1 Melkizedek nɛ ɔ ji Salem matsɛ kɛ Mawu Ope ɔ osɔfo. Melkizedek kɛ Abraham kpe nɛ e jɔɔ lɛ be mi nɛ Abraham ya hwu ta ngua ko nɛ e ye matsɛ ɔmɛ a nɔ nɛ e kpale kɛ ma a. 2 Kɛkɛ nɛ Abraham ha lɛ níhi nɛ e ya na ngɛ ta a mi tsuo mi gbami nyɔngma mi kake.

Melkizedek biɛ ɔ sisi tsɔɔmi ji, Dami sane yemi; nɛ lɔ ɔ he je ɔ, Matsɛ dami sane yelɔ ji lɛ; nɛ jehanɛ ɔ se hu ɔ, he jɔmi Matsɛ ji lɛ. Ejakaa lɛ ji Salem matsɛ, nɛ Salem sisi ji he jɔmi. 3 E be tsɛ nɛ e be nyɛ, nɛ a li e weku no ko hu. A fɔ we lɛ nɛ e gbo we hulɔ. E wami he sane ngɛ kaa Mawu Bi ɔ nɔ́; e ye osɔfo kɛ yaa neneene.

4 Bɔ nɛ e klemi ngɛ ha ji enɛ ɔ nɛ! Abraham tete nɛ ji Mawu anunyami bi ɔmɛ nɛ e hla a, a ti nɔ nɛ pe kulaa a, ha lɛ e ta mi ni ɔmɛ a mi gbami nyɔngma mi kake. 5 E sa nɛ a nu nɔ́ nɛ he je nɛ Abniham pee enɛ ɔ ngɛ sisi, ke ji Yuda osɔfo ji Melkizedek, ejakaa pee se ɔ, a wo Mawu bi ɔmɛ mlaa kaa a ha a osɔfo ɔmɛ nike ni nɛ a kɛ ye kɛ bua mɛ, ejakaa a wekuli ji mɛ. 6 Melkizedek pi a weku no, se Abraham ke lɛ ni nɛ ɔ, nɛ Melkizedek jɔɔ lɛ. 7 Nɔ tsuaa nɔ le kaa nɔ ko nɛ ngɛ nɔ jɔɔe ɔ, e kle pe nɔ nɛ e ngɛ jɔɔe ɔ.

8 E ngɛ mi kaa nimli adesahi ji Yuda osɔfo ɔmɛ, se a heɔ mi dlami nyɔngma mi kake ɔ; nɛ a deɔ wɔ ke Melkizedek lɛɛ e ngɛ wami mi.

9 Wa ma nyɛ de po ke Levi nitsɛ, nɛ ji Yuda osɔfo ɔmɛ kulaa a tsɛ nɛ heɔ mi dlami nyɔngma mi kake ɔ woɔ kɛ ya haa Melkizedek kɛ guu Abraham nɔ. 10 E ngɛ mi kaa jamɛ a be ɔ mi ɔ, a na we nɛ a fɔ Levi nɛ je Abraham weku ɔ mi ɔ lolo, be mi nɛ Abraham wo mi dlami nyɔngma mi kake ɔ kɛ ha Melkizedek ɔ.

11 Ke ji Yuda osɔfo ɔmɛ kɛ a mlaa amɛ nyɛ he wa yi wami ɔ, lɛɛ mɛni he je nɛ e he hia kaa Mawu nɛ e pa tsɔ Kristo kaa osɔfo nɛ e kɛ Melkizedek hɛɛ blɔ nya kake kɛ ba, nɛ e tsɔɛ nɔ ko nɛ e kɛ Aaron mohu hɛɛ blɔ nya sɔsɔɛ kaa bɔ nɛ osɔfo kpa amɛ kulaa hɛɛ ɔ kɛ bɛ?

12 Nɛ ke Mawu tsɔ osɔfo mimi kpa a, lɛɛ e sa nɛ e mlaa a hu nɛ e tsake kɛ to he. 13 Se kaa bɔ nɛ wa le ɔ, Kristo ji Levi osɔfohi a weku ɔ mi, se mohu e je Yuda weku nɛ a hlɛ mɛ hyɛ kɛ ha osɔfo yemi ɔ mi. 14 A ji weku nɛ Mose ha we mɛ jamɛ a ni tsumi ɔ hyɛ. 15 E fɔɔ si paa kaa Mawu blɔ nya tomi ɔ tsake, ejakaa Kristo nɛ ji Osɔfo Nɔkɔtɔma he ɔ, nɛ hɛɛ Melkizedek blɔ nya a, 16 e ji Levi wɛtso ɔ mi kaa bɔ nɛ blɔ nya tomi momo ɔ ngɛ ɔ, se mohu a wo lɛ osɔfo ngɛ wami nɛ se be poe ɔ he je. 17 Ejakaa lɛ e he odase nɛ Latsɛ ɔ ye nɛ e de ke, "O maa ye osɔfo kɛ ya neneene, nɛ o maa hɛɛ Melkizedek blɔ nya."

18 A po blɔ nya tomi momo ɔ nɛ a jee wɛtso ko mi kɛ yeɔ osɔfo ɔ mi, ejakaa a nyɛ we nɛ a kɛ tsu ni. He wami be mi, nɛ e he be se nami ejakaa e nyɛ we nihi a yi wami nɛ e he. 19 Ejakaa mlaa a ha we nɛ nɔ ko nɛ hi kɛ pi si ngɛ Mawu hɛ mi. Se amlɔ nɛ ɔ, wa ngɛ he nɔ kami pe kekle ɔ, ejakaa Kristo ha nɛ wa sa Mawu hɛ mi, nɛ jehanɛ ɔ wa ma nyɛ hɛ kɛ su e kasa nya.

20 Mawu ka kita kaa Kristo maa ye osɔfo kɛ ya neneene, 21 se e de we ja ngɛ osɔfo kpa amɛ a he. Kristo pɛ he nɛ e de ngɛ ke, "Nutsɔ ɔ kã kita nɛ e be e juɛmi tsakee: Osɔfo ji mo kɛ yaa neneene, nɛ o maa hɛɛ Melkizedek blɔ nya a." 22 Ngɛ Mawu kita a he je ɔ, Kristo ma nyɛ blɔ nya tomi he kpakpa nɛ ɔ manye yemi nɔ mi maa ma kɛ ya neneene.

23 Ngɛ blɔ nya tomi momo ɔ nya a, osɔfo ɔmɛ hiɛ fuu bɔ nɛ pee nɛ ke nikɔtɔma amɛ gbo ɔ, ni kpahi a ye a nane mi.

24 Se Yesu lɛɛ e hɛ ngɛ kɛ yaa neneene nɛ e ngɛ osɔfo yee, nɛ lɔ ɔ he je ɔ, nɔ kpa ko he hia we hu. 25 Nɛ ja a he je ɔ, e ma nyɛ ma he nihi nɛ maa gu e nɔ kɛ ba Mawu ngɔ ɔ a yi wami kulaa. Nɛ akɛnɛ e hɛ ngɛ kɛ yaa neneene he je ɔ, e ma kai Mawu daa ngɛ a he yayami ɔmɛ a he, kaa e wo a he hiɔ momo kɛ e muɔ.

26 Enɛ ɔ he je ɔ, lɛ ji Osɔfo Nɔkɔtɔma nɛ wa ngɛ hlae, ejakaa e ngɛ klɔuklɔu nɛ piami ko be e he, yayami ko be e he, nɛ yayami peeli hu puɛ we lɛ, nɛ a ha lɛ anunyami blɔ he ngɛ hiɔwe. 27 E he hia we kaa e sã bɔ daa ligbi kɛ lohwehi a muɔ ngɛ lɛ nitsɛ e yayamihi a he kekle, nɛ e pee ja kɛ ha ni kpa amɛ hulɔ, kaa bɔ nɛ osɔfo kpa amɛ peeɔ ɔ, ejakaa e pee enɛ ɔ si kake momo be nɛ e wo lɛ nitsɛ e he ngɔ sã bɔ ngɛ sɛumi tso ɔ nɔ ɔ. 28 Ngɛ blɔ nya tomi momo ɔ blɔ fa mi ɔ, osɔfo nikɔtɔma amɛ nitsɛ ji gbɔjɔli, nɛ a peeɔ yayami, se pee se ɔ, Mawu kã kita nɛ e hla lɛ nitsɛ e Bi nɛ hi kɛ pi si kɛ yaa neneene ɔ.