Atos 2

Phexiroosa ohe

14 Yezin Phexiroosa, taphpho fettii hawaaruntsara denddii eqqii, fa qaaltto dhoqi yiizii, unttago hyannigaara yaga7i ohida: Ayhuduntso, Yerusalaame yeze ubbuntso, ta ohizanno si7ote. 15 Wonttappa hyaydzdzii saate maaqqide gisho yin qoppizannigaara hyantsi asuntsi matsinttikaaya; yinna yin achcha erinttidebaz maaqqo. 16 Yezin hyanna hyanidanna nabe Iyu7eella ohidanna folinttode fana.

17 « ‹Xoozii, wode wurssutsite hyannigaara hyanoda yagaane:

taanii as ubballa ta Ayyaana gussoda.

Yin dhiiratsi na7untsin maachi na7untsi,

tinbbite ohoda.

Yin yidhdhuntsi qonccitsi be7ada;

yin cimuntsi abukko abukkoda.✝2:17-21 Iyu. 2:28-32

18 Yinna wodite tana ammanze dhiiratsi aruntsallan maachi aruntsalla

ta ta Ayyaantto gussoda;

un tinbbite ohoda.

19 Mahi taanii afa salo kille baz,

yeekka sa7a malla beessada.

Suutsi, taman damma cuga qayqayo benttoda.

20 Damman bonchcho maaqqide Laatstse wode,

yellodannippa tiino awa dhumoda;

aginan suutsi fana yi7ada.

21 Yinna wodite hyannigaara yi7oda;

Laatstse suntsito xeegize ooden attoda› yagayda.

22 «Isra7eele asuntso, hyanna qaaltto si7ote. Naazirete Yesuusa oona yezako, Xoozii yin gidda oochchide kille bazin mallan yinttis qonccidanno yin, yin ommite erane. 23 Xoozze tiino qofiten E eritii baggara Yesuusa aadhii ingginttida. Yinttin eza higge baayzuntsi kushe masqalalla suxxii wodhida.✝2:23 Maato. 27:35; Mar. 15:24; Luqa. 23:33; Waha. 19:18 24 Yezin hyayqo eza aykkodes dandda7oosse gisho Xoozii hyayqo wolqqa dhabsi eza dentstsida.✝2:24 Maato. 28:5-6; Mar. 16:6; Luqa. 24:5 25 Dawute E baz ohitera,

« ‹Taanii tannaame fana,

Laatstsii ta mizaqite yene.

Laatstsa ubba wode ta tiino be7ine.

26 Yinnii gisho, ta wozintta ufayttida;

ta il7antsite ufayssi kumida;

hyayqqize ta ashita ufayssara yessada.

27 Akkos gayko, ta shemppito si7oole gidda ashshoos.

Mahi ne Geesha wooqas ashshoos.

28 Ne tana de7o oge erisida;

Ne taara yezannippa ta ufaysita kumutsi maaqqane›✝2:28 Maz. 16:8-11yagayda.

29 «Ishuntso, nu aday Dawutebaz ta yinttis geeshi ohoda. Dawute hyayqqii mooginttida; E boozita hyayno yellodes nu kale yene. 30 Dawute nabe maaqqide gisho Xoozii E na7untsappa feta E ka7itumo araatalla bettitsodes ees caaqqide caaqito erane.✝2:30 Maz. 132:11; 2 Sam. 7:12-13 31 Yinnii gisho, Kiristtoosa denddito tiino bi7i, ‹E shemppita si7oole benttaamannon; E ashita wooqaamanno› ohida.

32 «Xoozii, hyaya Yesuusa hyayqoppa dentsidannis nuunii ubbuntsi markka. 33 Yinnii gisho, Xoozze mizaqi zalara eza dhoqi dhoqi yiizii, ees inggoda ga7inttide Geeshi Ayyaan Adeppa ekkii, hyanno yin hyatte be7izannon si7izanno nuulla afa gussida. 34,35 Akkos gayko, Dawute fa ommite salo kezikaaya yezin:

«Laatstsi, ta Laatstsa, ‹Ta ne morkkuntsana

ne tohita yedhdhize bessi mahode wontsis

hyanne taappa mizaqi zala betto gayda›

yagayda.✝2:34-35 Maz. 110:1

36 «Yinnii gisho, hyay yin masqalalla suxxide Yesuusa, Xoozii Laatstsin Kiristtoosa mahidanno Isra7eele as ubbuntsi turip ero» yagayda.

37 Asuntsi Phexiroosa ga7idanno si7eze wode fa wozintte azzanii bochinttii Phexiroosan hyankuntsi hawaaruntsago, «Ishuntso, yeezin nuunii akko oochcho?» yagayda.

38 Phexiroosa unttago, «Yin nagartta atto ga7inttode gaar nagarttippa maaqqii, yin fete fete Yesuus Kiristtoosa suntsite xammaqinttote. Xoozii inggize Geeshi Ayyaana imo ekkoda. 39 Xoozii inggoda gayde ufays qaala yinttis, yin na7untsisin Laatstsii nu Xoozay faago xeegize hyaako yeze ubbuntsis» yagayda.

40 Phexiroosa unttis melle qaalan gujjii markkidhii, «Hyantsi wobbo asuntsalla yo7odes yeze firddappa yin ommito ashshote» yaga7i zorida. 41 Phexiroosa ohidanno ekkiduntsi xammaqinttida. Ye wode hyaydzdzii mukul maaqqade asuntsi ammanii gujunttida.