1 यीसु मंग जैतून पहाड़ पर चली गयो। 2 पहट ला मंदिर मा आयो, तबा सब लोकगीन मंदिर मा आवन लगीन, यीसु वहान बसके उनला सिक्सा देवन लगयो। 3 तबा यहुदी अगुवा अना मोसे को नियम को गुरू गीन एक बायको ला आनीन जोन छिनाला*8:3 व्यभिचार करत धरी गई होती। ओला बीच मा उभी करके यीसु लक कहीन, 4 "हे गुरूजी", "या बायको छिनाली करत धराय गईसे। 5 मोसे को नियम मा हम ला हुकूम देईसेस की असी बायको ला गोटा लक मारो जाय, एको बारे मा तोरी काजक राय से?" 6 ओन्हीसीन यीसु ला फसावन लाय यो गोस्टी पुस रही होतीन, जोनको लक उनला कोनी असो बहाना मिल जाहेत का ओको पर दोस लगाय सकेत। पर यीसु खाल्या नवके अखिन आपरी कंरगी लक जमीन मा लिखन लगयो।

7 काहेकि जबा वय ओको लक पुसत रहिन, एकोलाई यीसु सीधो तनके उनलक बोलिस, "तुमी मा लक जोन पापी नहात वाच सबलक पयले एने बायका ला गोटा मारे।" 8 अना मंग उ जमीन मा वोनो भयके लिखन लगयो। 9 जबा लोकहुन ना असो आयकिन, तबा मोठो लक नहानो तकन, एक-एक करके उता लक हिट गईन। असो यीसु च उता एकलो रह गयो। यीसु को मोहरा वा बायको अबा भी उभी होती। 10 तबा यीसु उभो भयो अना ओनो बायका लक बोलिस, "ओ बायका, वय सब किता गईन? का कोनी ना तोला दोसी नही ठहरायीन?" 11 बायका कव्हासे, "हे पिरभू! कोन्हीसीन नही।" यीसु ना कहीस, "मि भी तोला दन्ड नही देहुँ, जाय अना मंग कबच पाप नोको करजोस।"

12 मंग वहान पायो जावन वाला लोक गीनला यीसु ना कहीस, "जगत को उजाडो मि सेव। जोन मोरो मंघा चलहेत कबच इंधारो मा नही रहेत, पर ओला उजाड़ो मिल्हेत जोन जिंदगी देवासे।"

13 एतरो पर मोसे को नियम को गुरू यीसु लक कव्हासेत, "तु आपरी गवाही*8:13गवाही खुदच देसेस, एकोलाई तोरी गवाही खरी नहात।"

14 तबा यीसु ना उन ला साँगिस, "अदी मि आपरो पुरूप खुदच देवासु ता भी मोरो पुरूप खरो से, काहे की मि जानासेऊ की मि किता लक आयीसेऊ, अना किता लक जावासू। पर तुमी नही जानासेव की मि किता लक आयीसेऊ अना किता लक जावासेऊ। 15 तुमी मानूस की उसुल पर न्याय करोसो, मि कोनी को नियाव नही करूँ। 16 तरी अदी मि न्याय करूँ, ता मोरो न्याय खरो से। काहे की मि एकलो नही सेव। पर मोठो दाअजी अजी, जेना मोला धाड़ीसेस, उ अना मि मिलके न्याय करासेत। 17 मि आपरी गवाही खुदच देवासेऊ अना मोठो दाअजी अजी भी, जेना मोला धाड़ीसेस, मोरो कन लक गवाही देसे। 18 एक तो मि खुदच आपरी गवाही देवासु। अना दुजो से परमेस्वर बाबूजी, जोन ना मोरो कनलक गवाही देइसेस, जोन ना मोला धाड़िसेस।"

19 ऐतरो मा लोकहुन यीसु ला कव्हासेत, "तोरो अजी किता से?" यीसु ना कहीस, "तुमी नही जानासो, का मि कोन सेऊ? अना मोरो अजी ला भी नही जानासो, अदि तुमी जानतत, ता मोरो अजी ला भी जान लियो रव्हतत।"

20 यीसु ना या गोस्टी उनला मंदिर मा सिक्सा देतो बेरा भन्डार घर मा कहीस, तरी कोनी ना ओला नही धरीन, काहेकि ओको बेरा अबा नही आयो होतो।

21 यीसु ना मंग एक गन उन ला कहीस, "मि चली जाहु, तुमी मोला ढुंढ-ढान्ड करने, पर तुम्हि आपरो पापहुन मा मर जाहो। जिता मि जावासेऊ वहान तुमी नही आय सकने।"

22 मंग यहुदी अगूवा कव्हन लगीन, "का तुमी सोचसो का उ आपरो खुदच ला मार देहे? काहेकि ओना कहिसेस तुमी वहान नही आय सकने जहान मि जावासेऊ।"

23 ओना उन ला कहीस "तुमी धरती का सेव, मि वरता*8:23 वरता लक आयी सेऊ। अना तुमी दुनियाँ का आव, मि दुनिया को नही आऊ। 24 एको लाई मीना तुमला कव्हयो, की तुमी पाप मा मरोह। काहे की तुमी भरोसा नही ठेवो, की मि वाच सेऊ।"

25 मंग ओन्हीसीन ओको लक पुसिन, "तु कोन आस?"

यीसु ना उन लक जवाब देइस, "मि सुरू लक तुमला साँगत आयीसेऊ, वाच सेऊ। 26 तुमरो बारे मा मोला लगत गोस्टी कव्हनो से, अना तुमरो न्याय करनो से। पर मोरो धाड़न वालो परमेस्वर खरो से। मीना जोन गोस्टी ओको लक आयकीसेऊ। वाच मि जगत लक कव्हसू।"

27 वय नही समज पाईन की आमी ला उ परमेस्वर दाअजी को बारे मा कव्हासे। 28 तबा यीसु न कहीस "जबा तुमी मानूस को टूरा वरता मा चघावने, तो जान लेवने की मि वाच आऊ। अना मि आपरो आप लक काही नही करासू। पर जसो मोरो परमेस्वर दाअजी ना सिकाईसेस वसोच गोस्टी कव्हसू। 29 मोरो धाड़नवालो मोरो सँग से, ओने मोला एकलो नही सोड़ीसेस, यो काजी सदा वाच काम करासू, जोको लक परमेस्वर खुस रव्हासे।"

30 यीसु की यो गोस्टी ला आयक के लगत लोकइन ना ओको बिस्वासी होय गयीन।

31 तबा यीसु ना वोको पर भरोसा राखनवालो यहूदी गीनला कहीस, "अदी तुमी मोरो गोस्टी ला आयको, ता खरो मा मोरो चेला कहलाहो। 32 अना खराई ला जान लेवने तो खराई तुमला सूटकारा देहेत।"

33 ओन्हिसीन यीसु लक सवाल पुसासेत, "आमी तो अबराहम को खानदान*8:33 खानदान को सेजन। आमी कोनी का गुलाम नही भयो, मंग तु कसो कव्हासेव तुमिला सूटकारा मिलहेत?"

34 यीसु ना उन ला जवाब देइस," मि तुमला खरो-खरो कव्हुसू। हर कोनी जोन पाप करासे, पाप को दास से। 35 कोनी दास हमेसा घर मा नही रव्ह सका, पर टूरा हमेसा संग रव्होसे। 36 तबा अदी टूरा तुमला सूटकारा देहेत, तबा सच्ची मा तुमी पाप लक सूटकारा पाहो।"

37 "मि जानासु की तुमी अबराहम को खानदान का सेव। मंग मोरो सबद तुमरो मनमा नही समावासे, तबच तुमी मोला मार डाकनो चाव्हासेव। 38 मि वाच कव्हुसू जोन मीना आपरो परमेस्वर अजी को इता चोविसेऊ। अना तुमी वाच करोसो जोन तुमीना आपरो अजी सैतान लक आयकासेव।" 39 एतरो पर ओन्हिसीन यीसु ला जवाब देइन, "आमरो अजी ता अबराहम से।"

यीसु ना कहीस, "अदी तुमी अबराहम की औलाद होतत ता अबराहम को जसो काम करतत। 40 पर तुमी ता मोरो जसो मानूस ला मार डाकन चाव्हसेव, जेने तुमला उ खराई ला साँगिसेस जो मोठो परमेस्वर लक आयकीसेस। अबराहम ना ता असो नही करयो होतो। 41 तुमी आपरो अजी को काम करोसो।" मंग ओन्हीसीन यीसु लक कहीन, "आमी छिंडरापन लक नही जनम नही लियासेजन। आमरो एकच अजी परमेस्वर से अना उ पवीतर से।"

42 यीसु ना उन लक कहीस "अदी परमेस्वर तुमरो अजी होतो ता तुमी मोरो लक माया राखतत। काहे की मि परमेस्वर कन लक हिटके आईसेऊ, अना अबा यहान सेऊ। मि खुद नही आईसेऊ, पर ओना मोला धाडीसेस। 43 एकोलाई तुमी मोरो समाचार नही आयकासो, एकोलाई नही समजासो का मि काजक कह रही सेऊ। 44 तुमी आपरो अजी सैतान कन लक सेव, अना आपरो अजी को लालसा ला पूरी करनो चाव्हासेव। उ ता सुरू लक खूनी से, खराई लाय सच्चो नही रव्हे। काहे की सच ओमा नहाती, जबा उ झुठो सांगासे ता आपरो आचरन च लक सांगासे, काहे की उ झुठो से, अना झुठो को अजी से। 45 पर काहेकि मि खराई कव्ह रही सेउ एकोलाई तुमी मोरो भरोसा नही करतत। 46 तुमी मा लक कोन मोला पापी होवन को लानछान लगाय सकासे। अदी मि खराई लक कव्हसू, तो तुमी मोरो भरोसा कायलाई नही करतत। 47 जोन मानूस परमेस्वर को होवासे, उ परमेस्वर की गोस्टी ला आयकासे, तुमी एकोलाय नही आयको की परमेस्वर कन लक नही सेव।"

48 यो आयक के यहूदिगीन ना ओला कहिन, "का हमी खरो नही सांगासेजन, का तू सामरी आस अना तोरो मा भूत से?"

49 यीसु ना जवाब देइस, "मोरो मा कोनी भूत नहात। पर मि आपरो अजी को मान करुसु अना तुमी मोरो बेईज्जती करोसो। 50 पर मि आपरी बड़ाई नही चाव्हासेऊ, पर एक से जोन मोरी बड़ाई चाव्हासे अना न्याय करासे। 51 मि तुमला खरो कव्हसु की अदी कोनी मानूस मोरो कव्हो गयो गोस्टी ला आपनासे ता उ मिरतु ला कबच नही चोहेत। "

52 एतरो पर यहुदी अगूवा गीनना ओला कहिन, "अता आमला मालुम भय गयो से का तोरो मा कोनी भूत से। अबराहम अना भविस्यवक्ता गीन मर गयो सेत। अना तु कव्हसेस अदि कोनी मोरी गोस्टी ला आपनाहे ता ओकी मिरतु कभ्भू नही होयेत। 53 का तु आमरो पुरखा अबराहम लक मोठो आस? जोन मर गयो, अखिन भविस्यवक्ता भी मर गयीन। तु अपरो आप ला काजक समजासे?"

54 यीसु ना जवाब देइस, "अदी मि आप आपरी बड़ाई करु ता मोरी बडाई काही नही, पर मोरी बडाई करन वालो मोरो परमेस्वर बाबूजी से, जेनला तुमी कसो की उ आमरो परमेस्वर आय। 55 अना तुमी तो ओला नही जानो, पर मि ओला जानसेऊ, अना अदी मि कहुँ की ओला नही जानु तो मि तुमरो जसो झुठो ठहरू। पर मि ओला जानासेऊ, अना ओको सबद*8:55गोस्टी मा चलासेऊ। 56 तुमरो पुरखा अबराहम मोला चोवन की आसा लक लगत खुस होतो, अना ओना चोय लेइस अना खुसी मनाईस।"

57 मंग यहूदी अगूवागीन ना ओला कहीन, "अब तकन तु पचास बरस को नही भईसेस, मंग तु ना अबराहम ला कसो चोय लियोसे?"

58 यीसु ना उनला कहीस, "मि तुमी लक खरो कव्हसु, की पुढा अबराहम पैदा भयो, एको लक पुढा मि सेउ।"

59 तबा ओन्हीसीन ओला मारन लाई गोटा उचलीन पर यीसु हिटके मंदिर लक चलो गयो।