1 Pawaamuwiti kala twendereyiti na mwanja mpaka Italiya, wamtuliti Paulu pamwera na watatirwa wanonga pasi pa ulolera wa Yuliu yakaweriti mkulu gwa mashonta pakati shipinga yawashishema "shipinga sha Augustu." 2 Tukweniti uwatu mkulu ya Adiramitu iweriti yangugenda na kupitira bandali zimu za mkowa gwa Asiya, tuyanja mwanja. Alisitariku, mwenikaya gwa Makedoniya kulawa Tesaloniki, kaweriti pamwera natwenga. 3 Shirawu yakuwi tusulusiyi nanga pakati pa bandali ya sidoni. Yuliu kamtendiriti Paulu viheri kwa kumluusu kawawoni waganja wakuwi na kumpanana nfiru zyakuwi. 4 Kulawa aku twendereyiti na mwanja, kumbiti kuweriti na lihega liweriti lyankuvuma kwa kanongola nentu kutuyizira kwa ulongolu, tupitiliti uwega wa shisiwa sha kupiru kweni lihega liweriti livuwa ndiri. 5 Shakapanu tulokiti bahali ya kilikiya na Pamfiliya, tusulusiiti nanga Mura, lushi lya Lukiya. 6 Panu afisa ulii kawoniti uwatu mkulu yimu ya Alekizandiriya yaiweriti yankugenda Italiya, na hangu katukweniziya twingira mngati mwakuwi. 7 Tugenditi mpolimpoli kwa mashaka gavuwa na kwa ntabiku tusokiti pakwegera na Kenidu. Toziya lihega liweriti lyankali lyankutukoma, tupitira uwega wa kushana kushisiwa sha Kireti, kugenda Salumoni. 8 Tupititi pambeku yakuwi mpolimpoli kwa ntabika tuyingiriti pahali pawapashema "Bandali nyanyi," pakwegera na lushi lwa Laseya. 9 Shaka shivuwa shipititi, na hata mashaka ga kulikala pota kuliya gaweriti gaperiti kala. Vinu iweriti atali nentu kugenda na uwatu mkulu. Su, Paulu kawayupiti moyu, 10 "Watuwa, nulihola handa mwanja agu haguweri gwa ntabiku na kwa asala ivuwa kwa memiziwu ya uwatu mkulu hera, ila viraa kwa makaliru getu." 11 Kumbiti afisa ulii kakwegitwi nentu na maholu ga nahoza na ga mweni kana uwatu mkulu kuliku galii gakatakuliti Paulu. 12 Toziya bandali ayi iweriti ndiri pahala paherepa pa kulivaga shaka sha mbepu, wavuwa wafiriti kwendeleya na mwanja, payiwezekana mpaka Foiniki. Foiniki ndo bandali ya Kireti yaigenda kushana na kwaguzyeta mshenji na kusika na kwaguzyeta mshenji, na aku mewawezi kulivaga shaka sha mbepu.

13 Su, lihega lyanyanyi lya kusi lyanjiti kuvuma, nawomberi washeriti wapata lengu lyawu. Hangu wawusiya nanga, wendesha uwatu mkulu pakwegera nentu na mpeku ya Kireti. 14 Kumbiti katepu hera, lihega likalipa lishemwa "Lihega lya kusika" liyanja kuvuma kulawa kushisiwa. 15 Lihega liikomiti uwatu mkulu ilii, na toziya tusinditi kulidiwira, tuyileka ijegwijegwi na lihega ali. 16 Litanda limu lyalishemwa Kauda litupingira shididini kwa liyega lilii, na patupititi kusika mwakuwi tufauliti, iweriti kwa tabu, kusalimisha uwatu gwa uwatu mkulu. 17 Wanamashi walii wagunikiti uwatu mngati, shakapanu wayizyengetiziya uwatu mkulu ngoyi na kuitawa kwa likakala. Watiriti kuwera mewawezi kugomuluwa pambeku pa Siriti. Hangu wasulusiyiti matanga na kuyileka uwatu mkulu ijegwijegwi na lihega. 18 Lipuga lyendereyiti kuvuma na shirawu yakuwi wayanja kuyasa kunja shehena ya uwatu mkulu. 19 Lishaka lya tatu, wayanja viraa kuyasa mmashi vintu vya uwatu mkulu kwa mawoku gawu weni. 20 Kwa shaka sha mashaka gatangala tuweza ndiri kuwona mshenji ama ntondi, lipuga lyendereyiti kuvuma nentu, ata litumbiru lyoseri lya kuponeka litupera.

21 Pa kulivaga shaka shitali pota kuliya shiboga, Paulu kagolokiti pakati pawu, katakula, "Waheshimiwa, meyiweriti mbaka handa mungampikiniriti na kuleka mwanja kulawa Kireti handa mngatenditi hangu metushapili tabu ayi na asala zoseri azi. 22 Kumbiti vinu nankuwaluweni muweri na moyu, kwahera hata yumu gwenu mekahowiziyi ukomu wakuwi, uwatu mkulu hera ndo haiyagamili. 23 Toziya lishu ntumintumi gwa kumpindi gwa ulii Mlungu mweni neni ndo gwakuwi na yomberi neni numguwira kandawiliti, 24 kang'ambira, ‘Paulu, kotukutira! Mpaka hagugoloki pawulongolu pa Kayisari, na Mlungu, kwa lusungu lyakuwi kakutangi kwa kuwalopoziya woseri wawagenda mwanja na gwenga.’ 25 Hangu, wahishimiwa, mulipanani moyu! Toziya numjimira Mlungu kuweri hayiweri teratera ntambu yawang'ambiriti. 26 Kumbiti ndo mpaka hatuyaswi kumpeku kushisiwa tunga."

27 Pashiru pa lishaka lya lilongu na msheshi tuweriti twankukwegwa aku na aku mubahali ya Adria. Pakwegera na pashiru nentu, washima miuwatu waliholiti kuwera wapakwegera na isi iyuma. 28 Hangu wasakuliti utali wa bahari kwa kusulusiya lugoyi lwawatawiti shintu shitopa, wapata utali wa mita malongu msheshi. Shakapanu wapima kayi wapata mita malongu matatu. 29 Toziya ya kutila kugomuluwa mumatalawu, wasulusiyiti nanga msheshi kumpeli kuuwatu mkulu, waluwa kushii kanongola. 30 Wanamashi wafiriti kushapira, na wasulusiyiti kala uwatu mmashi, walipayira handa wagenda kusulusiya nanga uwega wa kulongolu kwa uwatu mkulu. 31 Kumbiti Paulu kamgambiriti mkulu gwa jeshi ulii na wanjagila wakuwi, "Handa wanamashi awa hapeni wasigali mngati mwa uwatu, hapeni mlopoziwi." 32 Panu wanjagila walii wazidumuliti ngoyi zyaziweriti zikolera uwatu, waguleka gutolwi na mashi.

33 Pakwegera na mandawira, Paulu kawahimiziyiti woseri walii shiboga "Kwa mashaka lilongu na msheshi vinu muwera mumashashatiku na pota kuliya, hamweni lii shintu shoseri. 34 Su, nuwaluwa mlii shiboga toziya mshifira su muwezi kwendeleya kulikala. Toziya ata viri yimu mumituwi yenu hapeni yagamiri" 35 Pakatakulita kala hangu, Paulu katoliti libumunda, kalonga maya ga shi Mlungu pamberi pa woseri, kaumega, kanja kuliya. 36 Panu woseri wapata moyu, na womberi vila waliya shiboga. 37 Woseri waweriti wantu mia mbili na malongu saba na sita muuwatu mkulu. 38 Pa kila yumu kuliya shiboga sha kwikuta, wapunguliti kutopa kwa uwatu mkulu kwa kuyasa viboga mubahari.

39 Pawushiiti, wanamashi wawezandiri kuyimana isi ilii. Ira wawoniti guba yimu yana mpeku, Waamuwa kusulusiya nanga aku handa payiwezikana. 40 Hangu wazidumuliti nanga na kuzileka mubahari, na shaka shiraa ashi waziyopola ngoyi zaziweriti ziguyopa msukanu, shakapanu wagolosiya tanga yimu palongolu kukola lihega, wagenditi kumpeku. 41 Kumbiti wasokiti pahali pena mikondu miwili ya bahari iliwona, na uwatu mkulu igomuluwa. Seemu ya palongolu iweriti imiruwa mumhanga pota kutikinyika. Seemu ya kumbeli ya uwatu mkulu iyanjiti kumegeka vipandi vipandi kwa makomangu ga likakala lya makupala. 42 Wanjagira wafiriti kuwalaga watatirwa woseri kwa kutira handa wankusuga mpaka kumbeku na kutoloka. 43 Kumbiti toziya afisa jeshi ulii kafiriti kumlopoziya Paulu, kawaberiti nawatenda hangu. Kaamuliti walii yawamana kusuga wakopoki kulawa muuwatu mkulu na kusuga mpaka kumpeku. 44 Na wamonga wayizi pawalikolilera mumbawu ama muvipandi vya uwatu mkulu vyavimegikiti. Ndo twenga ntambu yatusokiti nyanyi kumpeku.