कुलुस्सियो 4

1 अगो मालिक हुन आपरो-आपरो दास गीन लक नियाव लक साजरा बेवहार करो। असो समझके का सरग मा तुमरो एक मालीक सेत।

2 पिराथना मा लगा रव्हो, अना धनवाद को संग जागत रव्हो।

काही बेवहार को लाय सलाह

3 अना एको सँगा आमरो लाई पिराथना करोह की परमेस्वर आमरो लाई गोस्टी आयकावान को असी बेसकुड़ खोल दे, की आमी मसीह को ओना भेद को बखान कर सकबिन जेनको कारन मि बँदी सेव 4 अना ओला असी दिसाऊ जसी मोला करनो साजरो से।

5 मौका ला बेस जानके बाहेर वारा गीन को सँगा सोच समझ के लक बेवहार करोह। 6 तुमरो गोस्टी सदा दया सँगा अना साफ होय की तुमला हर मानूस ला बेस रिति लक जवाब देवनो आय जाहे।

आखरी नमस्कार

7 माया को भाऊ अना बिस्वास काबिल दास, तुखिकुस, जोन पिरभु मा मोरो संगी करमी सेति, मोरी सब गोस्टी तुमला साँग देहे। 8 मीना ओला एकोसाठी तुमरो कठा धाड़यो होतो की तुमला आमरी दसा मालुम पड़ जाहे। अना उ तुमरो दिल ला सान्ती देहे। 9 ओको सँगा मीना उनेसिमुस ला धाडिसेव जोन बिस्वास काबील अना माया को भाऊ अना तुमी मा लक से। यो तुमला यहान की सप्पा गोस्टी साँग देहे।

10 अरिस्तखुरस, जोन मोरो सँगा बँदी से, अना मरकुस जोन बरनबास को भाउ कहलावसे जोन को बारे मा तुमीना हुकूम पायासेव की अदी उ तुमरो कठा आहे ता ओको लक साजरो तरिका लक बरताव करने। 11 अना यीसु जोन युस्तुस कहलावसे तुमला नमस्ते कवहसे खतना करयो लोकगीन मा लक केवल योच परमेस्वर को राज को साठी मोरो संग काम करनवारा अना मोरो सान्ती को कारन रहीसे।

12 एपफ्रास जोन तुम्हरो संगी सेत, अना मसीह यीसु को दास सेत वोको कन लक तुम्हिला नमस्कार कव्हसेत। अना हमेसा तुम्हारो लाय पिराथना करासेजन की, जोन लक तुमरो मा कोनी कमी नोको रव्हे अना पूरो भरोसा लक परमेस्वर को मनसा मा पक्को रव्हो। 13 मी खुद वोको सबूत सेव का उ तुम्हारो अना लौदीकिया अना हियरापुलिस वालो लोकगीन लाय गजब मेहनत करासेत। 14 चहेतो बइद लूका अना देमास को तुम्हिला नमस्कार।

15 लौदीकिया नगर को भाऊ हुन ला अखीन नुमफास अना वोको घर को कलीसिया ला नमस्कार सांगजोस। 16 जबा यो चिठ्ठी तुम्ही लोकगीन को पुड़ा बाच लियो जाये तो यो चिठ्ठी लौदीकिया को कलीसिया मा बाचो जाय, अना जोन चिठ्ठी लौदीकिया मा सेत वोला तुम्ही बाचजोस। 17 अना अरखिप्पुस लक सांग जोस का पिरभू को जोन सेवा तोला सोपो गइ सेत वोला होसियारी लक पूरो कर।

18 मी पौलुस को आपरो हात लक लिखयो नमस्कार! मोरो हतकड़ी अना बेड़ी हेत राखजोस,

तुम पर किरपा होतो रव्हे। आमीन!