ह़ोना नी मुर्ती ने वांदवा नो हुकम
1 नबुकदनेस्सर राजो ह़ोना नी एक मुर्ती बनाड़्यो, जीनी उचाय साट हात, अने चवड़ाय छोव हात नी हती। राजो तीने बेबीलोन देस ना दुरा नाम ना चोवगान मे उबी करायो। 2 तत्यार नबुकदनेस्सर राजो अदीकार्याम ना मुख्याम ने, नीयाव करवा वाळा ना मुख्या ने, लेखो-जोखो करवा वाळा ने, नीयाव करवा वाळाम ने, जीला ना अदीकारी अने कंय राज्य-राज्य ना अदीकार्याम ने बोलावो मोकल्यो के तीहया ते मुर्ती पुजा मे आवे जे तीहयो उबी करावलो से। 3 तत्यार अदीकार्याम ना मुख्या, राज करवा वाळा, राज्य ना मुख्या अदीकार्या, नीयाव करवा वाळा ना मुख्या, लेखो-जोखो करवा वाळा, नीयाव करवा वाळा, जीला ना अदीकार्या अने ढेरेत राज्य-राज्य ना अदीकार्या नबुकदनेस्सर राजा नी उबी करावली मुर्ती पुजा नी लेदे भेळा हया, अने तीहयी मुर्ती नी अगळ उबा हया। 4 तत्यार चोकीदार ज्योरेत आड़ीन केदो, "ए देस-देस ना अने राज्य-राज्य ना माणहु, अने अलग-अलग भासा बोलवा वाळा, तमु ने आहयो हुकम ह़मळावु के, 5 जे टेमे तमु सींगा, पीहा, तम्बुरा, रणथा, झुणगा अने फेपार्या आहया आखा भाती ना वाजा नी अवाज ह़मळो, तमु तीहयीत टेमे ढुंगा वळीन नबुकदनेस्सर राजा नी उबी करली ह़ोना नी मुर्ती ने वांदजो। 6 जे कोय ढुंगो वळीन नी वांदे तीने तीहयीत टेमे होळो-होळो धपत्लु आक्ठु ना भाटा नी वचे नाख देहे।" 7 आहया कारण तीहयी टेमे जेमेत आखा माणहु ने, सींगा, पीहा, तम्बुरा, रणथा, झुणगा अने फेपार्या आहया आखा भाती ना वाजा नी अवाज ह़मळाय पड़ी, तेमेत देस-देस अने राज्य-राज्य ना आखा माणहु अने अलग-अलग भासा बोलवा वाळा ढुंगा वळीन तीहयी ह़ोना नी मुर्ती ने, जे नबुकदनेस्सर राजो उबी करावलो हतो, वांद्या।
दानीयल ना तीनोव ह़ाती पोर हुकम नी मानवा नो गुनो
8 तीहयी टेमे थोड़ाक कसदी माणहु राजान्तां ज्या, अने दगा सी यहुदीम नी चुगली कर्या। 9 तीहया नबुकदनेस्सर राजा ने केवा बाज ज्या, "ए राजा, तु जलमको जीवत्लो रेय। 10 ए राजा, तु ते आहयो हुकम आपलो से के जे माणेह सींगा, पीहा, तम्बुरा, रणथा, झुणगा अने फेपार्या आहया आखा भाती ना वाजा नी अवाज ह़मळे, तीहयो पड़ीन तीहयी ह़ोना नी मुर्ती ने वांदे; 11 अने जे कोय पड़ीन नी वांदे तीने होळो-होळो धपत्लु आक्ठु ना भाटा मे नाख देहे। 12 देख सद्रक, मेसक, अने अबेदनगो नाम ना थोड़ाक माणहु से, जीमने तु बेबीलोन देस ना कामु पोर अदीकारी ठेरावलो से। तीहया माणहु, ए राजा, तारा हुकम नी कंय बी फीकर नी कर्या; तीहया तारा देवता नी भक्ती नी करता, अने जे ह़ोना नी मुर्ती तु उबो करावलो से, तीने नी वांदता।"
13 तत्यार नबुकदनेस्सर राजो खीजवाय्न हुकम आप्यो के सद्रक, मेसक अने अबेदनगो ने लावो। तत्यार सीपायड़ा तीहया माणहुम ने राजा अगळ हजुर कर्या। 14 नबुकदनेस्सर राजो तीमने पुछ्यो, "ए सद्रक, मेसक अने अबेदनगो, तमु जे मारा देवता नी भक्ती नी करता, अने मारी उबी करली ह़ोना नी मुर्ती ने वांदता नी, ता ह़ु तमु जाण बुजीन आसम कर र्या? 15 कदीम तमु हाव तीयार से, के जत्यार सींगा, पीहा, तम्बुरा, रणथा, झुणगा अने फेपार्या आहया आखा भाती ना वाजा नी अवाज ह़मळो, अने तीहयीत टेमे ढुंगा वळीन मारी बणावली मुर्ती ने वांदो, ता बचहु; अने कदीम तमु वांदो नी ता आहयीत टेमे तमने होळो-होळो धपत्लु आक्ठु ना भाटा नी वचे नाख देहे; अळतेण एवो कानो देवता से, जे तमु ने मारा हात मे गेथो बचाड़ सके?"
16 सद्रक, मेसक अने अबेदनगो राजा ने केदा, "ए नबुकदनेस्सर राजा, आना बारा मे तने जपाप आपवा नी आमने कंय बी जरवत नी हय ह़मजया। 17 अमारो भगवान, जीनी आमु भक्ती करया तीहयो आमने तीहया होळो-होळो धपत्लु आक्ठु ना भाटा ना आक्ठा मे गेथो बचाड़वा नी सक्ती राखे; ए राजा, तीहयो आमने तारा हात मे गेथो बी छोड़ाय सके। 18 पण कदीम तीहयो नी बी बचाड़े, ते बी ए राजा, तने मालम रेय, के आमु तारा देवता नी भक्ती नी करया, अने नी तारी उबी करावली ह़ोना नी मुर्ती ने वांदया।"
दानीयल ना तीनोव ह़ातीम ने भाटा मे नाखणु
19 तत्यार नबुकदनेस्सर राजा खीजवाय पड़्यो, अने तीना मोडा नो रंग सद्रक, मेसक अने अबेदनगो नी लेदे बदली ज्यो। तीहयो हुकम आप्यो के भाटा नु आक्ठु ने ह़ात गुणा जादा होळो-होळो कर देवो। 20 अळतेण आह़फा नी सेना मे ना थोड़ाक ताखत वाळा माणहु ने तीहयो हुकम आप्यो, के सद्रक, मेसक अने अबेदनगो ने बांदीन तीमने हुड़ु-हुड़ु धपत्ला आक्ठु ना भाटा मे नाख देवो। 21 तत्यार तीहया माणहुम ने तीमना पायजमा, कुड़ता, टोपी अने बीजा लुगड़ा भेळ बांदीन, तीहया हुड़ु-हुड़ु धपत्ला आक्ठु ना भाटा मे नाख देदा। 22 तीहयो भाटो ते राजा ना मोट्ला हुकम ना कारण जादात हुड़ु-हुड़ु धपाड़लो हतो, आहया कारण जे अदमी सद्रक, मेसक अने अबेदनगो ने नाखवा उचल्या तीहयात आक्ठा नी आच सी धपीन मर ज्या। 23 अने तीहया हुड़ु-हुड़ु धपत्ला आक्ठा ना भाटा नी वचे तीहया तीनोव अदमी, सद्रक, मेसक अने अबेदनगो, ने बांदलात नाख देदा।
24 तत्यार नबुकदनेस्सर राजा वहराय ज्यो अने घबराय्न उबो हय ज्यो, अने आह़फा ना मंतरीम ने पुछवा बाज ज्यो, "ह़ु आमु तीहयु आक्ठु नी वचे तीनेत अदमी बांदला नी नखाड़्या?" तीहया राजा ने जपाप आप्या, "होव राजा, ह़ाचली वात से।"
25 अळतेण तीहयो केदो, "हाव मे च्यार अदमीम ने आक्ठा नी वचे छुटला फीरत्लो देखवा बाज र्यो, अने तीमने कंय बी नुकसान नी हयु; अने चोवथा अदमी नो सीको देवता ना सोरान तेवो से।"
दानीयल ना तीनोव ह़ातीम नी ईज्जत करवु
26 अळतेण नबुकदनेस्सर तीहया हुड़ु-हुड़ु धपत्ला आक्ठु ना भाटा ना झापला नी ह़ाते जीन केवा बाज ज्यो, "ए सद्रक, मेसक अने अबेदनगो, ए आखा मे जोरभर्या भगवान ना चाकर्या, नीकळीन आञे आवो!" आहयु ह़मळीन सद्रक, मेसक अने अबेदनगो आक्ठा नी वचे गेथा नीकळीन आया। 27 जत्यार आखाम नो अदीकारी, राज्यपाल, राज्य मंत्री अने राजा ना मंत्री जे भेळा हयला हता, तीहया अदमीम नी भणी भाळ्या, तत्यार तीमना डील मे आक्ठा नी कंय बी आच नी लागी; अने तीमना मुंडा ना नीम्बाळा बी नी धप्या, तीमना पायजमा बी नी बगड़्या, अने तीमनी मे धपवा नी गंद बी नी आवी।
28 नबुकदनेस्सर केवा बाज ज्यो, "जुगाळो से सद्रक, मेसक अने अबेदनगो नो भगवान, जे आह़फा नो दुत मोकलीन आह़फा ना आहया चाकर्याम ने आनीन करते बचाड़्यो, काहाके आहया राजा ना हुकम ने नी मानीन, तारी पोर भरहो कर्या, अने आहयु सोचीन आह़फाम नु डील बी ह़ोप देदा, के आमु अमारा भगवान ने छोड़ीन, काना देवता नी भक्ती नी करया नीता नी वांदया।
29 "करीन हाव मे आहयो हुकम आपु के देस-देस अने राज्य-राज्य ना माणहु, अने अलग-अलग भासा बोलवा वाळा माणहु मे गेथा जे कोय सद्रक, मेसक अने अबेदनगो ना भगवान नी बुराय करहे, तीने टुकड़ा-टुकड़ा कर देहे, अने तीनु घोर उजाड़ बणाय देहे; काहाके आवो कोय देवता नी हय जे आहयी रीते बचाड़ सके।"
30 तत्यार राजा बेबीलोन देस मे सद्रक, मेसक अने अबेदनगो नो पद अळी मोटो कर्यो।