1 बिचार करबीन दिसबिन का मोठयो परमेस्वर बाबूजी ना आमी पर केतरो मोठो माया दिसायीसेस। जेकोलक आमी ओको टूरा-टूरी कहलाबिन अना बाकई मा वय आमिच सेत एकोलाय संसार आमला नोको ओरखबिन काहेका उ मसीह ला नही चिन्हासेत। 2 ओ चहेतो हुन, अब आमी परमेस्वर को औलाद सेजन पर भबिस्य मा आमी काजक होवबिन, अबा तक ऐको मालुम नही करायो गयो से। जोन भी होय, आमी यो जानबिन का मसीह को मंग दिसावन पर आमी ओकोच जसो होय जावबिन काहेकि उ जसो सेत, आमी ओला बेस वसोच चोयबिन। 3 हरेक कोनी जोन ओनो पर असी आस राखासे, उ आपरो आपला वसोच पवितर करासे जसो मसीह पवितर से।

4 जोन कोनी खोटो करम करासे, उ को परमेस्वर नियम ला बिरोध करासे। काहेकि नियम ला बिरोध करनो च पाप से। 5 तुमी ता जानाच सेव का मसीह लोकहुन को पापहुन को एकोलाय दिसयो की पाप हुन ला दुहुर कर लेहे। उ सुभाव लक पापी नहाती। 6 जोन कोनी ओमा बनयो रव्हसे, उ पाप नही करा; जोन कोनी पाप करासे ओना ना ता ओला चोयीसेस अना नाच ओला जानीसेस।

7 ओ टुराहुन कोनी को भरमावनो मा नोको आवनो। जोन न्याय को काम करासे, वाच ओको जसो धरमी से। 8 जोन कोनी पाप करासे उ सैतान* को कन लक से, काहेकि सैतान सुरुवात लक पाप करतो आयोसे। परमेस्वर को टूरा एकोलाय आयो का सैतान को काम ला नास करेत।

9 जोन कोनी परमेस्वर लक पैदा लेई सेस, उ पाप नही करासे; काहेकि ओको सुभाव ओमा बनयो रव्हसे, अना उ पाप कर च नही सका काहेका परमेस्वर लक पैदा लेई सेस। 10 ऐकोच लक परमेस्वर को औलाद अना सैतान को औलाद जानो जासेती; जोन कोनी धरम को काम नही करासे उ परमेस्वर लक नही, अखिन उ जोन आपरो भाऊ लक माया नही राखा।

11 काहेका जोन साजरो बारता तुमी ना सुरूवात लक आयकियात, उ यो से का आमी एक दुसरो लक माया राखबिन; 12 अना कैन को जसो नोको बनबिन जोन ओनो दुस्ट लक होतो, अना जेने आपरो भाऊ ला मार डाकिस होतीस। अना ओला कोन कारन लक मार डाकिस? यो कारन का ओको काम बुरो होतीन, अना ओको भाउ न्यायी होतो।

13 ओ भाऊ, अदि संसार तुमी लक ईरसा करासे ता चकित नही होवनो। 14 आमी जानबिन का आमी मिरतु लक पार भयके जिंदगी मा पहुचियो सेजन; काहेका आमी भाऊगीन लक माया राखासेजन। जोन माया नही राखासे उ मिरतु को हाल मा रव्हसे। 15 जोन कोनी आपरो भाऊ लक ईरसा राखासे, उ खुनी से; अना तुमी जानासेव का कोनी खुनी मा अमर जिंदगी नही रव्हसे। 16 आमी ना माया एकोलाय जानिया का ओना आमरो लाई आपरो जान दे देइस; अना आमला भी आपरो भाऊ लाई जान देवनो जरुरी से। 17 पर जोन कोनी को जवर संसार को धन से अना आपरो भाऊ ला कंगाल दिसके ओको पर दया खावनो नही चाहे, ता ओमा परमेस्वर को माया कसो बनो रव्ह सकासे? 18 ओ टुरागीन, आमी गोस्टी अना जुबान लकच नही, पर काम अना खराई लक भी माया करबीन।

19 एकोच लक आमी जानबिन का आमी खरो का सेजन; अना जेनो गोस्टी मा आमरो मन आमीला दोस देहे, ओको बारे मा आमी ओको पुढा आपरो-आपरो मन ला हिम्मत दे सकबिन। 20 काहेकि परमेस्वर आमरो मन लक मोठो से, अना वा सबच काही गुन-दोस जानासे। 21 ओ चहेतो हुन अदि आमरो मन आमला दोस नही देहे ता आमला परमेस्वर को पुढा हिम्मत होवासे। 22 अना जोन काही आमी माँगासेजन उ आमला ओकोलक मिलासे, काहेका आमी ओको हुकूम ला मानासेजन अना जोन काही ओला साजरो लगासे वाच करासेजन। 23 ओकी हुकूम यो से का आमी ओको टूरा यीसु मसीह को नाव पर भरोसा करबीन, अना ओना आमला हुकूम देईसेस ओकोच जसो आपसी मा माया राखबिन। 24 जोन ओको हुकूम ला मानासे, उ ओमा अना उ उनमा बनयो रव्हसे, अना एकोच लक मनजे ओना आतमा लक जोन ओना आमला देईसेस आमी जानासेजन की उ आमिमा बनयो रव्हसे।