1 Vinu kwa visoweru vya viboga vyavitambikilitwi vinyagu.

Tuvimana kuwera twawoseri twenga twana malifa, kumbiti malifa aga gawatenda wantu walitumbiri, kumbiti mafiliru ganyawa. 2 Walii yawalihola kuwera wamana kila shintu, nakaka wavimana ndiri shintu shoseri ntambu yashifiruwa kuvimana. 3 Kumbiti muntu yakamfira Mlungu, yomberi kamanikana na Mlungu.

4 Su visoweru vya kuliya viboga vyavitambikilitwi vinyagu, tuvimana kuwera vinyagu shintu ndiri pasipanu, twenga tuvimana kuwera Mlungu kayumu hera. 5 Ata paviwera vintu vyavishemwa milungu pasipanu ama kumpindi kwa Mlungu, ata pawawera "milungu" Wavuwa na "watuwa" Wavuwa, 6 kumbiti twenga twana Mlungu yumu hera, Tati yakaumbiti vyoseri na kupitila mweni twenga tulikala. Vilaa kwana Mtuwa yumu hera, Yesu Kristu na kupitila mweni vintu vyoseri viumbwa na kupitira mweni twenga tulikala.

7 Kumbiti kila muntu ndiri kagamana goseri aga, kwana wantu wamu wawera na vitiba vya kutambikira vinyagu, wantu weni mpaka vinu pawaliya viboga avi walihola kuwera vitambikirwa vinyagu. Toziya mmoyu yawu iwera legilegi, su walihola weni kuwera watenda vidoda kwa kuliya viboga avi. 8 Shiboga hapeni shiwezi kutujega tuweri pakwegera na Mlungu, patuleka kuliya hapeni tupungukiwi na shintu shoseri na patuliya hapeni twongereki na shintu shoseri.

9 Kumbiti muliloli weri, ulekeziya wenu naguwatenda walii yawawera na njimiru legilegi watendi vidoda. 10 Handa muntu yakawera na njimiru legilegi, pakakuwona gwenga yaguvimana gwankuliya viboga avi mnumba mwa vinyagu, hashi, hapeni kaweri na njimiru ya kuliya viboga vyavitambikilitwi vinyagu? 11 Kwa njira ayi, muyenu ayu kana njimiru legilegi, ndomweni Kristu kahowiti kwajili yakuwi, shilii gwenga shagushishema gushimani. 12 Handa pamuwatendera vidoda walongu wamwenga ntambu ayi na kuyitenduwa munjimiru yawu legilegi, su mwenga mwankumtendera vidoda Kristu. 13 Hangu, handa shiboga shitenda kuguwa kwa mlongu gwangu katendi vidoda, hapeni ndiyi shinofu kayi, naniza kumtenda mlongu gwaneni katendi vidoda.