1 या गोस्टी बिस्वास काबिल से का जोन मुखिया होवनो चाव्हसे उ साजरो काम की आस करासे। 2 यो जरूरी से का कलिसीया को मुखिया निरदोस अना एकच बायको को नवरा संयमी, सुन्दर आदर मान भाव करन वालो अना सिस्टा चारी सिकानो मा पक्को होय। 3 दरवा अना मारपीट करनवालो नही होहे पर साजरो मानूस होहे अना झगड़ालु अखिन लालची नोको होहे। 4 अपरो घर को साजरो देख-रेख करतो होहे अना अपरा लेकरा-बारा ला साजरी गम्बीरता लक अपरो बसमा राखतो होहे। 5 जबा कोनी अपरो घर की देख-रेख करनो नही जाने त परमेस्वर की कलीसिया की देख-रेख कसो करहे। 6 मंग असो का नवतो चेला नही होहे घमंड करके सैतान को जसो डन्ड पाहे। 7 अखिन बाहेर वारा गीन मा भी वोको साजरो गवाही होहे असो नही होवा का निंदा-बदी करके सैतान को जाल मा फस जाहे।

8 वसोच दास गीन ला गम्भीर होवनो चाहिसे दोरंगी दरवा अना हराम की कमाई को लोभी नही होहे। 9 पर बिस्वास को भेद ला सुध्द अक्कल लक राखे। 10 अना यो भी पहेल परख को मघा तबा अदी निरदोस हिटे त दास को काम करहे। 11 एना परकार लक आई-माई ला भी गम्भीर होवनो पाहिजे लान-छान लगावन वारो नही होहे पर जगाहेत अना सबच गोस्टी गीन मा बिस्वास काबील होहे। 12 दास एकच बायको को नवरा होहे अखिन लेकरा-बारा अना अपरो घर गीन ला साजरो लक देख-रेख करनो जाने। 13 काहेकि जोन दास को काम साजरी तरह लक कर सकासे उ अपरो लाई साजरो पद अना वोना बिस्वास मा जोन मसीह यीसु मा से मोठो हिम्मत पाहे।

14 मी तोरो जवर जल्दी आवन की आस राखनो पर भी या गोस्टी तोला एकोलाई लिखीसेऊ। 15 अदी मोरो आवनो मा उसीर होहे त तु जान लेवजोस का परमेस्वर को घर मा जोन जित्तो परमेस्वर की कलीसिया से अना जोन खराई को खम्बा अखिन नीव से कसो बरताव करनो पाहिजे। 16 एको मा सक नहाय का भक्ति को भेद गम्भीर से अना

उ जोन हिरदय मा परगट भईसे,

आतमा ना सच्चो अना धरमी ठहरायो,

सरगदूत गीन ला चोवाईस गैरयहुदी लोक गीन मा,

वोको परचार भयो संसार मा,

वोको बिस्वास करयो गयो अना,

महिमा मा वोरता उठायो गयो।