1 यीसु मसीह को दास अना पेरीत, सिमोन पतरस को यो चिठ्ठी, उन लोकगिन को नाव वरुन सेत। जोन ना आमरो परमेस्वर, अना बचान वालो यीसु मसीह को लक, आमरो जसो नीतिमान लक, बिस्वास को किमती वरदान भेटियो सेत।
2 तुम्ही परमेस्वर ला अना आपरो पिरभु यीसु मसीह ला ओरखा सेव, यासाठी की तुम्हिला किरपा अना सान्ती, लगत-लगत भेटेत।
बिस्वास मा उन्नती
3 परमेस्वर को ताकत अना वैभव मा अमीला भगती, जीवन साठी उ सप्पा जरुरी गोस्टी देइसेस। अना अमीला वोकोच गियान प्राप्त करन लाय साठी काबिल बनायो सेत। जोनना वैभव मा अना गौरव मा हमला बुलावले। 4 काहेका वोको लक परमेस्वर ना आमीला अनमोल अना मोठी वादा करयो सेत, जेनो कारन तुमी जग मा वाईट वासना लक सूट जाव। जोन जग मा खोटो इक्सा लक होवासे। अना वोको लक आपरो परमेस्वर को सुभाव को भागी दार बन जाओ। 5 यो कारन तुमी पुरो धुन लक कोसीस करा का बिस्वास मध्ये चांगुलपना वाड़ुन जाय। अना आपरो चांगुलपना साठी गियान जोड़ा, 6 अना आपरो गियान संयम पासुन, आपरो संयम लक धिरज, अना आपरो धीरज लक भगती, अना 7 भगति भाव अना भाऊ भाव लक पिरेम हो। 8 यदि यो गोस्टी तुमरो बीच्या मा रहेत, अना वाढत रहेत, तर तुम्ही पिरभु यीसु मसीह को, गियान पिराप्त करनो मा तुम्हाला फालतू निस्‍फल नाही होनार देहे। 9 जोन मानूस, मा यो गुन नाहती तो अँधरा सेत, भटकतो अना विसर गयो की, वोको जुनो पाप धुल गयो सेत।
10 यो कारन अगो बंधूनो! आपरो आपला हाकलनो अना निवाड़ो लाय पक्को करन लाय साठी सप्पा तो परी कोसीस करा। आपरो असो करन्यास, तुमी कधीच विचलित होनार नाही। 11 अना आपरो पिरभु अना तारनहार यीसु मसीह को अमर काल को राज मा तुम्हीला धसाहेत।
अगुवागीन को गवाही
12 एकोलाय तुम्हाला या गोस्टी मालूम सेत। अना भेटयो से अना सच्चो मा मजबूत रव्हसो, तबा मी यो गोस्टी को हेत दिलावत रव्हिन। 13 मी जबा तकन यो देह सरीको डेरा को बीच मा जागरत ठेइन। अना हेत दिलावन को मोरी साजरा करम समजासू। 14 एकोलाय मोला मालूम सेत का मोला लवकर डेरा मजे तन सोड़नो से। जसो आपरो पिरभु यीसु मसीह ना मोला सांगिसेत। 15 मी एको पुरो ध्यान ठेविन मोरो जावन को मघा तुमी लोक सप्पा बेरा यो गोस्टी मा लक्छात ठेवो।
16 जबा आम्ही तुम्हिला पिरभु यीसु मसीह को सामरथ को बारेमा, अना वोको आवनो को बारेमा सांगिसेजन। त वोला आम्ही हुसारी लक कल्पित काल्पनिक गोस्टी करन्यात कोसीस नाही करयो। पर वोना बेरा वोकी महानता स्वता आमरो डोरा मा चोविसेत। 17 जबा सरग ले, अजी परमेस्वर को कन लक, वोला सन्मान व गौरव भेटली। तबा असो आवाज आयकलो "यो मोरो चहेतो टूरा सेत। एको ले मी आनंदित सेऊ।" 18 अना जबा आम्ही वोको बरोबर पवितर परवत मा होतो, तबा सरगात असोच आवाज आयेकला।
भबिस्य वानी को महानता
19 यो घटना लक भविस्यवक्ता गिन को वानी, आमरो लाय अवर बिस्वासी सिध्द भयो। एको मा धियान देवनो मा तुमरो कल्यान सेत। काहेका जब तकन पहेटिया नही होवासेत, अना तुमरो दिल मा सक्कार को तारा नही उगासेत। तबा तकन भविस्यवक्ता गिनको वानी इन्धार मा चमकतो दीयो जसो सेत। 20 पर पयले तुम्हि यो जानन को सेत का गिरंथ को बचन को कोनतो च भविस्यवानी एखाद स्वता को विचारधारा को पूरो आधार नाही होवासेत। 21 कारन कोनती च भविस्यवानी मानूस को इक्सा अनुसार नाही करयो सेत। परंतु पवितर आतमा लक पेरीत होवके परमेस्वर को कन लक बोलत होतिन।