1 Mɛni ji hemi kɛ yemi? E ji hɛ nɔ kami kaa nɔ́ ko nɛ wa ngɛ hlae ɔ maa ba mi. Nɛ wa ngɛ nɔ mi mami klɛdɛɛ ngɛ wa mi kaa níhi nɛ wa ngɛ blɔ hyɛe ɔmɛ maa su wa dɛ; nɛ wa nuɔ he ngɛ wa mi paa kaa wa nɛ nɔ́ nɛ ɔmɛ kɛ wa hɛ ngmɛ mohu se wa he ye kaa a ngɛ. 2 Hemi kɛ yemi nɛ ɔ he je nɛ blema bi ɔmɛ sa Mawu hɛ mi ngɛ.

3 Hemi kɛ yemi nɔ nɛ wa da kɛ le kaa Mawu nya mi munyu nɛ a kɛ bɔ je ɔ, nɛ e ba mi kaa nɔ́ nɛ wa nɛ kɛ wa hɛ ngmɛ ɔ mi nɛ a je kɛ pee nɔ́ nɛ fɔɔ si paa nɛ hɛ ngmɛ ngɛ hyɛe ɔ nɛ.

4 Hemi kɛ yemi nya nɛ Habel bu Mawu tue ngɛ nɛ e sã bɔ, nɛ e gu bɔ ɔ nɔ kɛ pee dalɔ nɛ Mawu he e nike ni ɔ kɛ ye e hemi kɛ yemi nɛ ɔ he odase. E ngɛ mi kaa Habel gbo momoomo mohu lɛɛ, se e he sane ɔ ji ni kasemi kɛ ha wɔ nɛ wa maa gu nɔ kɛ he Mawu ye.

5 Hemi kɛ yemi he nɛ a wo Henok kɛ ho hiɔwe ya ngɛ nɛ a ha we nɛ e gbo. Nɛ nɔ ko nɛ le, ejakaa Mawu wo lɛ. Nɛ loko ji a ma wo lɛ ɔ, Mawu ye e he odase kaa e sa e hɛ mi. 6 Nɔ ko be Mawu hɛ mi nyɛe maa sa be mi nɛ jamɛatsɛ ɔ he we Mawu nɔ yi, nɛ e ngɔɛ e hɛ kɛ fɔɛ e nɔ. Ke nɔ ko maa hɛ kɛ su Mawu he ɔ, e bi nɛ e he ye kaa Mawu ngɛ nɛ ni nɛmɛ nɛ hlaa e se blɔ anɔkuale mi ɔ, a naa lɛ, nɛ a naa he hiɔwo.

7 Nɛ Noa hu ji nɔ ko nɛ he Mawu ye. Benɛ e nu Mawu si womi ngɛ be nɛ maa ba a he ɔ, e bu tue. E ngɛ mi kaa e nɛ nyu jemi ɔ nɛ maa ba a he okadi ko mohu se e puɛ we be nɛ e kpɛ lɛ nɛ e kɛ he e kɛ e we ɔ tsuo yi wami. Hemi nɛ Noa he Mawu nɔ ye ɔ ji slɔɔto nɛ ngɛ e kɛ yayami peemi je ɔ nɛ he we Mawu nɔ yi nɛ a bui lɛ tue ɔ a kpɛti. Nɛ ngɛ e hemi kɛ yemi ɔ he je ɔ, e ba pee nihi nɛ Mawu ngɔ mɛ ɔ a kpɛti nɔ kake.

8 Hemi kɛ yemi nya nɛ Abraham bu Mawu tue ngɛ, nɛ benɛ a tsɛ lɛ nɛ a de lɛ ke e hia kɛ je e ma mi kɛ ho zugba lokoo nɛ a ma kɛ ha lɛ kaa e gbosi ni ɔ nɔ ya a, e kua we. Nɛ benɛ e hia a, e li he tete nɛ e yaa. 9 Hemi kɛ yemi nya nɛ e ya hi si womi zugba a nɔ, ngɛ bo tsuhi a mi kaa nubwɔ, kaa bɔ nɛ Isak kɛ Yakob nɛ Mawu ha mɛ hu jamɛ a si womi ɔ nɔuu ɔ pee ɔ. 10 Abraham pee enɛ ɔ, ejakaa e ngɛ Mawu blɔ hyɛe kɛ hɛ nɔ kami, konɛ e ngɔ lɛ kɛ ho hiɔwe ma nɛ ngɛ sisi tomi nɛ he wa a mi ya, nɛ e peelɔ kɛ e malɔ ji Mawu ɔ.

11 Hemi kɛ yemi nya nɛ Sara hu ba pee yo fɔlɔ ngɛ be mi nɛ e bwɔ. Se e he nɔ nɛ wo lɛ si ɔ ye, ejakaa e le kaa anɔkualetsɛ ji lɛ nɛ e maa pee nɔ́ nɛ e de ɔ. 12 Nɛ lɔ ɔ he je ɔ, a na ma mluku kɛ je Abraham mi, nɔ nɛ bwɔ jamɛ a be ɔ mi nɛ e be bi kake tete nyɛe ma fɔ. Se e bibimibibimɛ hiɛ fuu kaa hiɔwe dodoehi loo wo nya zia nɛ a be nyɛe kanemi.

13 Nimli nɛ ngɛ hemi kɛ yemi nɛ ɔmɛ tsuo gbo be mi nɛ níhi nɛ a wo mɛ si ngɛ he ɔ tsuo sui a dɛ, se a na kaa e fɔɔ si ha mɛ nɛ a bua jɔ, ejakaa a le kaa zugba nɛ ɔ nɔ pi a sihi he se mohu nibwɔhi ji mɛ ngɛ hiɛ ɔ. 14 Nɛ ke a de ja a, nɔ́ nɛ a ngɛ tsɔɔe ɔ ji kaa a hɛ ngɛ a we nitsɛ ɔ nɔ ngɛ hiɔwe.

15 Kaa a suɔ ɔ, jinɛ a ko kpale kɛ ya nyɛɛ je nɛ ɔ mi ní kpa amɛ a se ekohu. 16 Se a sume. A ngɛ hiɔwe he blɔ hlae nɛ a ya. Enɛ ɔ he je ɔ, e pee we Mawu zo kaa a ma tsɛ lɛ ke a Mawu, ejakaa e dla hiɔwe sihi he ngɔ to mɛ.

17 Be nɛ Mawu ngɛ Abraham kae ɔ, Abraham he Mawu kɛ e si womi ɔmɛ nɛ e ye lolo, nɛ lɔ ɔ he je ɔ, e ngɔ e bi Isak ngɔ ha kɛ ha bɔ sami, nɛ e pee klaalo nɛ e maa gbe lɛ ngɛ bɔ sami la tɛ ɔ nɔ. 18 Tsɛ be ɔ, kɛ gu Isak nɔ, nɛ Mawu wo si kaa e ma ha Abraham bimɛ babauu ɔ nɛ. 19 E he ye kaa ke Isak gbo tete ɔ, Mawu ma nyɛ ma tle lɛ si ekohu, nɛ lɔ ɔ ji nɔ nɛ ko ba mi ɔ nɛ, ejakaa ngɛ Abraham blɔ fa mi ɔ, e sa nɛ e gbe Isak, se e kpale kɛ ba wami mi ekohu. 20 Hemi kɛ yemi nya nɛ Isak le ngɛ kaa Mawu maa gbaa e bimɛ Yakob kɛ Esau hwɔɔ se.

21 Hemi kɛ yemi nya nɛ benɛ Yakob maa je je mi ɔ, e jɔɔ Yosef bimɛ nyumuwi enyɔ ɔmɛ benɛ e ma e yi si ngɛ e dema tso ɔ nɔ nɛ e sɔle ɔ.

22 Hemi kɛ yemi nya nɛ benɛ Yosef nyagbe maa ho sumi ya a, e tu Mawu he munyu kɛ nɔ mi mami kaa e ma je Israel bi ɔmɛ kɛ je Mizraim. Nɛ akɛnɛ e he ye veveeve he je ɔ, e ha nɛ a wo lɛ si kaa a maa ngɔ e wuhi kɛ ya. 23 Hemi kɛ yemi nya nɛ Mose fɔli ɔmɛ wo lɛ kɛ ya laa hlami etɛ sɔuu ngɛ, benɛ e ngɛ bimwɔyo mi. A na kaa Mawu ha mɛ bi pɔtɛɛ ko, nɛ lɔ ɔ he je ɔ, a na hemi kɛ yemi nɛ a yi gbeye. A he ye kaa a maa baa e yi kɛ je gbe nɛ Matsɛ ɔ ke a gbe mɛ ɔ dɛ mi.

24 Hemi kɛ yemi nya nɛ benɛ Mose ba wa a, e kplɛɛ we kaa a tsɛ lɛ Matsɛ Farao bibi ɔ nɛ. 25 Nɛ e suɔ mohu kaa e kɛ Mawu bi ɔmɛ maa na nisɛ ni a ni pe nɛ e maa ye yayami mi ngɔɔmi nɛ se kɛ we ɔ. 26 Ejakaa e na kaa ke e na nɔ nɛ e pue e hɛ mi si ngɛ Kristo he ɔ, e maa pee ni nami nɛ kle si abɔ ha lɛ pe Mizraim ni nami loo weto ni slɔɔtohi nɛ e ma na a. Ejakaa e ngɛ hwɔɔ se hiɔwo nɛ Mawu ma ha lɛ ɔ blɔ hyɛe. 27 Hemi kɛ yemi nya nɛ e je Mizraim ngɛ nɛ e yi matsɛ ɔ abofu gbeye; nɛ e ya e hɛ mi tɛɛ kaa nɔ ko nɛ ngɛ Mawu hyɛe paa. 28 Hemi kɛ yemi nya nɛ e ha nɛ a gbe jijɔ bi ngɛ, kaa bɔ nɛ Mawu fa lɛ ɔ, nɛ a ngɔ e muɔ ɔ kɛ fiã a sinya tso ɔmɛ a he ngɛ a we ɔmɛ a mi, bɔ nɛ pee nɛ Mawu Bɔfo nɔ hɛ mi kpatalɔ ɔ nɛ ko ta bi tɛte ɔmɛ a he ngɛ a we ɔmɛ a mi kaa bɔ nɛ e pee Mizraim bi ɔmɛ ɔ.

29 Hemi kɛ yemi nya nɛ Israel bi ɔmɛ po Wo Tsutsu ɔ ngɛ kaa nihi nɛ ngɛ zugba gbigbli nɔ nyɛɛe. Se benɛ Mizraim bi ɔmɛ hu ka nɛ a maa po ɔ, a tlɔ wo ɔ mi.

30 Hemi ke yemi nya nɛ Yeriko gbogbo ɔmɛ hule pue si ngɛ benɛ Israel bi ɔmɛ bɔle ma a ligbi kpaago se ɔ. 31 Hemi kɛ yemi nya nɛ yo ajuama Rahab hɛ mi kpataa we kɛ piɛ ni nɛmɛ nɛ gbo tue ɔmɛ a he, ejakaa e he Mawu ye nɛ e he hwɔɔli ɔmɛ ngɔ to we nɛ e ye kɛ bua mɛ.

32 Mɛni i ma pa de? Be bé nɛ wa maa bɔ Gideon kɛ Barak, Samson kɛ Jefta, David kɛ Samuel kɛ gbali ɔmɛ a hemi kɛ yemi he sane piɔ. 33 Nimli nɛ ɔmɛ he Mawu ye, nɛ lɔ ɔ he je ɔ, a ye kunimi ngɛ tahi a mi. A ye mahi a nɔ nɛ a hɛɛ a sisi bi ɔmɛ saminya. A nine su si womi nɛ Mawu wo mɛ ɔ nɔ; nɛ benɛ a kɛ mɛ wo jatahi a muɔ mi kɛ flɔɔnɔɔ nɛ ngɛ tsoe glegleegle mi tete ɔ, awi ko yi mɛ. 34 A ti nihi lɛɛ ngɛ a hemi kɛ yemi nya a, a je ta hahi a nya, nɛ a ti nihi na he wami ngɛ a gbɔjɔmi kɛ hiɔ numi se. A ti nihi hu tsu nyakpɛ he wami ni nguahi ngɛ ta mi, nɛ a gbɛ he nyɛli a ta slɔɔtohi kɛ fiã. 35 Yihi komɛ hu, ngɛ a hemi kɛ yemi nya a, a suɔli nɛ gbo ɔmɛ te si ekohu. Se ni komɛ hu nɛ he Mawu ye ɔ, a kpata a hɛ mi. A suɔmi nya ji kaa a ma gbo mohu pe nɔ nɛ a maa kpale ngɛ Mawu se nɛ a ngmɛɛ a he, ejakaa a hemi kɛ yemi ji hwɔɔ se ɔ, a ma na si himi nɛ hi pe nɔ nɛ mi nɛ a ngɛ ɔ.

36 A ye a ti ni komɛ a he fɛu; a fiaa ni komɛ kpa, nɛ a wo ni komɛ hu kɔsɔkɔsɔ, nɛ a wo mɛ tsu. 37 A fiaa ni komɛ tɛ nɛ a gbe mɛ, nɛ a poo ni komɛ a mi kɛ sãu. A gbe ni komɛ hu kɛ ha. A ti ni komɛ hu jijɔ kɛ apletsi he womihi ji a he bo nɛ a bu. A hi fimi mi, a wa mɛ yi mi nɛ a pee mɛ nisɛ ni a ni. 38 Je ɔ mi hí kɛ ha mɛ. A nyɛɛ kɛkɛ ngɛ ngahi kɛ yohi a nɔ, nɛ a hi muɔhi kɛ tɛ puɔhi a mi kaa nihi nɛ ta fie mɛ. 39 Nimli nɛ ɔmɛ tsuo sa Mawu hɛ mi ngɛ a hemi kɛ yemi ɔ nya mohu, se a nine sui a si womi ɔmɛ tsuo nɔ. 40 Ejakaa Mawu suɔmi nya ji kaa a to a tsui si nɛ a nine nɛ su hiɔwo nɛ hi pe lɔ ɔmɛ a nɔ hwɔɔ se.