1 Ke ji wa ngɛ hemi kɛ yemitsɛmɛ fuu kaa kikɛ ɔ nɛ ngɛ wɔ hyɛe ɔ, lɛɛ nyɛ ha nɛ waa ngmɛɛ níhi nɛ ngɛ wɔ blɔ tsie, titli ɔ, yayami ɔmɛ nɛ du wa he ɔmɛ a he nɛ wa wo hɛ mi miami kɛ tsui si tomi kɛ tu fo nɛ Mawu kɛ fɔ wa hɛ mi ɔ.

2 Nɛ waa ngɔ wa hɛ kɛ fɔ Yesu nɛ ji wa hlamitsɛ kɛ Tsɔɔlɔ ɔ nɔ. Nɔ nɛ ngɔ e he kɛ ha hɛ mi si puemi gbenɔ ngɛ sɛumi tso ɔ nɔ, ejakaa e le bua jɔmi nɛ e ma na ngɛ lɔ ɔ se ɔ. Nɛ amlɔ nɛ ɔ, e hii si ngɛ anunyami Matsɛyemi Sɛ ɔ nɔ. 3 Nyɛ kai nɔ́ nɛ e na ngɛ yayami peeli a dɛ mi kɛ ninyɛ nɛ a ngɔ kpee lɛ, bɔ nɛ pee nɛ pɔ nɛ ko tɔ nyɛ he nɛ nyɛ kɔni mi nɛ jɔ. 4 Tete po ɔ, muɔ si puemi ko be ta nɛ nyɛɛ kɛ yayami ngɛ hwue ɔ mi lolo.

5 Nɛ i heɔ yeɔ kaa nyɛ hɛ ji he wami womi munyuhi nɛ Mawu tu nyɛ kaa e bimɛ ɔ a nɔ ke, "Ye bi, ke Nutsɔ ɔ sa tue ha mo ɔ, o mi mi nɛ ko fu. O nine mi nɛ ko wo nyu ke e ngɛ mo he nɛ o dɛ ngɛ ɔ tsɔɔe. 6 Ejakaa Mawetsɛ ɔ gblaa nɔ nɛ e suɔ lɛ ɔ tue, nɛ e tsɔseɔ nɔ nɛ ji e bi."

7 Nyɛ ha nɛ Mawu nɛ tsɔse nyɛ, ejakaa e ngɛ nyɛ tsɔsee kaa bɔ nɛ tsɛ fɛɛ tsɛ nɛ suɔ e bimɛ peeɔ ɔ. Mɛnɔ na bi nɛ e tsɛ tui lɛ munyu hyɛ? 8 Ke ji Mawu gblɛ nyɛ tue ngɛ be nɛ sa mi ɔ, kaa bɔ nɛ tsɛmɛ peeɔ a bi ɔmɛ ɔ, lɛɛ e tsɔɔ kaa tsa pi Mawu bimɛ ji nyɛ niinɛ, nɛ nyɛ piɛ we e weku ɔ he. 9 Enɛ ɔ se hu ɔ, wa buu wa zugba nɛ ɔ nɔ tsɛmɛ a tsɔsemi tue, tse be ɔ, a gblaa wa tue. Mɛni he je mɔ nɛ e sɛ nɛ wa woɔ wa he kɛ haa Mawu kɛ bua jɔmi nɛ e tsɔse wɔ bɔ nɛ pee nɛ waa hi si pɛpɛɛpɛ?

10 Wa zugba a nɔ tsɛmɛ tsɔseɔ wɔ jehahi bɔɔ, bɔ nɛ a le kɛ bɔ nɛ a susuu kaa e maa hi ha wɔ, se wa Hiɔwetsɛ ɔ tsɔseɔ wɔ ngɛ wɔ nitsɛmɛ wa kpakpa he, bɔ nɛ pee nɛ wɔ hu wa na e klɔuklɔu peemi ɔ eko. 11 Tsɔsemi ko ngɔɛ ha nɔ, be mi nɛ a ngɛ lɛ tsɔsee ɔ; se pee se ɔ e naa e he se nami ɔ.

12 Enɛ ɔ he je ɔ, nyɛ wlua nyɛ he, nyɛ wo nyɛ ninehi nɛ a mi jɔ ɔmɛ a nɔ, nɛ nyɛɛ da si kpɛii ngɛ nyɛ nanehi nɛ a mi gbɔjɔ ɔmɛ a nɔ. 13 Nɛ nyɛɛ je blɔ dadehi nɛ a nɔ tɛ, bɔ nɛ pee nɛ ni nɛmɛ nɛ nyɛɛ nyɛ se nɛ a gbɔjɔ ɔmɛ a ko nɔ si nɛ a plaa a he, se mohu a na he wami.

14 Nyɛɛ bɔ mɔde nɛ nyɛ kɛ nɔ tsuaa nɔ nɛ hi si ngɛ tue mi jɔmi mi, nɛ nyɛ ha nɛ nyɛ he nɛ tsɔ nɛ nyɛɛ hi klɔuklɔu, ejakaa nɔ nɛ be klɔuklɔu ɔ, e be Nutsɔ ɔ nae.

15 Nɔ tsuaa nɔ nɛ e hyɛ e nyɛmi nɔ saminya, bɔ nɛ pee nɛ nyɛ ti nɔ fɛɛ nɔ nɛ e na Mawu jɔɔmi ɔ; nɛ nyɛɛ hyɛ nɛ e hi nɛ pɛ nɛ ko hi nyɛ kpɛti; ejakaa e woɔ haomi agbo kɛ baa, nɛ e yeɔ nihi a hemi kɛ yemi awi. 16 Nɛ nɔ ko nɛ e ko bɔ ajuama loo nɛ e ko bu Mawu blɔ nya tomi ɔmɛ yaka gu kaa bɔ nɛ Esau pee nɛ e wo si kake nya mi ngma kɛ tsake e nɔkɔtɔma blɔ nya a. 17 Nyɛ ma kai kaa pee se ɔ, benɛ e ngɛ hlae kaa a kpale kɛ ha lɛ nɛ e fo ya tete ngɛ he ɔ, e nine sui nɔ, ejakaa be ɔ be.

18 E sɛ nɛ nyɛɛ na nɔ́ ko nɛ ngɛ gbeyegbeye kaa la nɛ ngɛ tsoe glegleegle, diblii kpii kɛ kɔɔhiɔ nɛ nya wa kaa bɔ nɛ Israel bi ɔmɛ na ngɛ Sinai Yoku ɔ he benɛ Mawu ha mɛ e mlaa amɛ ɔ. 19 Ejakaa bɛ ko pɛ gbeyegbeye, nɛ gbi ko tu mɛ munyu nɛ ngɛ gbeye bɔ nɛ ni ɔmɛ kpa Mawu pɛɛ kaa e kpa munyu ɔ tumi. 20 Bɔ nɛ Mawu fami ɔ ngɛ ha a, a kpale senyasenya nɛ ke lohwe nane eywiɛtse po nɛ e he sa yoku ɔ he ɔ, e ko gbo. 21 Anɔkuale ji kaa Mose nitsɛ po ye gbeye ngɛ nɔ́ nɛ e na a he nɛ e kpokpo.

22 Se mohu nyɛ ba Zion Yoku kɛ Mawu hɛ kalɔ ɔ hiɔwe ma nɛ ji Yerusalem ɔ mi, kɛ bɔfohi babauu nɛ bua ngɛ bua jɔmi nɔ ɔ a kpɛti. 23 Nɛ nyɛ ba asafo ɔ nɛ ji nihi nɛ a ngma a biɛ ngɛ hiɔwe ɔ, kɛ Mawu nɛ ji nihi tsuo a kojolɔ ɔ, kɛ dali nɛ hi kɛ pi si nɛ a he mɛ ngɛ hiɔwe ɔ a mumihi a ngɔ. 24 Nɛ nyɛ ba Yesu nitsɛ nɛ kɛ e nyakpɛ somi he ɔ ba ha wɔ ɔ ngɔ; kɛ muɔ nɛ a fiã pue si ɔ, nɛ fɔɔ si kɛ ha yayami pami ɔ, pe muɔ nɛ biɔ nane mi tomi kaa bɔ nɛ Habel nɔ́ ɔ pee ɔ.

25 Lɔ ɔ he je ɔ, nyɛɛ hyɛ nɛ nyɛɛ bu nɔ́ nɛ munyu tulɔ ɔ ngɛ dee ɔ tue. Ejakaa ke Israel bi ɔmɛ yi a he benɛ a kua Mose nɛ ji zugba nɛ ɔ nɔ tsɔlɔ tue ɔ, kɛ maa pee kɛɛ nɛ wa be tue gblami agbo nae ke wa bui Mawu nɛ tu munyu kɛ je hiɔwe ɔ tue. 26 Benɛ e tu munyu kɛ je Sinai Yoku ɔ he ɔ, e gbi hoso zugba a, nɛ e de ke, "Jehanɛ ɔ lɛɛ i be zugba a kɛkɛ huanyae, se kɛ hiɔwe ɔ hulɔ." 27 Nɔ́ nɛ e ngɛ tsɔɔe ji kaa e ma tsake nɔ́ fɛɛ nɔ nɛ be sisi tomi kpakpa nɛ ma huanya a, nɛ lɔ ɔ he je ɔ, níhi nɛ maa si kpɛii ɔ ji níhi nɛ maa hi si.

28 Enɛ ɔ he je ɔ, nyɛ ha nɛ waa na Mawu si kaa wa nine su matsɛ yemi nɛ nɔ ko be nyɛe hɛ mi ma kpata nɔ. Nɛ wa sɔmɔ Mawu ngɛ blɔ nɛ maa sa e hɛ mi nɔ, kɛ bumi kɛ gbeye yemi. 29 Ejakaa wa Mawu ɔ e ji la nɛ kpataa nɔ hɛ mi.