1 Enɛ ɔ he je ɔ, e bi nɛ waa bu anɔkuale ɔ nɛ wa nu ɔ tue saminya bɔ nɛ pee nɛ wa ko ngmɛɛ he. 2 Ejakaa ke ji sɛ nɛ bɔfo ɔmɛ ba deɔ wɔ ɔ peeɔ anɔkuale, nɛ a gblaa nimli a tɔmi tsuaa tɔmi he tue ɔ nɛɛ, 3 kɛ e maa pee kɛɛ nɛ wa maa ye wa he ke ji wa pɛtɛ we kikɛmɛ a yi wami hemi agbo nɛ ɔ nɛ Nutsɔ Yesu nitsɛ fiɛ nɛ nihi nɛ nu ɔ ba de wɔ ɔ he?

4 Nɛ Mawu nitsɛ hu ye he odase kaa e munyu ɔ anɔkuale i, kɛ gu okadihi kɛ nyakpɛ nihi kɛ Mumi Klɔuklɔu ɔ he wami nɛ e kɛ ha nihi nɛ he ye ɔ a nɔ. Mawu ha wɔ tsuo nike ni nɛ ɔmɛ eko.

5 Nɛ je nɛ maa ba nɛ wa ngɛ he munyu tue nɛ ɔ, tsa pi bɔfo ɔmɛ nɛ maa ye nɔ. 6 Dabi, ejakaa ngɛ La Womi ɔ mi ɔ, David de Mawu ke, "Mɛnɔ ji nɔmlɔ nɛ o susuu e he, aloo Nɔmlɔ bi nɛ e kɔmɔ peeɔ mo kɔmɔ? 7 E ngɛ mi kaa o bɔ lɛ nɛ o ba lɛ si bɔɔ pe bɔfo ɔmɛ mohu, se amlɔ nɛ ɔ, o ha lɛ bumi kɛ anunyami. 8 Nɛ o wo nɔ́ tsuaa nɔ ngɔ wo e sisi, nɔ́ ko nɔ ko piɛ."

Wa nɛ kaa enɛ ɔmɛ tsuo ba mi lolo, 9 se wa na Yesu, nɔ nɛ jinɛ a ba lɛ si bɔɔ pe bɔfo ɔmɛ ɔ, Mawu ha lɛ bumi kɛ anunyami, ejakaa e na nɔ nɛ e gbo ngɛ wa he. Ngɛ Mawu mɔbɔ nami babauu ɔ he je ɔ, Yesu gbo kɛ ha je ɔ tsuo. 10 Nɛ e da nɛ e sa kaa Mawu, nɔ nɛ bɔ níhi tsuo kɛ ha lɛ nitsɛ e anunyami he ɔ, e ha nɛ Yesu na nɔ, konɛ e kɛ kpaka e bimɛ fuu kɛ ba hiɔwe; nɛ Yesu nɔ́ nami ɔ ha nɛ e pee Kpakalɔ nɛ hi kɛ pi si, kɛ nɔ nɛ sa nɛ e ngɔ mɛ kɛ ya a yi wami hemi ɔ mi.

11 Wɔ nihi nɛ Yesu pee wɔ klɔuklɔu ɔ, waa kɛ lɛ tsuo ngɛ Tsɛ kake amlɔ nɛ ɔ. Nɛ lɔ ɔ he je nɛ e pee we lɛ zo kaa e ma tsɛ wɔ e nyɛmimɛ ɔ nɛ. 12 Nɛ e de ngɛ La Womi ɔ mi ke, "I ma gba Mawu ye Tsɛ ɔ he sane kɛ ha ye nyɛmi ɔmɛ, nɛ wɔ tsuo wa ma la kɛ je e yi." 13 Nɛ e de be kpa mi hu ke, "I kɛ ye nyɛmi ɔmɛ ma wo wa hɛ ngɔ fɔ e nɔ." E de ekohu ke, "Ami kɛ bimɛ nɛ Mawu ngɔ ha mi ɔ ji nɛ ɔ nɛ."

14 Nɛ akɛnɛ wɔ nɛ wa ji Mawu bimɛ ɔ, adesahi ji wɔ, nɛ he lo kɛ muɔ ji wɔ he je ɔ, lɛ nitsɛ hu e wo jamɛ a bɔmi su ɔ ngɔ fɔ e nɔ, nɛ a fɔ lɛ kaa Nɔmlɔ adesa, ejakaa ja e plɛ adesa loko ji e ma nyɛ gbo, konɛ e gu gbenɔ mi nɛ e kɛ puɛ abosiami he wami nɛ hɛɛ gbenɔ ɔ. 15 Konɛ e kɛ kpɔ nihi kulaa nɛ gbenɔ gbeye yemi he je ɔ, a pee kaa nihi nɛ ngɛ nyɔguɛ si himi mi a wami ligbi ɔmɛ tsuo ɔ.

16 Wɔ tsuo wa le kaa e bɛ je ɔ mi kaa Mawu bɔfo, se mohu e ba kaa nɔmlɔ adesa nɛ a fɔ lɛ Yuda no. 17 Nɛ e sa kaa Yesu e hi kaa wɔ e nyɛmi ɔmɛ pɛpɛɛpɛ konɛ e nyɛ nɛ e pee mɔbɔ nalɔ kɛ anɔkua Osɔfo Ngua ngɛ Mawu hɛ mi, nɛ e pee Osɔfo nɛ maa na wɔ mɔbɔ nɛ e maa ye Mawu anɔkuale ngɛ adesahi a yayami ɔmɛ a he ni tsumi mi. 18 Nɛ akɛnɛ lɛ nitsɛ hu e na nɔ, nɛ a ka lɛ he je ɔ, e le wa nɔ́ nami kɛ kami ɔmɛ nɛ e ma nyɛ maa ye kɛ bua wɔ.