1 E ngɛ mi kaa Mawu si womi kaa nɔ fɛɛ nɔ maa sɛ e he jɔɔmi ɔ mi ɔ ngɛ kɛ sa, se e sa kaa waa ye gbeye nɛ wa he nɛ kpokpo, ejakaa eko ɔ nyɛ ti nihi be mi nyɛe maa sɛ. 2 Ejakaa munyu ɔ nɛ ba su wɔ kaa Mawu ngɛ hlae nɛ e he wa yi wami ɔ, ja a nɔuu nɛ a kɛ ya ha nihi nɛ hi si ngɛ Mose be ɔ mi, se munyu ɔ nɛ a nu ɔ yí kɛ bua we mɛ, ejakaa a he we yi. 3 Ejakaa wɔ ni nɛmɛ nɛ wa he Mawu nɔ ye ɔmɛ pɛ nɛ wa maa sɛ e he jɔɔmi ɔ mi. E de ke, "I kã kita ngɛ ye abofu ɔ nya ke nihi nɛ he we ye nɔ yi ɔ, a be ye he jɔɔmi ɔ mi sɛe ligbi ɔ ko," tse be mi ɔ, e pee klaalo kɛ ngɛ mɛ mlɛe kɛ je be mi nɛ a bɔ je ɔ tɔɔ.

4 Nɛ wa le kaa e pee klaalo nɛ e ngɛ mlɛe, ejakaa a ngma ke, Mawu jɔɔ e he ngɛ ligbi nɛ ji kpaago ɔ nɔ benɛ e bɔ níhi kulaa gbe nya a.

5 Nɛ tete po a sɛ we mi, ejakaa Mawu de ngɛ nyagbe mi kulaa ke, "A be ye he jɔɔmi ɔ mi sɛe." 6 Se kɛ ɔ, si womi ɔ ngɛ, nɛ ni komɛ sɛ mi, se pi ni nɛmɛ nɛ na kekle he blɔ ɔ, ejakaa a gbo Mawu tue nɛ a sɛ we mi.

7 Se e to be kpa nɛ a kɛ ba mi, nɛ jamɛ a be ɔ ji mwɔnɛ ɔ. E fiɛɛ enɛ ɔ kɛ gu Matsɛ David nɔ blema bebeebe benɛ nɔmlɔ nyɛ we mi nɛ e sɛ kekle ɔ, nɛ e de kaa bɔ nɛ a de momo ɔ ke, "Mwɔnɛ ɔ ke nyɛ nu ye gbi ɔ, nyɛ ko wlua nyɛ tsui" ɔ.

8 Se he jɔɔmi hé he nɛ ɔ nɛ e ngɛ he munyu tue ɔ, e pi Israel zugba a, he nɛ Yoshua kpaka mɛ kɛ ya a. Kaa lejɛ ɔ he munyu nɛ e ngɛ tue ɔ jinɛ tsa pi pee se nɛ e maa tu jamɛ a munyu ɔ nɛ e ma de ke, "mwɔnɛ ɔ" ji e mi sɛmi ligbi ɔ. 9 Lɔ ɔ he je ɔ, he jɔɔmi kulaa ngɛ kɛ ha Mawu bimɛ kɛ sa. 10 Nɛ Kristo ya sɛ lejɛ ɔ momo ngɛ e he jɔɔe ngɛ e ni tsumi ɔ nyagbe ɔ mi kaa bɔ nɛ Mawu pee benɛ e bɔ níhi kulaa gbe nya a. 11 Lɛɛ nyɛ ha nɛ wa gbo dengme nɛ wɔ hu wa ya sɛ jamɛ a he jɔɔmi ɔ mi, nɛ e ko ba mi kaa wa ma ya gbo Mawu tue kaa bɔ nɛ Israel bi ɔmɛ pee nɛ a sɛ we mi ɔ.

12 Ejakaa Mawu munyu ngɛ he wami, nɛ e ngɛ hɛ ngmle, nɛ e nya ba pe ha nya enyɔtsɛ, nɛ e gbɔɔ kɛ yaa wa mi tsitsaa he nɛ wa susumi kɛ akɔnɔ ni ɔmɛ ngɛ ɔ, nɛ e jeɔ bɔ nɛ wa ngɛ ɔ kpo kɛ tsɔɔ. 13 E le bɔ nɛ nɔ tsuaa nɔ ngɛ ha ngɛ he fɛɛ he. Nɔ́ fɛɛ nɔ nɛ ngɛ wa he ɔ fɔɔ si paa ngɛ wa Mawu hɛ kalɔ nɛ naa nɔ tsuaa nɔ ɔ hɛ mi. A be nyɛe ma wo nɔ́ ko kɛ laa lɛ, nɛ lɛ wa maa jaje nɔ́ tsuaa nɔ nɛ wa tsu ɔ kɛ tsɔɔ.

14 Se Yesu nɛ ji Mawu Bi ɔ ji wa Osɔfo Nɔkɔtɔma, nɔ nɛ ho hiɔwe nitsɛ ya konɛ e ye kɛ bua wɔ ɔ. Lɔ ɔ he je ɔ, nyɛ ha nɛ wa he e nɔ waa ye nɛ wa ko jɔɔ. 15 Wa Osɔfo Nɔkɔtɔma nɛ ɔ le wa gbɔjɔmi ɔmɛ tsuo nɛ e nuɔ he kɛ haa wɔ, ejakaa a ka lɛ kaa bɔ nɛ a kaa wɔ hu ɔ, se lɛɛ e ha we he blɔ nɛ ka ko nɛ ye e nɔ gblee nɛ e pee yayami.

16 Lɔ ɔ he je ɔ, nyɛ ha nɛ wa wo kã kɛ hɛ kɛ su Mawu dloomi matsɛ sɛ ɔ nitsɛ he, nɛ waa hi lejɛ ɔ bɔ nɛ pee nɛ wa nine nɛ su mɔbɔ nami nɔ; nɛ wa na dloomi nɛ maa po wa he kpa ngɛ fimi be mi.