1 Nyɛ ha nɛ anɔkua nyɛmi suɔmi nɛ hi nyɛ kpɛti. 2 Nyɛ ko kpa nihi nubwɔ peemi; ejakaa kɛ gu enɛ ɔ peemi nɔ ɔ, nihi pee bɔfohi nubwɔ nɛ a li. 3 Nyɛ kai nihi nɛ a wo mɛ tsu ɔ, nɛ nyɛɛ pee nyɛ he kaa nɔ́ nɛ nyɛɛ kɛ mɛ tsuo nɛ ngɛ nɔ́ nae ɔ nɛ. Nyɛ kai nihi nɛ a ngɛ mɛ yi kpɛti wae ɔmɛ, ejakaa nyɛ le nɔ́ nɛ a ngɛ nae ɔ. 4 Nyɛɛ bu gba si himi kɛ e mi mlaa amɛ nɛ nyɛɛ hi si klɔuklɔu; ejakaa Mawu maa kojo gba puɛlɔ kɛ ajuama bɔlɔ.

5 Nyɛ ko wo sika suɔmi kɛ puɛ nyɛ si himi, nɛ nyɛ bua nɛ jɔ níhi nɛ ngɛ nyɛ dɛ ɔmɛ a he. Ejakaa Mawu de ke, "I be kpalee ngɛ o se, nɛ i be mo kuae kɔkɔɔkɔ."

6 Nɛ lɔ ɔ he je ɔ, wa ma nyɛ ma de kɛ nɔ mi mami ke, "Mawu ji ye yemi kɛ bualɔ; i be nɔ́ nɛ adesa ko maa pee mi ɔ he gbeye yee."

7 Nyɛ kai nyɛ hɛ mi nyɛɛli ɔmɛ, ni nɛmɛ nɛ fiɛɛ Mawu Munyu ɔ kɛ tsɔɔ nyɛ ɔ. Nyɛɛ hyɛ yiblii kpakpa amɛ nɛ a wo ngɛ a wami si himi mi ɔ, nɛ nyɛɛ bɔ mɔde nɛ nyɛ he Nutsɔ ɔ nɔ nɛ nyɛɛ ye kaa bɔ nɛ a pee ɔ.

8 Bɔ nɛ Yesu Kristo ngɛ kɛ je hiɛ ɔ, ja a nɛ e ngɛ mwɔnɛ ɔ, nɛ ja a nɔuu e maa hi kɛ ya neneene. 9 Lɔ ɔ he je ɔ, nyɛ ko ha nɛ tsɔɔmi he slɔɔtohi nɛ je ekpa nɛ mlɔɔ nyɛ. Nyɛ mumi mi he wami ji níke nɔ nɛ jee Mawu ngɔ, tsa pi kɔhi nɛ kɔɔ niye ni nɛ o maa ye he a nɔ yemi, lɔ ɔ ji blɔ nya tomi ko nɛ yi kɛ bua we nihi nɛ ka ja a peemi ɔmɛ.

10 Wa ngɛ bɔ sami la tɛ nɛ ji sɛumi tso, he nɛ a sɛu Kristo ngɛ ɔ, nɛ ni nɛmɛ nɛ ngɛ yi wami hemi se blɔ hlae kɛ gu Yuda bi ɔmɛ a mlaa amɛ a nɔ yemi nɔ ɔ, a be nyɛe maa ye kɛ bua mɛ. 11 Ngɛ Yuda bi ɔmɛ a mlaa a nya a, osɔfo nɔkɔtɔma a woɔ lohwehi nɛ a gbe ɔmɛ a muɔ kɛ baa he klɔuklɔu ɔ kaa yayami he bɔ sami, nɛ a saa lohwe ɔmɛ nitsɛ ngɛ ma a agbo ɔ se. 12 Enɛ ɔ he je nɛ Yesu hu na nɔ́ nɛ e gbo ngɛ ma a agbo ɔ se he nɛ e wo lɛ nitsɛ e muɔ kɛ fɔ wa he yayamihi ngɛ ɔ nɛ.

13 Lɔ ɔ he je ɔ, nyɛ ha nɛ waa je kpo kɛ ya na lɛ ngɛ agbo ɔ se konɛ wɔ hu wa na hɛ mi si puemi nɛ e na a eko. 14 Ejakaa tsa pi wa we ji je nɛ ɔ, wa ngɛ wa neneene we nɛ ngɛ hiɔwe ɔ tioe.

15 Lɛɛ kɛ gu Yesu yemi ke buami nɔ ɔ, wa maa sa yi jemi afɔle daa kɛ daa kɛ ha Mawu, nɛ wa ma de ni kpahi bɔ nɛ e biɛ ɔ hɛ mi ngɛ anunyami ha. 16 Nyɛ hɛ nɛ ko je kpakpa peemi nɔ, nɛ nyɛɛ ye kɛ bua nihi nɛ e fi mɛ ɔ kɛ nɔ́ nɛ nyɛ ngɛ ɔ e mi eko, ejakaa afɔle sami nɛ ngɛ kaa ja a ji nɔ́ nɛ saa Mawu hɛ mi. 17 Nyɛɛ bu nyɛ asafo hɛ mi nyɛɛli ɔmɛ tue nɛ nyɛɛ ba nyɛ he si ha mɛ, nɛ nyɛɛ pee níhi nɛ a ma de nyɛ ɔ. Ejakaa a ni tsumi ji kaa a baa nyɛ susumahi a yi, nɛ hwɔɔ se ɔ Mawu maa kojo mɛ ngɛ he. Nyɛ ha nɛ a tsu enɛ ɔ kɛ bua jɔmi kɛ ha Nutsɔ ɔ, se pi kɛ kɔmɔ yemi, ke pi ja a, nyɛ hu nyɛ maa na e mi ní.

18 Nyɛɛ sɔle nɛ nyɛ kpa pɛɛ kɛ ha wɔ. Wa heɔ yeɔ kaa wa hɛɛ he nile kpakpa, ejakaa wa suɔmi nya ji waa pee nɔ́ nɛ da be fɛɛ be. 19 Nyɛ sɔlemi he hia mi saminya amlɔ nɛ ɔ, bɔ nɛ pee nɛ ma nyɛ ma kpale kɛ ba nyɛ ngɔ ngɛ be kpiti mi.

20,21 Nɛ jehanɛ ɔ, ye sɔlemi kɛ pɛɛ kpami ji kaa He jɔmi Mawu ɔ, nɔ nɛ tle wa Nutsɔ Yesu si kɛ je gbeje ɔ, e ha nyɛ níhi nɛ he hia nyɛ ɔ tsuo nɛ nyɛ kɛ pee e suɔmi nya ni. Lɛ nɛ e ba pee to ɔmɛ a nɔ hyɛlɔ ngua, ngɛ e muɔ nɛ e kɛ ma nyɛɛ kɛ Mawu kpɛti neneene somi ɔ nɔ mi ɔ. E tsu ni tsumi nɛ e suɔ ngɛ Kristo he wami nya ngɛ nyɛ mi. Lɛ nɛ a ngɔ anunyami kɛ ha kɛ ya neneene. Amen.

22 Nɛ i kpa nyɛ pɛɛ, ye nyɛmimɛ, nyɛɛ bu ye womi kpiti nɛ ɔ mi he wami womi munyu nɛ ɔ tue kɛ tsui si tomi. 23 I ngɛ nyɛ lemi hae kaa a ngmɛɛ wa nyɛmi Timoteo he; nɛ ke e maa ba hiɛ ɔ be kpiti mi ɔ, i kɛ lɛ tsuo maa ba nyɛ ngɔ. 24 I biɔ nyɛ hɛ mi nyɛɛli ɔmɛ kɛ ni nɛmɛ nɛ heɔ yeɔ ɔmɛ tsuo. Ni nɛmɛ nɛ je Italia nɛ a kɛ mi ba ngɛ hiɛ ɔ tsuo biɔ nyɛ. 25 Mawu dloomi ɔ nɛ kɛ nyɛ tsuo nɛ hi si. Amen.