2 Pedro 2

1 जोन परकार वोना लोकांमध्ये खोटे भविस्यवक्ता होतिन। तसोच तुमरो मध्ये खोटा उपदेसक आहेत। जेना नासवन्त ढोंगी पाखन्ड को उद्घाटन लुक-लुक के करतत। अना वोना पिरभु को जोनना उनला बिकत लियो सेत। असो परमेस्वर ला नाकारतत। अना स्वता ला लवकरच विनास आनतत। 2 लगत लोक उनको जसो एसो अराम को आनंद लेवन को अनुसरन करतत। जोन को कारन सच्चो मारग बदनाम होयेत। 3 अना वय बडबड गोस्टी ला लोभ को लाय बनाहेत, अना जोनको फैसला खूब पयले भयी गयोसेत। अना उनको मघा आवासेत। उनको नास झोपल्या नाही!

4 कारन जोन परमेस्वर असो संदेसवाहक ला सोड़ला नाही, जोन पाप करयो होतयो, पर उनला नरकमा पाठयेत अना उनला अंधार मा ठेवेल, जोनलक नियाव को दिवसापरयत कैदी बनविन आहेत। 5 वोना जूनो जघा ला सोड़ले नाही, पर अना अनिति करनवारा दुनिया वर पूरा-पानी पठायो। अना नेक मानूस नूह को रक्सन करयो। अना नुहा समेत पूरा-पानी मा आठ लोकांनी बचाय लियो। 6 परमेस्वर ना सदोम अना गमोरा असो सहर ला नास करयो। अना आवन वालो बेरा मा, खोटो लोकांना चेतान काजी बिनास को सजा दियो। 7 परंतु वोना उ नेक मानूस लूत ला बचाय लियो। जोन वाईट लोकांनी लैंगिक करम को कारन दुखी होत होतो। 8 तो उ नेक मानूस दिवसें-दिवस उनको खोटो काम चोवत, अना आयकत राहातो होतो। मजे वोको नेक आत्मा खूब विचलित भयो। 9 असो परकारे तुम्ही चोवासो का पिरभू नेक लोक गिनला संकट लक बचावा से, अना खोटो मानूस गिनला नियाव को दिवसापरयत सोड़वून ठेवन्यास सक्सम सेत। 10 खास करुन उन लोकगीन जेना असुद्ध वासना को बसमा होयके, सान सौकत लक जिंदगी बिताव सेत। अना पिरभू को तिरस्कार करासेत।

वय गरबिला मानूस सेत। अना वय सरग को सचला नकारन घाबरत नाही। 11 तर सरगदूत जोन उनको अपेक्सा कितरो लगत ताकतवर अना सामरथ वान सेत, ते परमेस्वर को जवर काही वाईट निंदा नाही करासेत। 12 पर वय जनावर जसो सेत। जेन सुभाव लक सिकार होवन लाय मरन लाय जलमो सेत। वय असा गोस्टी ला मना करतत जोन वोला समजत नाही, वय जनावर जसो नास होयेत। 13 अना असो उनको पाप अना खोटो काम को सजा भोगनो पड़ेत। उनला दिवस अना दुपार मा आनंद लक बितावनो साजरो लगासेत। वय कलंकित अना दूसित सेत। 14 उनको डोरा छिनालापन लक भरयो सेत। अना उनला कधीच नही मिटनवारा पाप करन लाय को भूक आहेत। वय कमजोर आतमा ला मोहित करतत। उनको मन ला लोभ को सिक्सा मिल्यो सेत। वय सराप को सन्तान सेत। 15 वय रस्ता सोडून बोसोर को टूरा बिलाम जसो वाटेवर फिरली सेत। बिलाम खोटो कमाई चाव्हत होतो। 16 पर वोला आपरो गुन्हा को डटकार आयकनो पड़यो। एक मुका गाढव मानसा सारखा बोलन लगयो। अना असो परकार संदेस देवन वारा पगलापन लक सुधरगयो।

17 हे लोक सुक्को विहिरी सेत। अना अंधाड़ को फेकतात बदली सेत। उनको साठी सनातन इन्धार पक्को करयो सेत।

खोटो सिक्सक को फसानो मा नोको आव

18 वय बेकार को गरब लक बोलासेत। अना देह को इक्सा लक चलनवारा लोक गिनला फसान को गोस्टी करतत। अना जोन भटको हुयो लक अबा बाहेर हिटयो सेत, उनला वय मोहित करासेत। 19 वय उनला मुक्त करन लाय साठी वचन दियो सेत। पर खुदच सड्या को गुलाम सेत, कारन जोन हारासे उ उनको गुलाम बनसेत। 20 अना जबा वय पिरभु तारनहार यीसु मसीह ला ओरख के दुनिया को अनेक परकार को असुद्धता पासुन मुक्त भयो आहेत। अना मग उनमा फसयो अना हार गयो सेत। उनको मंगा लक दसा पहेलो लक वाईट भयी गयो सेत। 21 असो लोक, खुदला दियो गयो पवितर हुकूम को गियान पायके वोको पासुन दूहुर जावासेत। उनको लाय यो साजरो होतो का, उनला नेकी को मारग को गियान कधीच नही मिलतो। 22 असो लोक, मा यो हाना सही बसासेस, "कुतरा की पुस्टी वाकड़ी की वाकड़ी" अना "चतुर मानूस मुरख बना सेत।"