1 मे आहयु केम के, वारीस जत्‌यार लग सोरु से, अने आखी चीज नो मालीक से, ते बी तीनी मे अने पावोर मे कंय भेद-भाव नी हय। 2 पण बाह नी टाकली टेम लग रखवाळ्‌या अने जुगाड़ करन्‌या ना हक मे रेय। 3 तेमेत आमु बी, जत्‌यार सोरा हता, ता कळी नी पेल्‌नी ह़ीकापण हक मे हय्‌न पावर्‌यो बणला हता। 4 पण टेम पुरी हय जी, ता भगवान आह़फा ना बेटा ने मोकल्‌यो जे बयर ने लारे पयदा हयो, अने कायदा ना हक मे जीव्‌यो। 5 ✝काहाके कायदा ना हक मे रेवा वाळा आपणु आखा ने वेचाता लीन सोड़ाय लेय, काहाके आपणु भगवान ना बेटा-बेटी बण सकीया। 6 हाव तमु भगवान ना सोरा से, आनी लेदे भगवान आह़फा ना बेटा नी आत्‌मा ने अमारा मन मे मोकल्‌लो से, आनी लेदे आहयु कीन बोलाड़े, ए बाह! ए बाह। 7 एतरे हाव तु पावोर नी पण बेटो से, जत्‌यार बेटो हयो, एतरे हाव तमु भगवान नी लारे वारीस बी हया।

8 पेले जत्‌यार तमु भगवान ने नी जाणत्‌ला, तत्‌यार तमु तीहया भगवान ना गुलाम हता, जे ह़ाच्‌लीन भगवान नी हता। 9 पण हाव जे तमु भगवान ने ओळखी लेदा, नीता भगवान तमने ओळख्‌यो, ता तीहयी लुल्‌ली अने रीकामी ह़ीकापण भणी काहा फीर र्‌या, तीना तमु अळी गुलाम बणवा हय र्‌या? 10 तमु खास दाड़ा अने मयना अने संय टेम अने सालु ने मान र्‌या। 11 मे तमारा बारा मे घणो फीकर करतलो, कंखर माय्‌न आसम नी हय जाय, के जे मेहनत मे तमारी लेदे करलो से तीहयी अमथी नी हय जाय।

12 ए भायु, मे तमारी सी वीन्‌ती करु, तमु मारीन तेवा हय जावो; काहाके मे बी तमारीन तेवो हयलो से; तमु ते मारु कंय नी बगाड़्‌या। 13 पण तमने मालम से, के पेले ते मे मारा डील नी लुल्‌खाय ना कारण सी तमने खुस-खबर ह़मळायो। 14 अने तमु मारा डील नी हालत ने जे तमारी पारख ना कारण हती, हेटो नी ह़मज्‌या; अने नी तीनी सी ह़ीगी कर्‌या; अने भगवान नो दुत ह़मजीन नीता मसी ईसुन तेम मने मान लेदा। 15 ता तीहयी तमारी खुसी कां जी? मे तमारो गवा से, के कदी हय सके, ता तमु आपणा डोळा बी नीकाळीन मने आप देता। 16 ता ह़ु मे तमने ह़ाचली वात केवा ना कारण सी तमारो वेरी बण ज्‌यो?

17 तीहया तमने दोस्‌तीदार बणाव्‌वा हींड र्‌या, पण भला वीच्‌यार सी नी, बाखीन तमने मारी सी सेटा करवा हींड र्‌या, के तमु तीमनीत ह़ाते हय जावो। 18 पण होह मे रेवा वारु से, भली वात मे जलम कोसीत करवा जोवे, नीस्‌तु तीहयी टेमे नी, के जत्‌यार मे तमारी ह़ाते रेम। 19 ए मारा सोरा, जत्‌यार लग तमारी मे ईसु मसी नो वेह़ नी बण जाय, तत्‌यार लग मे तमारी लेदे अळी सोरु पयदा करवा वाळी बयर नी तेम तळफी र्‌यो। 20 मारी हेर ते आहयी से, के हाव तमारीन्‌तां आय्‌न मोंग सी बोलु; काहाके तमारा बारा मे फीकर मे से।

21 तमु जे कायदा ना हक मे हयवा हींड र्‌या, मने केवो, ह़ु तमु कायदा नी ह़मळतला नी? 22 चोखली सास्‌तर मे लीखलु से, के अब्‌राहम ना बे सोरा हया; अने एक छुट्‌टी बयर सी अने बीजो सोरो पावर्‌याण सी। 23 पण जे पावर्‌याण सी हयो, तीहयो डील ना रीते पयदा हयो, अने जे छुट्‌टी बयर सी हयो, तीहयो वायदा ना लारे पयदा हयो। 24 आहयी वात मे दाखलो से, आहया बयरा मानो बे वायदा से, एक ते सीने बड़ा नी जीनी सी पावोरेत पयदा हये; तीहयी हाजीरा से। 25 अने हाजीरा मानो अरब नो सीने बड़ो से, नवलु यरुसलेम तीनीन तेम से, काहाके तीना सोरा भेळ गुलामी मे से। 26 पण उपर ह़रगे वाळो यरुसलेम छुट्‌लु से, अने तीहयी अमारी आय्‌ह से। 27 काहाके सास्‌तर मे लीखलु से,

ए वांज्‌याण, तु जे नी जणती, खुसी हय;

तु जे जीने वेणा नी छुटे, गळु फाड़ीन बड़ाय कर,

काहाके छुट्‌ली बयर नी अवल्‌यात,

धणी वाळी बयर नी अवल्‌यात गेथी जादा से।

28 ए भायु अने बेन्‌या, आमु ईसाक नी तेम वायदा नी अवल्‌यात से। 29 अने जीसम तीहयी टेमे डील ना अनसारे पयदा हयो, आत्‌मा ना अनसारे पयदा हयो तीने वेला पाड़तो हतो, तेमेत हाव बी हये। 30 पण खरली सास्‌तर ह़ु केय? "पावर्‌याण अने तीना सोरा ने नीकाळ दे" काहाके पावर्‌याण नो सोरो छुट्‌टी बयर ना सोरा ह़ाते बाह ना माल-धन मे हीस्‌सो नी रेय। 31 आनी लेदे ए भायु अने बेन्‌या, आमु पावर्‌याण ना नी हय पण छुट्‌टी बयर नी अवल्‌यात से।