मोत भणी गेथा जीवाय भणी
1 2:1 कुलुस्यो 2:13 तीहयो तमने बी जीवाड़्यो, तमु आह़फा पाप अने गुना मे मरला हता, 2 जीनी मे तमु पेले आहयी कळी नी रीती पोर, अने वादळा ना हकदार ना डायला मतलब तीहयी आत्मा नी अनसारे चालता हता, जे हजु बी हुकम नी मानवा वाळा मे काम करे। 3 आमनी मे आपणु बी आखान-आखा पेले आपणा डील नी लालच मे दाड़ा काडता हता, अने डील अने मन नी मरजी पुरी करता हता, अने बीजा माणहुन तेवा वेहवार सीत रीह नी अवल्यात हता।
4 पण भगवान जे दया नो धनी से, आह़फा ना तीहया मोट्ला मोंग ना कारण सी तीहयो अमारी पोर मोंग कर्यो, 5 जत्यार आमु गुना ना कारण सी मरला हता ता आमने मसी ह़ाते जीवाड़्यो दया सीत तमारो छुटकारो हयलो से।2:5 कुलुस्यो 2:13 6 अने मसी ईसु मे तीनी ह़ाते बठो कर्यो, अने ह़रग ना जागा मे तीनी ह़ाते बहाड़्यो। 7 के तीहयो आह़फा नी तीहयी दया सी जे मसी ईसु मे अमारी पोर से, आव्वा वाळी टेम मे आपणी दया नु गणाय नी एतरु धन देखाड़ सके। 8 काहाके भरहा ना लारे दया सीत तमु बचला से, काहाके तमारी लारे नी हयु, पण आहयु भगवान नो ईलाम से, 9 अने आहयु तमारा कामु नो फोळ नी हय, के कोय मोटाय करे। 10 काहाके आमु तीना बणावला से, अने मसी ईसु मे तीहया भलाय ना कामु ने लेदे बणावला जीने भगवान पेले गेथो आमु करहु करीन तीयार करलो से।