1 अगो चहेतो भाऊहुन! मी तुम्हाला दुसरो बार चिठ्ठी लिखासू। यो चिठ्ठी मध्ये तुमी लोकहुनला काही गोस्टी को हेत दिलाय के तुमरो साजरो अक्कल ला सतरक करनो चाव्हासेऊ। 2 तुमी पवीतर भगतगीन को कन लक, पयले लक कही गई गोस्टी, अना सुटकारा देवनवारा पिरभू को हुकूम ला, जोन तुमरो पेरीतगीन लक दियो गयो से, उनला हेत करो। 3 सब लक पयले, तुम्हिला यो समजमा आवनो पायजे, आखरी दिवस मा मजाक उड़ावन वारा आहेत। अना अपरी बेकार अना गन्दो काम को इक्सा अनुसार चलयेती। 4 अना असो सागेत का वोको आवनो को बचन कोठी सेत? कारन आमरो पुरखा मरुन गयो अना सप्पा काही दुनिया को सुरूवात पासुन होतयो, तसोच आहेत। 5 वय मुद्दा विसरले का जूनो जमाना मा बादल अना धरती होती। जोन परमेस्वर को बचन लक बनायो गयो होतो। धरती पानी पासुन बनयो अना पानी मा बांधली। 6 वोना बेरा को दुनिया पान्यात नास भयो। कारन पूरा पानी वर बुडले। 7 पर अबा को सरग अना धरती वोच बचन लक ठेयो सेत। का जालून टाकेत। अना भक्तिहीन लोकांनी नास होवन तकन अना नियाव तकन तसोच ठेवली रहेत।

8 अगो चहेतो भाऊहुनएना गोस्टी कदी विसरो नोको, परमेस्वर को एक दिवस हजार साल को बरोबर सेत अना एक हजार साल एका दिवसा इतरोच सेत। 9 काही लोक समजासेत। परमेस्वर आपरो करार पूरन करन्यास उसीर करन लाय नाही, पर आपरो साठी लोकां बद्दल सहनसील सेत। अना वोको इक्सा सेत का उतानी सर्वनास नका होय। परंतु हरेकाला पस्तावा करन लाय साठी बेरा मिल्हे।

10 परंतु परमेस्वर को दिवस चोर जसो आवन वालो सेत। वोना दिवसी बादल मा मोठ्या गरजन होहेत अना नास भयी जाहेत। अना सब चीज पिघल जाहेत अना धरती अना वोका वरी काम को नियाव होयेत। 11 जब ऐना सप्पा गोस्टी नास भयी जाहेत। तर तुमी लोकगिन ला पाहिजे का पवीतर चाल-चलन अखीन भगती को जिंदगी बिताव। 12 परमेस्वर को आवन वारो दिवसा को वाट जोहो अना लवकर च लावन को कोसीस करा। बादल जरत पिघलेत अना बादल को तारागिन तपके टपक जाहेत। 13 परंतु आपरो परमेस्वर को परन मा आधारित नवीन सरग अना नवीन धरती को वाट जोहासेत। उतानी साजरापन वास करेत।

14 अगो चहेतो भाऊहुन मी कव्हसू, जसो, यो या गोस्टी ला आपरो जवर आवता चोवो, तभी सांतपन अना निरदोसपन लक वोको समोर जावन को कोसीस करा। 15 यदी आमरो पिरभू आपरो धीरज धरके उसीर करासेत तर यो गोस्टी ला सूटकारा करन लाय मदत समजो, कारन आपरो चहेतो भाऊ पौलुस ना आपरो दियो गयो गियान को लक तुमीला लिख्यो सेत। 16 जसो उनना अपरो सप्पा चिठ्ठी मध्ये या गोस्टी को चरचा करयो सेत। जोन मध्ये बाचयो गोस्टी समजून लाय कठीन सेत। अना अनपढ अखीन चंचल लोक गिरंथ लक गोस्टी को गलत मतलब काढतत अखिन स्वता को नास करतत।

17 एकोलाय अगो चहेतो संगीहुन, तुम्हाला पयले लक चेताय देसू, तुम्ही होसियार रव्हो। कदी असो होय का, तुमी वाईट अना अबिस्वासी लोकां मध्ये भटकून जाव, मग आपरो जघा पासुन पक्को भयी जाव। 18 तुमी लोक आमरो पिरभु अना तारनहार यीसु मसिहा, को किरपा अना गियान मा बड़त रव्हो, वोको अता अना अमर काल तकन वोको गौरव होवत रव्हे। आमेन।