1 Enɛ ɔ he je ɔ, nyɛ ha nɛ wa si Kristo he sane ɔ sisije ni ɔmɛ a se nɛ waa ya wa hɛ mi ni ngua amɛ a nɔ, nɛ waa wa ngɛ nɔ sisi numi mi, kaa bɔ nɛ e sa nɛ Kristo se nyɛɛli nikɔtɔmahi peeɔ. Nɛ anɔkuale ji, e he hia we kaa wa ma bɔni munyu tumi ekohu ngɛ nɔ́ nɛ ɔmɛ a he, kaa e ji kuasia jemi kaa a maa bɔ kpakpa peemi he mɔde kɛ na yi wami hemi, aloo kaa e he hia nɛ a na hemi kɛ yemi ngɛ Mawu mi; 2 e he hia we kaa a tu nyɛ munyu ngɛ baptisimi kɛ mumi mi nike níhi kɛ gbogboehi a si temi kɛ nyagbe kojomi ɔ he hu.

3 Ngɛ Mawu suɔmi nya a, wa maa ya nɔ nɛ waa kase ni kpahi jehanɛ ɔ.

4 E he hia we kaa a bɔ mɔde nɛ a tsɔɔ nyɛ Nutsɔ ɔ se blɔ ekohu ke ji nyɛ nu Manye Munyu ɔ sisi hyɛ nɛ nyɛ sa nyɛ nya kɛ hiɔwe ní kpakpahi hyɛ, nɛ nyɛ na Mumi Klɔuklɔu ɔ mi nɔ́ ko, 5 nɛ nyɛ le bɔ nɛ Mawu Munyu ɔ hi ha, nɛ nyɛ nu je nɛ ma a he wami ɔmɛ a he, 6 nɛ lɔ ɔ se ɔ, nyɛ te si kɛ si Mawu. Nɛ nyɛ be nyɛe ma tsake nyɛ tsui hu ke ji nyɛ sɛu Mawu Bi ɔ ngɛ tso nɔ ekohu, ejakaa nyɛ kua lɛ, nɛ nyɛ ngɔ lɛ kɛ ha he fɛu yemi kɛ hɛ mi si puemi ɔ.

7 Ke hiɔmi nɛ ha ngmɔ hulɔ ko, nɛ e ngmɔ ni ɔmɛ ba saminya a, e tsɔɔ kaa jamɛ a zugba a na Mawu dɛ mi jɔɔmi. 8 Se ke e ba mi kaa zugba a ngɛ miohi kɛkɛ woe ɔ, a maa ngɔ kaa zugba a gbo, nɛ a maa ngmɛɛ he nɛ a maa sa lɛ la.

9 Anyɛmimɛ suɔli, e ngɛ mi kaa i ngɛ enɛ ɔmɛ dee mohu, se i susu kaa nɔ nɛ i ngɛ dee ɔ kɔ we nyɛ he. I he ye kaa nyɛ ngɛ yiblii kpakpa woe nɛ ma ha nyɛ na yi wami hemi. 10 Ejakaa Mawu ɔ dalɔ ji lɛ. E hɛ be nyɛ ni tsumi nɛ nyɛ ngɛ tsue kɛ ngɛ lɛ hae ɔ nɔ jee; aloo nyɛ suɔmi nɛ nyɛ je kpo kɛ tsɔɔ lɛ, nɛ nyɛ ngɛ nɔ lolo kɛ ngɛ yee kɛ ngɛ e we bi ɔmɛ buae ɔ. 11 Nɛ wa maa suɔ kaa nyɛɛ ya nɔ nɛ nyɛ je nyɛ suɔmi kpo kɛ tsɔɔ ni kpahi be abɔ nɛ nyɛ ngɛ wami mi ɔ, bɔ nɛ pee nɛ nyɛ na nyɛ hiɔwo mluku ɔ kulaa hwɔɔ se.

12 Jehanɛ ɔ nɛ nyɛ na le nɔ́ nɛ fɔɔ si kɛ ha nyɛ ɔ, Mawu jami ɔ be nyɛ dengme pee, nɛ e be nyɛ hejɔ hu pee, se mohu nyɛ maa nyɛɛ ni nɛmɛ nɛ Mawu wo mɛ si ngɛ a hemi kɛ yemi kɛ a tsui si tabuami he, nɛ a nine su nɔ́ fɛɛ nɔ nɔ ɔmɛ a se.

13 Ejakaa benɛ Mawu wo Abraham si ɔ, e kã lɛ nitsɛ e he kita, ejakaa nɔ ko be nɛ kle pe lɛ Mawu ɔ nɛ e ma kã lɛ kita. 14 Nɛ e de ke, e maa jɔɔ lɛ nɛ e ma ha lɛ binyumu, nɛ e maa wo lɛ ma agbo nɔ tsɛ. 15 Nɛ kaa Abraham to e tsui si he je ɔ, e nine su si womi ɔ nɔ. Mawu ha lɛ binyumu Isak, kaa bɔ nɛ e wo lɛ si ɔ.

16 Nɔ tsuaa nɔ kãa nɔ ko nɛ kle pe lɛ ɔ kita konɛ lɔ ɔ nɛ ha nɛ e ye e si womi nɔ, aloo nɛ e gbla e tue ke e yí nɔ. Nɛ ke nya sami ngɛ nɔ kɛ nɔ a kpɛti nɛ a kã kita pɛ nɔ́ jemi ko be hu. 17 Nɛ akɛnɛ Mawu ngɛ hlae nɛ e tsɔɔ nihi nɛ e ngɛ si woe nɛ e maa ye kɛ bua a, kaa tsa pi munyu gu nɛ e tu nɛ e be e yi mi tomi ɔ tsakee he je ɔ, e kã e he kita kɛ ma nɔ mi.

18 E ha wɔ níhi enyɔ, nɛ ji e si womi kɛ kita nɛ e ka nɛ wa ma wo wa hɛ kɛ fɔ nɔ ɔ, ejakaa Mawu be nyɛe maa ye lakpa. Jehanɛ ɔ nihi nɛ tu fo kɛ ba sa we ɔ, a ma na he wami womi he ke a nu si womi nɛ ɔmɛ. Nɛ jehanɛ ɔ, a ma na nɔ mi mami kaa e ma ha mɛ yi wami hemi nɛ e wo mɛ he si ɔ.

19 Hemi kɛ yemi kaa a ma he wa yi wami nɛ ɔ ngɛ kaa osɛkɛ kɛ ha wa susuma amɛ, nɛ e tsaa wɔ kɛ Mawu nitsɛ kpɛti ngɛ e he klɔuklɔu ngɛ hiɔwe, 20 he nɛ Kristo sɛ wa hlami kɛ ho, nɛ e ya kpa pɛɛ kɛ ha wɔ, ejakaa e ba plɛ wa Osɔfo Nɔkɔtɔma nɛ hɛɛ anunyami kɛ blɔ nya nɛ Melkizedek hɛɛ ɔ.