1 Jehanɛ ɔ, ngɛ Mawu ke e nimli ɔmɛ a kpɛti kekle somi ɔ nya a, blɔ nya tomihi ngɛ kɛ ha jami kɛ jami he klɔuklɔu ngɛ zugba a nɔ. 2 Tsuhi enyɔ ngɛ jami he nɛ ɔ. Níhi nɛ ngɛ kekle nɔ́ ɔ mi ji sika tsu lusu kɛ okplɔɔ kɛ e nɔ abolo pɔtɛɛ ko; nɛ a tsɛɔ lejɛ ɔ ke, He Klɔuklɔu. 3 Jehanɛ ɔ, tsu nya bo ko hu ngɛ. Ngɛ e se ɔ, tsu ko ngɛ lejɛ ɔ nɛ a tsɛɔ ke, He Klɔuklɔu Pe Kulaa. 4 Níhi nɛ ngɛ lejɛ ɔ ji, sika tsu bɔ sami la tɛ kɛ somi daka nɛ a wo sika tsu kɛ ha e he kulaa, kɛ tɛ ɔmɛ nɛ a ngma Mlaa Nyɔngma amɛ ngɛ nɔ ɔ, kɛ sika tsu kpluu nɛ mana ngɛ mi, kɛ Aaron tso ɔ nɛ tsiɛ ɔ, ngɛ somi daka a mi. 5 Ngɛ sika tsu daka a yi mi ɔ, o maa na bɔfohi nɛ a tsɛɔ ke kerubim ɔmɛ nɛ buu Mawu anunyami he ɔ, nɛ a gbɛ a pɛlihi a mi kɛ bu sika tsu daka a nya bumi nɔ nɛ a tsɛɔ ke mɔbɔ nami sɛ ɔ nɔ. Se nɔ́ nɛ ɔmɛ a mi tsɔɔmi ɔ hiɛ lolo.

6 Nɛ ke a to nɔ́ fɛɛ nɔ he blɔ nya gbe nya se ɔ, osɔfo ɔmɛ ya sɛɔ kekle tsu ɔ mi be mi nɛ a suɔ, nɛ a ya tsuɔ a ni tsumi. 7 Se Osɔfo Nɔkɔtɔma a pɛ nɛ e yaa se tsu ɔ mi; nɛ e yaa lejɛ ɔ si kake too ngɛ jeha mi. Nɛ be tsuaa be ɔ, e hɛɛ muɔ nɛ e kɛ fiãa mɔbɔ nami sɛ ɔ nɔ kaa bɔ sami kɛ ha Mawu ngɛ lɛ nitsɛ kɛ ma a a yayamihi kɛ a tɔmihi a he.

8 Mumi Klɔuklɔu ɔ wo enɛ ɔ kɛ tsɔɔ wɔ kaa ngɛ blɔ nya tomi momo ɔ sisi ɔ, nimli gu ɔmɛ be he blɔ nɛ a yaa he nɛ a tsɛɔ ke He Klɔuklɔu Pe Kulaa a, be abɔ nɛ kpo nɔ blɔ tsu ɔ ngɛ ɔ. 9 Nɛ kikɛmɛ a nɔ́ nɛ ɔ tsɔɔ wɔ nɔ́ ko pɔtɛɛ amlɔ nɛ ɔ. Ejakaa ngɛ blɔ nya tomi momo ɔ nya a, a woɔ nike níhi kɛ bɔ sami nihi kɛ baa, se kikɛmɛ a ni nɛ ɔmɛ nyɛ we nɛ a tsu nihi nɛ wo kɛ ba a a tsui he. 10 Ejakaa blɔ nya tomi momo ɔ hɛɛ kusumi ni peemihi nɛ kɔɔ niye ni mimi nɛ a maa ye, kɛ nɔ́ nɛ a maa nu, kɛ a he dumi he blɔ nya tomihi kɛ ni kpahi a he. Kikɛmɛ a blɔ nya tomi nɛ ɔmɛ fi ni ɔmɛ nɛ a ngmɛɛ we he kɛ ya si be nɛ Kristo ba kɛ Mawu blɔ nya tomi he nɛ hi ɔ.

11 Kristo ba kaa Osɔfo Nɔkɔtɔma kɛ ha blɔ nya tomi kpakpa nɛ wa na jehanɛ nɛ ɔ. Nɛ e ho hiɔwe sɔlemi tsu agbo nɛ hi kɛ pi si nɛ pi nimli nɛ ma, aloo je nɛ ɔ e mi fã ko ɔ mi ya. 12 Nɛ e wo muɔ kɛ sɛ jamɛ a se tsu nɛ a tsɛɔ ke He Klɔuklɔu Pe Kulaa a mi nɛ e ya fĩa kɛ pue mɔbɔ nami sɛ ɔ nɔ si kake kɛ gbe nya; se e pi apletsihi kɛ na bihi a muɔ. Dabi, e wo lɛ nitsɛ e muɔ, nɛ lɛ nitsɛ e kɛ ha wɔ neneene yi wami.

13 Nɛ ke ji, ngɛ blɔ nya tomi momo ɔ sisi ɔ, apletsihi kɛ na kuhi a muɔ kɛ na bihi a la zu tsukɔɔ nimli a he nɛ e jeɔ a yayamihi ɔ, 14 lɛɛ si nyɛmɛ nɛ Kristo muɔ be nyɛe ma tsake wa si himi kɛ wa tsuihi. E bɔ nɛ e sa a jeɔ wɔ kɛ jee mlaa momo ɔmɛ a nɔ yemi he tsui yemi mi, nɛ wa hlaa kaa wa ma sɔmɔ Mawu hɛ kalɔ ɔ. Ejakaa ngɛ Mumi Klɔuklɔu ɔ yemi kɛ buami nya a, Kristo ngɔ lɛ nitsɛ e he kɛ ha Mawu nɛ e gbo ngɛ wa yayami ɔmɛ a he, lɛ nɔ nɛ e hi kɛ pi si, nɛ yayami ko loo tɔmi ko be e he ɔ. 15 Kristo wo somi he ɔ kɛ ba konɛ nihi kulaa nɛ a tsɛ mɛ ɔ, a ba nɛ a nine nɛ ba su nyakpɛ níhi nɛ Mawu wo mɛ si ngɛ he ɔ nɔ. Ejakaa Kristo gbo nɛ e kɛ kpɔ mɛ kɛ je tue gblami nɛ a ma na ngɛ a yayamihi nɛ a pee be mi nɛ a ngɛ somi momo ɔ sisi ɔ mi.

16 Jehanɛ ɔ, ke ji nɔ ko gbo nɛ e wo e nya si nɛ e tsɔɔ níhi nɛ a ma kɛ ha nihi ngɛ e gbenɔ se ɔ, a ha we nɔ ko nɔ ko nɔ́ ko kɛ yaa si a maa ma nɔ mi kaa nɔ ɔ gbo. 17 Nɛ a bɔni e nya si womi ɔ he ni tsumi ngɛ e gbenɔ se. Be abɔ nɛ e ngɛ je mi ɔ, nɔ ko be nyɛe maa da e nya si womi ɔ nɔ kɛ ngɔ e ni ɔmɛ nɛ e wo mɛ si ngɛ he ɔ eko. 18 Lɔ ɔ he je nɛ a fiã muɔ ɔ nɛ, nɛ a kɛ tsɔɔ Kristo gbenɔ, loko ji a je kekle somi ɔ tete he ni tsumi sisi. 19 Ejakaa benɛ Mose tsɔɔ nimli ɔmɛ Mawu mlaa amɛ tsuo se ɔ, e wo na bihi kɛ apletsihi a muɔ kɛ nyu kɛ jijɔ he bwɔmi tsutsu kɛ nyinyla nɛ e kɛ fiã nimli ɔmɛ kɛ womi ɔ nitsɛ hu nɔ. 20 Nɛ e de ke, nyɛɛ kɛ Mawu kpɛti somi ɔ, nɛ Mawu ha mi ke nyɛ pee ɔ, e he ni tsumi sisi jemi muɔ nɛ peeɔ okadi ɔ ji enɛ ɔ nɛ. 21 Nɛ ja a kɛ̃ nɛ e wo muɔ ɔ kɛ fiã bo tsu klɔuklɔu ɔ kɛ jami ni ɔmɛ tsuo a nɔ. 22 Anɔkuale ji kaa ngɛ somi momo ɔ sisi ɔ, e piɛ́ nɔ́ ko nɛ a wo we muɔ kɛ jlua we. Nɛ ke a pue we muɔ si ɔ lɛɛ a ngɔɛ yayami ko kɛ ki.

23 Bɔ nɛ e ba ha nɛ e he hia kaa Mose nɛ e ngɔ lohwehi a muɔ kɛ jlua bo tsu klɔuklɔu ɔ nɛ ngɛ zugba a nɔ kɛ e mi nɔ́ tsuaa nɔ, nɛ a ji níhi nɛ ngɛ hiɔwe ɔ a henɔ ɔ ji enɛ ɔ nɛ. Se hiɔwe nɔ́ ɔmɛ nitsɛ lɛɛ a jluaa mɛ kɛ bɔ sami nɛ he jua wa pe enɛ ɔmɛ.

24 Ejakaa Kristo ya su hiɔwe nitsɛ nɛ e ya ngɛ Mawu hɛ mi jehanɛ kaa wa Huɛ. Nɛ tsa pi sɔlemi tsu nɛ nimli ma a mi nɛ e ngɛ, ejakaa zugba a nɔ nɔ́ ɔ lɛɛ e ji hiɔwe sɔlemi tsu nitsɛ ɔ e mimi kɛkɛ. 25 Nɛ e ngɔɛ e he kɛ sɛ bɔ ɔ ekohu kaa bɔ nɛ zugba a nɔ Osɔfo Nɔkɔtɔma a ngɔɔ lohwe muɔ kɛ saa bɔ ngɛ He Klɔuklɔu Pe Kulaa a daa jeha a. 26 Kaa ja a ji bɔ nɛ e sa nɛ e pee ɔ, jinɛ e ko hi gboe daa nɛ kɛ je be nɛ a bɔ je ɔ. Se tsa pi ja i. E ba je kpo si kake ngɛ be ɔ nyagbe mi bɔ nɛ pee nɛ e ba gbo kɛ ha wɔ nɛ e je yayami kɛ ho kulaa.

27 A to kaa Nɔmlɔ ma gbo si kake pɛ, nɛ kɔlɔ ɔ se ɔ kojomi maa ba, 28 ja nɛ Kristo hu ngɔ e he kɛ sã bɔ ngɛ nihi fuu a yayami he; nɛ e maa kpale kɛ ba ekohu, se pi ngɛ wa yayami ɔmɛ a he.

Se mohu e ngɔ yi wami hemi kɛ ma jehanɛ kɛ ha ni nɛmɛ nɛ ngɛ lɛ blɔ hyɛe kɛ tsui si tomi ɔ.