1 Na mwenga wakulu, muwatenderi wamanda wenu kwa uherepa na kulinganira Mlungu ntambu yakafira, pamuvimana kuwera mwenga viraa mwanayu Mtuwa kumpindi kwa Mlungu.

2 Mwendereyi kumluwa Mlungu, na pamumluwa Mlungu muliloleri hweri, pamlonga mayagashii Mlungu. 3 Mtuluwili twenga viraa vilii, su Mlungu katuvuguliri ligomi toziya ya ujumbi wakuwi su tuwezi kubwera bada ya Kristu. Toziya ya bada ayi, vinu neni namushibetubetu. 4 Vinu mumluwi Mlungu, su neni mwezi kulonga ntambu yanfiruwa, na bada ntambu paiwera lupalahera.

5 Muweri na luhala pamulikala na wantu yawammana ndiri Mlungu, mtumiyi hweri lupenyu lwamuwera nalu. 6 Visoweru vya mwenga vifiruwa viweri viheri mashaka goseri na vyakufiliziya, na mfiruwa kuvimana ntambu ya kumwankula hweri kila muntu.

7 Numjega Tukiku kwa mwenga mlongu gwetu mfiruwa, mtenda lihengu mwaminika na ntumintumi muyetu mulihengu lya Mtuwa, hakawagambiri visoweru vyangu vyoseri. 8 Numtuma kwa mwenga su kawatuli moyu kwa kuwagambirani visoweru vyetu. 9 Kankwiza pamuhera na Onesimu, mlongu gwetu yatumfira na mwaminika, yomberi ayu ndo mwenikaya muyenu. Hawawagambiri visoweru vya vitwatira vyoseri vyavitendeka panu.

10 Alisitariku, yakawera mushibetubetu pamuhera na neni, kankuwalamsiyani, viraa vilii Mariku, mwipa gwakuwi Barinaba kankuwalamsiyani. Mpata kala malagaliru ga visoweru vyakuwi, pakasoka kwa mwenga mumshemeri. 11 Yoshuwa yawamshema Yustu, kankuwalamsiyani. Pakati pa Wayawudi wawankiti kala njimiru, awa hera gweka yawu ndo yawatenda lihengu pamuhera na neni kwajili ya ufalumi wa Mlungu, womberi wantula moyu nentu.

12 Epafura, yakawera mwenikaya muyenu na ntumintumi gwa Yesu Kristu, kankuwalamsiyani. Mashaka goseri kankuwaluwira mwenga kwa Mlungu su mpati kugoloka na mkamali na mgangamali muvitwatira vyoseri vyavimfiriziya Mlungu. 13 Neni mweza kutakula ukapitawu kuwera kankutenda lihengu nentu kwa mwenga na kwa wantu wa Laudikiya na walii yawawera Hierapoli. 14 Luka, mganga gwetu yatumfira, na Dema wawalamsiyani.

15 Muwalamsiyi walongu wetu wa Laudikiya. Mumlamsiyi dada Nimfa pamuhera na shipinga sha wantu yawamjimira Yesu yashiwera mnumba yaku. 16 Pambetula kala luhamba alu, muwapanani wayenu wa shipinga sha wantu yawamjimira Yesu aku Laudikiya wabetuli, na luhamba lyanuwalembeleriti wantu wa Mlungu wa Ladiokiya wawapanani mwenga, na mwenga mulubetuli. 17 Mumgambiri Arikipu katendi weri lihengu lilii lyakapanitwi na Mtuwa.

18 Neni Paulu nemba aga kwa liwoku lyangu mweni, nuwalamsiyani. Muliholi kuwera nakushibetubetu. Manemu ga Mlungu gaweri pamuhera na mwenga.