tsui, nyɛ yayami peeli, nɛ nyɛɛ nyɛɛ Mawu kɛkɛ se konɛ nyɛ tsui mi nɛ tsɔ nɛ nyɛɛ ye lɛ anɔkuale. 9 Nyɛ fo ya nɛ nyɛ pia nyɛ he ngɛ nyɛ yayami ɔmɛ a he. Nyɛ ko nya, se mohu nyɛɛ ye kɔmɔ kɛ aywilɛho ngɛ anɔkuale mi.

10 Nɛ ke nyɛ le kaa nyɛ he be se nami ko ngɛ Mawu hɛ mi ɔ, lɛɛ e ma wo nyɛ nɔ nɛ e maa ye kɛ bua nyɛ. 11 Anyɛmimɛ nɛ a suɔ, nyɛ ko tu munyu kɛ si nyɛ bi, nɛ nyɛ ko tu nyɛ bi a he munyu yaya hulɔ. Ke nyɛ pee ja a nyɛ ngɛ Mawu mlaa nɛ tsɔɔ kaa nyɛɛ suɔ nyɛ he ɔ nɔ tɔe, nɛ nyɛ ngɛ tsɔɔe kaa mlaa a dɛ. Tsa pi nyɛ blɔ nya ni tsumi ji kaa nyɛɛ kojo nɛ nyɛɛ hyɛ ha kaa mlaa a da aloo e dɛ. Nyɛ nɔ́ ji kaa nyɛɛ ye nɔ. 12 Mlaa halɔ ɔ pɛ ji nɔ nɛ kojoɔ wɔ ngɛ blɔ dadɛ nɔ. Lɛ pɛ ji nɔ nɛ nyɛɔ heɔ yi wami aloo e kpataa nɔ hɛ mi. Lɔ ɔ he je ɔ, mɛni he blɔ o ngɛ kaa o kojoɔ aloo o tuɔ munyu kɛ siɔ ni kpahi?

13 Jehanɛ ɔ, nyɛɛ bu tue, nyɛ nihi nɛ nyɛ deɔ ke, "Mwɔnɛ ɔ loo hwɔɔ ɔ, wa maa ya ma nɛ ɔ loo ma kɔlɔ ɔ mi nɛ wa ma ya ye jeha kake nɛ waa ye jua" a. 14 Kɛ nyɛ pee kɛ le nɔ́ nɛ maa ba hwɔɔ kɛɛ? Ejakaa nyɛ wami be ɔmɛ ɔ nyɛ li a se kɛmi, a ngɛ kaa mɔtu afua. Nyɛ maa na lɛ piɔ, se be bɔɔ se pɛ e be hu. 15 Bɔ nɛ sa nɛ nyɛ de ji, "Ke Tsɛ ɔ bli wɔ saminya a, wa maa pee enɛ ɔ loo enɛ ɔ." 16 Se ke pi ja a, nyɛ maa hi fiae kɛ fɔ nyɛ nitsɛmɛ nyɛ blɔ nya tomihi a nɔ, nɛ kikɛmɛ a fiami nɛ ɔ sɛ Mawu hɛ mi.

17 Nyɛ kai hu kaa ke o le nɔ nɛ hi, nɛ sa nɛ o pee, se o pee we ɔ, e ji yayami ha mo.