1 Se moo lɛɛ moo tsɔɔ Kristo se nyɛɛlɔ anɔkuale si himi kpakpa a. 2 Moo slɔ nyumu nikɔtɔma amɛ nɛ a hɛ nɛ ka si nɛ a le nɛ a he anɔkuale ɔ nɛ a ye, nɛ a pee nɔ́ tsuaa nɔ kɛ suɔmi kɛ tsui si tomi.

3 Moo slɔ yi nikɔtɔma amɛ nɛ a pee kpoo, nɛ a bu nɔ ngɛ a nɔ́ tsuaa nɔ peemi mi. A ko tu nihi a he munyu yaya, nɛ a ko pee da deli; se mohu a tsɔɔ nɔ́ nɛ hi. 4 Nɛ mɛ hu a tsɔse yihewi ɔmɛ nɛ a ba a je mi ngɛ kpoo peemi mi nɛ a suɔ a hunohi kɛ a bimɛ, 5 nɛ a le nɔ, nɛ a juɛmi mi nɛ tsɔ, nɛ a hi si ngɛ a wehi a mi. A mi mi nɛ jɔ nɛ a ba a he si kɛ ha a hunohi, bɔ nɛ pee nɛ nihi nɛ le mɛ ɔ a ko tu Kristo se nyɛɛli a hemi kɛ yemi ɔ he munyu yaya.

6 Moo tu munyu kɛ tsɔɔ nihewi ɔmɛ hu ja a nɔuu, nɛ a ba a je mi saminya nɛ a hɛ nɛ ka si. 7 Nɛ mo nitsɛ hu o ngɔ o he kɛ pee nɔ hyɛmi nɔ́ kɛ ha mɛ ngɛ ni tsumi kpakpa fɛɛ ni tsumi kpakpa mi, nɛ a na o anɔkuale ɔ ngɛ nɔ́ fɛɛ nɔ mi kaa o fiɛ we. 8 O ni sɛɛmi he nɛ tsɔ bɔ nɛ pee nɛ a ko na nɔ́ yaya ko ngɛ he nɛ a de, konɛ zo nɛ gbe nɔ ko nɛ ma hla kaa e kɛ mo nɛ sa nya a. Ejakaa e be nɔ́ yaya ko nae.

9 Moo tsɔɔ sɔmɔli ɔmɛ nɛ a bu a nutsɔ ɔmɛ tue, nɛ a sa a hɛ mi. A ko je munyu nya, 10 nɛ a ko ju, se mohu a na mɛ kaa anɔkuale yeli. Kɛ gu enɛ ɔ nɔ ɔ, e ma ha nɛ nihi ma he wa Yiwamihelɔ kɛ Mawu ɔ nɔ maa ye.

11 Ejakaa Mawu dloomi nɔ́ke nɔ nɛ ji neneene yi wami hemi ɔ, a kɛ ngɛ nɔ tsuaa nɔ hae. 12 Nɛ nɔ́ke nɔ nɛ ɔ tsɔɔ wɔ kaa Mawu ngɛ hlae nɛ wa kua nɔ́ yayami peemi kɛ je nɛ ɔ mi akɔnɔ níhi. Waa ba wa je mi kpakpa, nɛ waa ye Mawu gbeye ngɛ wa si himi mi daa kɛ daa. 13 Waa ngɔ wa hɛ kɛ fɔ be nɛ wa ngɛ blɔ hyɛe ɔ nɔ, benɛ wa maa na e anunyami ɔ, nɛ ji wa Mawu Ope ɔ kɛ wa Yiwamihelɔ Yesu Kristo anunyami ɔ. 14 E gbo ngɛ wa nane mi ngɛ wa he yayami ɔmɛ a he konɛ e kɛ kpɔ wɔ kɛ je yayami kulaa mi nɛ e tsukɔ wa he nɛ e ngɔ wɔ kɛ pee lɛ nitsɛ e níhi nɛ wa na tsui klɔuu kɛ nɔ́ kpakpa peemi he bua jɔmi. 15 Moo tsɔɔ mɛ ni nɛ ɔmɛ, nɛ o wo mɛ he wami nɛ a ye nɔ, nɛ o tsɛ a tue se ngɛ a tɔmihi a he kaa nɔ ko nɛ ngɛ he blɔ nɛ e peeɔ ja. Ko ha nɛ nɔ ko nɛ e susu kaa nɔ́ ko nɛ o de ɔ, e he be se nami.