1 Yinnippa suuba, taanii salo be7ize wode bugunttide furtsi bi7ida. Mahi ta tiino si7ide moyze oolle gaarze ootsi taago, «Hyankka kezo; hyannippa suuba, yi7ades yeze baz ta nena beessada» gayda. 2 Ye wode ta Ayyaana qofara yene. Yikke, salo araata bi7ida; araatizella afa fete bettidaya bi7ida.✝ 3 Ye bettiday bishshita iyaspheden sarddiyoone gaaze al77o shuchchi fana. E araatize kantto wutii al77o shuchchi aazize zuulla yene. 4 Ye araatize kantto wutii lam7itam oyddii araatuntsi yene; unttalla afa bootsi ma7o ma77i, ommite worqqa zawude gaddide lam7itam oyddii cimuntsi bettida. 5 Araatizeppa dada, zelintsin dhoge kezane. Araatize tiintte laappun foo7ize xomppuntsi yene; un laappun Xoozze ayyaanutsana.✝ 6 Araatize tiino birille aazize foo7ize burccuqo aazze abba yene.✝✝

Tiinoran suubara aafe kumide oyddii xoots medhetuntsi araatize kantte yene. 7 Tiino xootsize bishshita gaammo aazane; lam7antsize bora aazane; hyaydzantsize as sino aazize sino yene; mahi oydantsize firize ankko aazane. 8 Oyddii xootsuntsi ubbuntsis izipun qefe yene; un galtta ubban qefitis kattaran ommita ubba aafera kumida.✝Un qamman awaran ashshikaayzara,

«Geeshshayo, geeshshayo, geeshshayo,

Laatstsayo, Ubbappa Wolqqaama Xoozayo,

zagan, hyatten yezayo, tiinos yo7odayo»

yagaane. 9 Ye xootsuntsi araatizella bettidaysin medhina yezes nashsho, bonchchon galata inggide wode 10 lam7itam oyddii cimuntsi araatizella bettidays medhina yezays tiintte zuggii goynida; fa worqqa zawuduntsana tiintte gaddii,

11 «Nu Laatstsayo, nu Xoozayo,

neenii bonchcho, nashshon wolqqa ekkodes beezane.

Ne ubba medhdhida;

ubba bazi ne qoftti gaar hyanida, medhinttida»

yagayda.