Mateus 14

पाँच हजार मानूस गीनला जेवानो

13 जबा यीसु ना योहन को बारे मा खबर आयकीस, मंग नाव मा चघके एक सुनसान जघा मा चली गयो। तबा लोकगीन ना ओको बारे मा आयकिन ता नगरहुन लक पैदल हिटके ओको मंघा होय गयीन। 14 जबा यीसु डोंगा लक बाहेर हिटके कगर पर आयो ता ओना एक मोठी गरदी ला चोयीस। ओला उन पर तरस आयी अना ओना उनको बिमार हुन ला चांगलो करीस।

15 जबा झुलाखाली बेरा भई ता, ओको चेला गीन ना ओको कठा आयके कहीन, "वसोच उसीर भयी गयी से, अखिन यो सुनसान जघा से तु लोकगीन ला सार कर, की वय बस्ति मा जायके, आपरो लाई जेवन लेहेत।"

16 मंग यीसु ना जवाब देइस "उनको जानो जरुरी नाहत! तुमिच इनला जेवन लाई देव।"

17 चेला ना यीसु लक कहीन, की "आमरो कठा पाँच भाकर अना दुई मसरी सेत।"

18 यीसु ना कहीस "मोरो कठा आनो।" 19 तबा वोना लोकगीन ला गवथ पर बसन लाई कहीस अना पाँच भाकर अना दुई मसरी ला लेके सरग कन चोवके परमेस्वर ला धन्य वाद देइस। अना भाकर ला तोड़के चेला गीन ला देइस। अना चेलागीन ना लोक गीनला देइन। 20 जबा सबच खायके अघाय गईन, ता चेलागिन ना बचो टुकड़ा-टाकड़ी को बारा टोपली उचलीन। 21 अना खानवारा लेकरा अना बायका गीनला छोडके, पाँच हजार मानूस को करिब होतीन।