1 Mafalisayu wapikiniriti handa Yesu kaweriti kankubatiza na kankuwapata wafundwa wavuwa kuliku Yohani. 2 Kumbiti nakaka Yesu kawera ndiri kankubatiza ira wafundwa wakuwi ndo waweriti wankubatiza. 3 Yesu pakapikaniriti aga, kalawa Yudeya kagenda Galilaya, 4 pamwanja gwakuwi kalazimika kupitila Samariya.

5 Su kasokiti Sikari, lushi lumu lwa Samariya, pakwegera na lirambu lilii Yakobu lyakampananiti mwana gwakuwi Yosefu. 6 Na panu paweriti na linegu lya Yakobu. Yesu kaweriti katoka toziya ya mwanja, su kalivagiti pasi pampenku pa linegu. Iweriti ipata saa sita paliwala.

7 Mdala Msamariya kiziti kuteka mashi na Yesu kamgambira, "Gumpanani mashi nandi." 8 Wafundwa wakuwi wagenditi mulushi kuhemera shiboga.

9 Mdala uliya kamgambira, "Gwenga gwa Muyawudi, neni na Msamariya! Su guwezahashi kunduwa mashi ga kulanda?" Wayawudi hapeni watumii lwindi na vibakuli vyavihanganyikiti na vya wantu wa Samariya.

10 Yesu kamwankula, "Handa meguvimaniti mafupu ga Mlungu na gaa yakakuluwa mashi ga kulanda, megumluwi na yomberi mekakupi mashi ga ukomu."

11 Mdala uliya kalonga, "Mtuwa, gwenga gwahera shintu sha kutekera mashi na linegu ndo litalipa. Su, hagupati koshi mashi gana ukomu? 12 Mbuyi gwetu Yakobu ndo yakatupiti linegu ali, yomberi na wana wakuwi pamuhera na mifugu yakuwi yoseri walanditi mashi aga. Ashi gwenga gulitumba kuwera mkulu kuliku Yakobu?"

13 Yesu kamwankula, "Woseri walanda mashi aga hawaweri na kwimiluwa kayi. 14 Kumbiti yoseri yakalanda mashi ganumpanana neni, hapeni kaweri na kwimiluwa kayi. Mashi ganumpanana hagaweri mngati mwakuwi mbwiru ya mashi ga ukomu na kumpanana ukomu wa mashaka goseri."

15 Mdala uliya kamgambira, "Mtuwa, gunupi mashi aga! Shakapanu hapeni numuluwi kayi na hapeni nizi kayi panu kuteka mashi."

16 Yesu kamgambira, "Gugendi gwakamshemi mpalu gwaku gwizi nayomberi."

17 Mdala uliya kamwankula, "Neni nahera mpalu,"

Yesu kamgambira, "Gutakula weri pagutakuliti gwahera mpalu. 18 Guyugwa na wapalu wamuhanu, yomberi yagulikala nayu vinu, mpalu gwaku ndiri. Gung'ambira nakaka."

19 Mdala uliya kamgambira, "Mtuwa, mona gwenga gwa mbuyi gwa Mlungu. 20 Wambuyi wangu wa Samariya wamguwiriti Mlungu mulugongu alu, su mwenga Wayawudi mlonga kuwera Yerusalemu ndo pahala pa kumguwira Mlungu."

21 Yesu kamgambira, "Mdala, gunjimiri, shaka shankwiza ndo sheni wantu hapeni wamguwira Tati mulugongu alu ama ku Yerusalemu. 22 Mwenga Wasamaliya muvimana ndiri nakaka yawamguwira, kumbiti twenga Wayawudi tumumana yatumguwira, toziya ulopoziya wiza kulawa kwa Wayawudi. 23 Kumbiti shaka shankwiza na kayi shisoka kala, peni wawamguwira nakaka, hawamguwili Tati kwa likakala lya Rohu, wantu wamguwira hangu ndo Tati yakawafira. 24 Mlungu ndo Rohu, na wantu hawawezi hera kumguwira nakaka kwa likakala lya Rowu gwakuwi."

25 Mdala ulii kamgambira, "Nuvimana kuwera Kristu Mlopoziya yakasyagulitwi hakizi na pakiza hakatugambiri twenga kila shintu."

26 Yesu kamgambira, "Neni, ndo yantakula na gwenga."

27 Shaka shila shilii wafundwa wa Yesu wawuyiti na waweriti na likangasha likulu pawamwona Yesu pakatakula na mdala. Kwehera yumu pakati pawu yakamgambiriti mdala ulii, "Gufira shishi?" Ama kumkosiya Yesu, "Iwera hashi gwankutakula na mdala ayu?"

28 Su, mdala uliya kaileka vulu yakuwi, kagenda mulushi na kuwagambira wantu, 29 "Mwizi mloli muntu yakang'ambiriti vitwatira vyoseri vyantenditi. Hashi, iwezikana yomberi kawera Kristu yakasyagulitwi na Mlungu?" 30 Wantu walawa mulushi, wamgendera Yesu.

31 Shaka shila shiriya wafundwa waweriti wankumuhiga Yesu, "Mfunda, gulii shiboga!"

32 Su Yesu kawankula, "Neni nana shiboga shamshimana ndiri."

33 Wafundwa wakuwi walitakuziyana weni, "Hashi, kwana muntu yoseri yakamjegiriti shiboga?"

34 Yesu kawagambira, "Shiboga shaneni ndo kugajimira gakafira ulii yakantumiti neni na kumalira lihengu lyakampananiti kutenda. 35 Mwenga mtakula, ‘Kunkali myezi ya msheshi hera, shaka sha kubenanga hashisoki.’ Su nukugambirani, mloli marambu, viboga vinu vipiya kala na viwera kala kubenanga! 36 Yakabena viboga kankupata shibenamgongu na kankujojinira viboga kwa mashaka goseri, su yumonga yakayala na ulii yakabena hawanemeleri pamuhera. 37 Kutakula aku kwa nakaka, ‘Yumu kayalaga na yumonga kabenaga.’ 38 Neni nuwatumiti mwenga mwakabeni viboga mulirambu mtenda ndiri lihengu, wamonga watenditi lihengu kulii na mwenga mwana mota kulawirana na lihengu lyawatenditi."

39 Wasamariya wavuwa mulushi lulii wamjimiriti Yesu toziya mdala uliya katakuliti, "Kang'ambiriti neni shintu shoseri shantenditi." 40 Su Wasamariya pawamgendiriti Yesu, wamuluwiti yomberi kalikali pamuhera na womberi na Yesu kalikaliti kulii mashaka mawili.

41 Wantu wavuwa wamjimiriti toziya ya ujumbi wakuwi, 42 na womberi wamgambira mdala uliya, "Vinu twenga tujimira, toziya ndiri ya shilii shagutakuliti, ira toziya twenga tumpikanira twaweni na tuvimana kuwera nakaka ndo Mlopoziya gwa pasipanu."

43 Pagapititi mashaka mawili, Yesu kawukiti paliya na kugenda Galilaya. 44 Mana Yesu mweni katakuliti, "Mbuyi gwa Mlungu hapeni kapananwi ligoya muisi yakuwi." 45 Pakasokiti Galilaya, wantu wa paliya wamshemiriti, toziya pawaweriti mumsambu gwa Pasaka kulii Yerusalemu wawonaga vitwatira vyoseri vyakatenditi Yesu shaka sha msambu.

46 Su Yesu kawuyiti kayi Kana mumkowa gwa Galilaya, pahala pakagalambuziti mashi kuwera divayi.Ofisa gwa sirikali kaweriti paliya mwana gwakuwi kaweriti kalwala ku Kafarinaumu. 47 Pakapikaniriti handa Yesu kankwiza Galilaya pakalawila Yudeya, kamgendiriti yomberi na kumgambira kagendi Kaferinawumu na kamuponiziyi mwana gwakuwi, yakaweriti sambira kahowa. 48 Yesu kamgambira, "Pamwona ndiri malangaliru na mauzauza, hapeni mjimiri!"

49 Afisa ulii kamwankula, "Mtuwa, tugendi pamuhera vinu, mwana hakeni howi."

50 Yesu kamgambira, "Gugendi, mwana gwaku hakaweri mkomu!"

Muntu uliya kavimaniti visoweru vya Yesu, su kagenda zakuwi. 51 Pakaweriti kankali munjira kuwuya ukaya kaliwoniti na wantumintumi wakuwi pawamjegera visoweru, "Muntemba gwakuwi kawera mkomu!"

52 Kawakosiya shaka gaa mwana gwakuwi pakaweriti mkomu na womberi wamwankula, "Iweriti saa saba paliwala lishu nshimba kupyupa paimlekeziyiti." 53 Tati uliya kaliholiti kuwera shaka shiliya ndo Yesu pakamgambiriti, "Mwana gwaku hakaweri mkomu." Su mweni pamuhera na kaya yakuwi yoseri wamjimira Yesu.

54 Liuzauza ali ndo lya pili lyakatenditi Yesu pakaweriti kankulawa Yudeya na kugenda Galilaya.