1 फसह को तिहार को पुढा जबा यीसु ना जान लियो का मोरी बेरा आय गयो से, का मी जगत ला सोड़के बाबूजी को जवर जावनो से, ता आपरो लोकगीन लक जोन जगत मा होतीन, उनलक जसो माया उ राखत होतो, आखरी बेरा भी वसोच माया राखिस।

2 अना जबा सैतान*13:2 इबलीस समोन को टूरा यहूदा इस्करियोति को मन मा यो गोस्टी डाक चुकयो होतो, का ओला धरवाए। 3 यीसु ना यो जानके की, बाबूजी ना सब काही मोरो हात मा कर देईसेस। अना मि परमेस्वर को जवर लक आईसेऊ, अना परमेस्वर को जवर जासू। 4 जेवन लक उठके आपरो कपरा*13:4कपरा ला उतार देइस, अना गमछा लक आपरी कम्मर ला बाँधिस 5 तबा बरतन मा पानी भरके चेला को पाय धोवन लगयो, अना गमछा लक पोसन लगयो। 6 जबा उ समौन पतरस को कठा गयो, तबा पतरस ना ओला कहीस, का "हे पिरभू, का तु मोरो पाय धोवसेस?"

7 यीसु ना साँगीस, "जोन मि करासेऊ, तु ओला अबा नही जानस, पर एको मंघा समज जाजोस।"

8 पतरस ना ओला कहीस, "तोला मी आपरो पाय कभ्भू नही धोवन देहू।" असो आयक के यीसु ना कहीस, "अदी तू मोला तोरो पाय नही धोवन देजोस ता हरामेसा को लाय तोरो मोरो काही नाता नहात।"

9 समौन पतरस ना ओला कहीस, "हे पिरभू ता मोरो पाय ला च नही पर हात अना डोस्का ला भी धोय देव।"

10 यीसु ना ओला कहीस "जोन आंग खोर लियो सेत, वोला पाय को सिवा अखीन काही धोवन को जरूरत नहाय, पर वा सुध्द से। तुम्हि सुध्द सेव पर सबच नही।" 11 उ आपरो धरानवालो ला जान गयो होतो, एको लाई ओना कहीस, तुम्हि सब का सब सुध्द नहाव।

12 जबा उ उनको पाय धोय चुकयो, अना आपरो कपरा डाकके बस गयो, ता उन लक कव्हन लगयो, "का तुम्हिला समजमा आयो! मीना तुमरो सँग काजक करीसेव? 13 तुमी मोला गुरू अना पिरभू कव्हसो अना साजरो च कव्हसो, काहे का मि वाच सेऊ। 14 अदी मी पिरभू अना गुरू होयके तुमरो पाय धोयो, तो यो जरुरी सेत का तुमी भी एकमेक को पाय धोवो। 15 काहे की मीना तुमला उदाहरन चोवायो सेऊ, का जसो मीना तुमरो सँग करीसेऊ तुमी भी वसोच करो। 16 मि तुमी लक खरो कव्हसू, दास आपरो पिरभू लक मोठो नही होवासे, अना ना धाडयो गयो आपरो धाड़न वालो लक, 17 तुमी यो गोस्टी जानासेव, अना अदी उन पर चलो तो धन्य सेव।"

18 " मी तुम्हि सबको बारेमा नही सांगासेऊ, काहेका जोनला मीना निवाड़ी सेव ओला मि जानासू। पर यो एको लाय भयो से का, पवितर गिरंथ को उ गोस्टी पूरो भयी जाय ‘का जोन ना मोरो जेवन जेयो सेत, वोनाच मोला लात मरा सेत।’ 19 अता मि तुमला हेत दिलासू, का जबा यो गोस्टी भय जाहे तो तुमी भरोसा करो। की मि वाच सेव। 20 मि तुमी लक खरो कव्हासू जोन मोरो धाड़न वारो ला अपनावसे, उ मोला अपनावासे अना जोन मोला अपनावसे उ मोरो धाड़नवालो ला अपनावासे।"

21 यो गोस्टी ला साँगके यीसु आतमा मा बैचेन भयो अना ओना गवाही देइस "मि तुमी लक खरो कव्हसु, की तुमी मा लक एक से, जोन मोला धराहे।" 22 चेला गीनला संका भई की वा कोन को बारे मा सांगासे? ता वय एकमेक कन चोवन लगीन। 23 उन चेला मा लक एक जोन यीसु लक माया करत होतो, ओको छाती कन नवके बसत होतो। 24 तबा समौन पतरस ना ओला ईसारा करके पुसयो, "साँग, उ कोन को बारे मा कव्हासे?"

25 तबा ओना ओच तरिका लक यीसु की छाती कन नवके ओको लक पुसिस," हे पिरभू उ कोन आय? "

26 यीसु ना वोकोलक सांगीस, "जोनला मि यो भाकर को टुकड़ा डुबा के देहुँ वाच से," ओना टुकड़ा ला डुबायके समोन इस्करियोति को टूरा यूदूस ला देइस। 27 टुकड़ा लेवन को मंघा सैतान ओमा समाय गयो। तबा यीसु ना कहीस, "जोन काम तु करन चाव्हासेस वा गदने कर।" 28 पर बसन वालो मा लक कोनी नही जान पायो, का यो गोस्टी ओना ओला काय लाई कहीस। 29 यहूदा को जवर पियुसी रव्हत होतो एकोलाय काही-काही ना समजीन का यीसु ओला यो कव्हासे जो काही हमला तिहार को लाई पाहिजे उ लेके आन। या यो कहीस, गरीब गोर ला काही देव।

30 येने परकार लक उ टुकड़ा धरयो अना बाहेर हीट गयो, वा रात को बेरा होती। 31 जबा उ बाहेर चली गयो ता यीसु ना कहीस "अबा मानूस को टूरा को बड़ाई*13:31 महिमा होवासे, अना परमेस्वर की महिमा ओमा भयोसे। 32 अदी ओमा परमेस्वर की महिमा होवासे, तो परमेस्वर भी आपरो लक ओकी महिमा करेत, अना तुरतई करेत। 33 ओ टूराहुन, मि जरा सो बेरा तकन तुमरो जवर सेउ, मंग तुम्हि मोला ढुंढने, जसो की मि यहूदिगीन लक कव्हसू, जिता मि जावासेऊ, उता तुमी नही आय सको, वसोच तुम्हिला भी कव्हासू। 34 मि तुम्हिला एक नवतो हुकूम देवासु, का एकमेक लक माया करो, जसो मि तुम्हरो लक माया राखासु, वसोच तुम्हि एकमेक लक माया राखो। 35 अदी आपसी मा माया राखो, ता सबच जान जाहेत, का तुम्हि मोरो चेला आव।"

36 समौन पतरस ना ओला कहीस, "हे पिरभू तु किता जावसेस?" यीसु ना जवाब देइस, "जिता मि जावसु उता तु नही आय सकस, पर एको मंघा मोरो मघानी आवजोस।"

37 पतरस ना ओला कहीस, "हे पिरभू अबा मि तोरो मंघा काय लाई नही आय सकू? मि तो तोरो लाई आपरो जान भी दे देहुँ।"

38 यीसु ना जवाब देइस, "का तु मोरो लाई आपरो जान देजोस? मि तोरो लक खरो सांगासु का कुकड़ा चिल्लावन को पहले तु मोरो नाव लक तीन डाई मुकर जाजोस।"